వలువలూడిన బిజెపికి.. విలువలెక్కడివి ?

బండి సుధాకర్‌ గౌడ్‌,
టిపిసిసి అధికార ప్రతినిధి

ప్రజాస్వామ్యం ప్రమాదంలో ఉందా? అంటే.. దేశంలో ఇటీవల జరిగిన పరిణామాలను పరిశీలిస్తే ’ఔను’ అనే సమాధానమే స్పష్టంగా వినిపిస్తోంది. విలువలతో కూడిన పరిపాలన అందించడంలో కేంద్రంలోని బిజెపి ప్రభుత్వం పూర్తిగా విఫలమైందనడంలో ఎలాంటి అతిశయోక్తి లేదు. అందుకే, ‘వలువలు
(దుస్తులు) ఊడిన బిజెపికి.. విలువలెక్కడివి?’ అనే ప్రశ్నలు ఇవాళ దేశవ్యాప్తంగా తలెత్తుతున్నాయి.
గత చరిత్రను ఒకసారి పరిశీలిస్తే.. 1996లో అటల్‌ బిహారీ వాజ్‌పాయ్‌ నేతృత్వంలోని ప్రభుత్వానికి పార్లమెంటులో మెజారిటీ లేనందున, బల నిరూపణకు ముందే కేవలం 13 రోజులకే ఆయన తన పదవికి రాజీనామా చేశారు. కానీ నేడు, ఒక్కో సీటు కోసం రాజ్యాంగబద్ధ సంస్థలను తమ గుప్పిట్లో పెట్టుకొని ప్రజాస్వామ్య స్ఫూర్తిని పూర్తిగా దెబ్బతీస్తున్నారు. ఇటీవల మధ్యప్రదేశ్‌లో మీనాక్షి నటరాజన్‌ నామినేషన్‌ తిరస్కరణ విషయంలో కేంద్ర ఎన్నికల సంఘం వ్యవహరించిన తీరే ఇందుకు నిదర్శనం.

కేంద్ర ప్రభుత్వ ఒత్తిడితో ఎన్నికల సంఘం ఏకపక్షంగా వ్యవహరించిన తీరును దేశ ప్రజలంతా గమనించారు. నాడు మెజారిటీ లేదని గౌరవంగా రాజీనామా చేసే స్థాయి నుంచి.. నేడు ఒక్క సీటు కోసం ప్రజాస్వామ్యాన్ని అపహాస్యం చేసే స్థాయికి బిజెపి దిగజారిందనడంలో ఎలాంటి సందేహం లేదు.

కేంద్రంలోని పాలకులు తమ అధికారాన్ని నిలుపుకోవడానికి ఎలాంటి సంకోచం లేకుండా ఫిరాయింపులను ప్రోత్సహిస్తున్నారు. తమకు స్పష్టమైన మెజారిటీ లేకపోయినప్పటికీ.. మధ్యప్రదేశ్‌ వంటి రాష్ట్రాల్లో ప్రజాస్వామ్యబద్ధంగా ఎన్నికైన ప్రభుత్వాలను కూలదోసి, అడ్డదారిలో అధికారాన్ని హస్తగతం చేసుకోవడం బిజెపి రాజకీయ దివాళాకోరుతనానికి నిదర్శనం.

ఇటీవల అధికార మార్పిడి జరిగిన పశ్చిమ బెంగాల్‌ వంటి రాష్ట్రాల్లో లోక్‌సభ సభ్యులు, రాజ్యసభ సభ్యులు మరియు శాసనసభ్యులను (ఎమ్మెల్యేలను) అడ్డగోలుగా పార్టీ ఫిరాయింపులకు ప్రోత్సహిస్తున్న తీరును మనం చూస్తున్నాం. కేవలం కొందరు రాజ్యసభ సభ్యుల చేత బలవంతంగా రాజీనామాలు చేయించి, తిరిగి వారికే తమ పార్టీ తరఫున రాజ్యసభ సభ్యత్వాలు ఇచ్చుకుంటున్న దుస్థితి నెలకొంది. బిజెపికి గనుక నిజంగానే ప్రజాస్వామ్యంపై చిత్తశుద్ధి ఉంటే.. ఇతర పార్టీల నుంచి తమ పార్టీలో చేరిన పార్లమెంట్‌ సభ్యులందరి చేత తక్షణమే రాజీనామాలు చేయించాలి! ఆ స్థానాల్లో తిరిగి ఉప ఎన్నికలకు వెళ్లి గెలిస్తేనే.. బీజేపీ ప్రజాస్వామ్యాన్ని పరిరక్షిస్తోందని ప్రజలు నమ్ముతారు.

కానీ, ఇవాళ బిజెపి క్షేత్రస్థాయిలో ఏం చేస్తోంది?
కేంద్ర ప్రభుత్వ దర్యాప్తు సంస్థలను తమ జేబు సంస్థలుగా మార్చుకుంది. వేల కోట్ల బ్యాంకు రుణాల ఎగవేతదారులు, సిబిఐ (CBI), ఇడి(ED) కేసుల్లోని ప్రధాన నిందితులను సైతం తమ పార్టీలో చేర్చుకుంటూ వారికి ’రాజకీయ రక్షణ’ కల్పిస్తోంది. తద్వారా దేశ ఆర్థిక, న్యాయ వ్యవస్థలను తీవ్రం గా ప్రభావితం చేస్తూ, భారత పౌరులకు తీరని అన్యాయం చేస్తోంది.

అసలు ఎలాంటి నేర చరిత్ర లేని మీనాక్షి నటరాజన్‌ లాంటి నిజాయితీగల గాంధేయవాదికి ఘోర అన్యాయం జరిగేలా కేంద్ర ఎన్నికల సంఘం ఏకపక్ష నిర్ణయం తీసుకోవడం అత్యంత దారుణం. ఇది ముమ్మాటికీ భారత ప్రజాస్వామ్యానికే గొడ్డలిపెట్టు లాంటిది. గతంలో 2022లో ఇద్దరు వ్యక్తుల మధ్య జరిగిన ఒక సాధారణ సంఘటనపై పోలీసులు ఎఫ్‌ఐఆర్‌ (FIR) నమోదు చేసి, విచారణ కూడా పూర్తి చేశారు. అయితే, ఆ కేసులో కనీసం విచారణ జరిపే అర్హత కూడా లేని ఒక కోర్టు 2025లో జారీ చేసిన నోటీసును సాకుగా చూపి, కేంద్ర ఎన్నికల సంఘం ఏకపక్షంగా వ్యవహరించడం దారుణం. ఇలాంటి చెల్లుబాటు కాని సాంకేతిక కారణాన్ని అడ్డం పెట్టుకుని, మీనాక్షి నటరాజన్‌ గారి నామినేషన్‌ను తిరస్కరించడం ముమ్మాటికీ నేరం.

వాస్తవానికి, భారతదేశంలో క్రిమినల్‌ కేసులకు సంబంధించి ఫిర్యాదు చేయడానికి చట్టప్రకారం ఇప్పటివరకు ప్రధానంగా రెండు పద్ధతులు అమలులో ఉన్నాయి.

మొదటి పద్ధతి: ఫిర్యాదుదారు నేరం జరిగిన ప్రాంత పరిధిలోని పోలీస్‌ స్టేషన్‌కు నేరుగా వెళ్లి ఫిర్యాదు చేయడం. ఆ ఫిర్యాదు ఆధారంగా విచారణాధికారి (Investigating Officer) ప్రాథమిక దర్యాప్తు జరుపుతారు. ఆ కేసు ఏదైనా రాజకీయ ప్రేరేపితమైనదా? లేదా అందులో నిజానిజాలు ఉన్నాయా? అనే కోణంలో నిష్పాక్షికంగా పరిశీలిస్తారు. లభించిన పక్కా ఆధారాల ప్రకారం నిందితులను అరెస్టు చేసి, కోర్టులో చార్జ్‌ షీట్‌ (దోషారోపణ పత్రం) దాఖలు చేస్తారు.

రెండో పద్ధతి: ఒకవేళ సదరు నేరంపై సంబంధిత పోలీస్‌ స్టేషన్‌ అధికారులు ఎలాంటి చర్యలు తీసుకోకపోతే.. ఫిర్యాదుదారుడు నేరుగా న్యాయస్థానాన్ని (కోర్టును) ఆశ్రయించి ‘ప్రైవేట్‌ కంప్లైంట్‌’ ద్వారా కేసును రిఫర్‌ చేయించుకునే అవకాశం ఉంటుంది. కోర్టు ఆదేశాల (Court Refer Petition) మేరకు కూడా తిరిగి స్థానిక పోలీస్‌ స్టేషన్‌లో ఎఫ్‌ఐఆర్‌ (FIR) నమోదు చేయడం తప్పనిసరి.

మీనాక్షి నటరాజన్‌ విషయంలో చట్టాన్ని ఉల్లంఘించిన తీరు
చట్టపరమైన ఈ ప్రాథమిక సూత్రాలను పరిశీలిస్తే.. ఇక్కడ మన దేశంలో (మధ్యప్రదేశ్‌ పరిణామాల నేపథ్యంలో) మీనాక్షి నటరాజన్‌పై ఎక్కడా ఎలాంటి ఎఫ్‌ఐఆర్‌ (FIR) నమోదు కాలేదు. చట్టప్రకారం ఎఫ్‌ఐఆర్‌ నమోదు కానప్పుడు, ఆమెపై ఎలాంటి క్రిమినల్‌ కేసే లేదని స్పష్టంగా అర్థమవుతోంది. ఆమె పూర్తిగా 1951 ప్రజా ప్రతినిధుల చట్టం (Representation of the People Act, 1951) నిబంధనల పరిధిలోనే తన నామినేషన్‌ను సక్రమంగా సమర్పించారు. కానీ, చట్టపరమైన కనీస ఆధారాలు లేకపోయినా.. ప్రజాస్వామ్య నియమాలను తుంగలో తొక్కి ఆమె నామినేషన్‌ను ఏకపక్షంగా తిరస్కరించారు.

చివరకు, బాధిత అభ్యర్థికి పైఅధికారులకు లేదా న్యాయస్థానానికి తక్షణమే అప్పీలు చేసుకునే కనీస చట్టపరమైన అవకాశాన్ని కూడా ఇవ్వలేదు. కేంద్ర ఎన్నికల సంఘం పూర్తిగా ప్రభుత్వ పెద్దల ఒత్తిడికి తలొగ్గి, నిష్పాక్షికతను కోల్పోయి, ప్రజాస్వామ్య విలువలను ఘోరంగా అణచివేసిందనడంలో ఎలాంటి సందేహం లేదు.