నేను పరారీలో లేను.. భారతదేశానికి తిరిగి వచ్చే ఆలోచన లేదు.. లలిత్ మోదీ సంచలన వ్యాఖ్యలు..

ఐపీఎల్ మాజీ చైర్మన్ లలిత్ మోదీ తాజాగా ఒక ప్రముఖ మీడియా సంస్థకు ఇచ్చిన ఇంటర్వ్యూలో తనపై వస్తున్న ఆరోపణలు, మీడియా ప్రచారంపై సంచలన వ్యాఖ్యలు చేశారు. తాను ఎవరికీ భయపడి పారిపోవడం లేదని, తనపై ఎలాంటి నేరమూ రుజువు కాలేదని ఆయన స్పష్టం చేశారు. భారత అధికారుల నుంచి తాను తప్పించుకుని దాక్కుంటున్నట్లు వస్తున్న వార్తలను పూర్తిగా ఖండించిన ఆయన.. అదంతా కేవలం మీడియా తన రేటింగుల కోసం చేసుకుంటున్న సెన్సేషనల్ ప్రచారం మాత్రమేనని కొట్టిపారేశారు. న్యాయపరంగా తాను ఎల్లప్పుడూ అందరికీ అందుబాటులోనే ఉన్నానని వివరించారు.

గ్లోబల్ సూపర్ పవర్ అయిన భారతదేశం నుండి ఎవరైనా తప్పించుకోవడం అసాధ్యమని లలిత్ మోదీ వ్యాఖ్యానించారు. ఒకవేళ తాను నిజంగానే పారిపోవాలని చూస్తుంటే, తనను పట్టుకోవడం భారత ప్రభుత్వానికి పెద్ద కష్టమైన పనేమీ కాదని, ఎందుకంటే భారత ప్రభుత్వానికి అంతటి సత్తా ఉందని కొనియాడారు. ప్రభుత్వంతో పెట్టుకునే ఉద్దేశం తనకు అస్సలు లేదని, ఇక్కడ ప్రభుత్వం కంటే మీడియానే అతిగా ప్రవర్తిస్తోందని ఆరోపించారు. దేశంలో కఠినమైన పరువు నష్టం చట్టాలు లేకపోవడం వల్లే మీడియా సంస్థలపై ఎలాంటి కేసులు లేకుండా, వారు ఇష్టం వచ్చినట్లు కథనాలు అల్లుతున్నారని మండిపడ్డారు.

ప్రస్తుతం మనీలాండరింగ్, ఫెమా (FEMA) చట్టాల ఉల్లంఘన వంటి తీవ్రమైన ఆరోపణలను లలిత్ మోదీ ఎదుర్కొంటున్నారు. అయితే, ఇప్పటివరకు తనపై ఎలాంటి నేరపూరిత ఆరోపణలు రుజువు కాలేదని, అసలు తనపై ఒక్క కేసు కూడా నమోదు కాలేదని ఆయన వాదించారు. ఇదే సమయంలో భారత న్యాయ వ్యవస్థ పనితీరును ఆయన తప్పుపట్టారు. భారతదేశంలో న్యాయం చాలా ఆలస్యంగా దక్కుతుందని, అలా నెమ్మదిగా న్యాయం అందడం అనేది నిందితుడికి ఒక రకమైన పెద్ద శిక్ష లాంటిదేనని అభిప్రాయపడ్డారు. తాను నిజంగానే తప్పు చేసి ఉంటే చట్ట ప్రకారం తనను ప్రాసిక్యూట్ చేయవచ్చని సవాల్ విసిరారు.

ఇకపై భారతదేశానికి తిరిగి వచ్చే ఆలోచన తనకు ఏమాత్రం లేదని లలిత్ మోదీ స్పష్టం చేశారు. గత 17 ఏళ్లుగా తనను కోర్టుకు కూడా తీసుకెళ్లలేకపోయిన అధికారులు, ఇప్పుడు తనను ఎలా అరెస్ట్ చేయగలరని ఆయన ప్రశ్నించారు. ఒకవేళ భవిష్యత్తులో చట్టపరంగా ఏదైనా జరగాల్సి ఉంటే అదే జరుగుతుందని వ్యాఖ్యానించారు. కాగా, లలిత్ మోదీ ఐపీఎల్ చైర్మన్‌గా ఉన్న కాలంలో జరిగిన భారీ ఆర్థిక అక్రమాలపై ఎన్‌ఫోర్స్‌మెంట్ డైరెక్టరేట్ (ED) సుదీర్ఘ కాలంగా విచారణ జరుపుతున్న సంగతి తెలిసిందే.