వరల్డ్ కప్ 2027 ఫీవర్ స్టార్ట్.. 49 రోజుల పాటు క్రికెట్ మహాసంగ్రామం.. పూర్తి వివరాలు ఇవిగో..

అంతర్జాతీయ క్రికెట్ మండలి (ఐసీసీ) క్రికెట్ అభిమానులకు ఒక అద్భుతమైన తీపి కబురు అందించింది. 2027లో జరగబోయే పురుషుల వన్డే ప్రపంచకప్‌కు సంబంధించిన కీలక తేదీలు, వేదికల ప్రాథమిక వివరాలను వెల్లడించింది. ఈ ప్రతిష్టాత్మక మెగా టోర్నీ 2027 అక్టోబర్ 4వ తేదీన ప్రారంభమై నవంబర్ 21వ తేదీ వరకు దక్షిణాఫ్రికా, జింబాబ్వే, నమీబియా దేశాల సంయుక్త ఆతిథ్యంలో జరగనుందని ఈఎస్‌పీఎన్ క్రిక్‌ఇన్‌ఫో నివేదించింది. గతంలో 2003లో ఆఫ్రికా ఖండంలో వన్డే ప్రపంచకప్ నిర్వహించగా, మళ్లీ 24 ఏళ్ల సుదీర్ఘ విరామం తర్వాత ఆ గడ్డపై ఈ మెగా ఈవెంట్ జరగనుండటం విశేషం.

ఈ టోర్నీలో జరిగే మొత్తం 54 మ్యాచ్‌లలో అత్యధిక భాగం దక్షిణాఫ్రికాలోనే జరగనున్నాయి. దక్షిణాఫ్రికా దాదాపు 41 మ్యాచ్‌లకు ఆతిథ్యం ఇవ్వనుండగా, జింబాబ్వే మూడు వేర్వేరు వేదికల్లో 8 నుండి 10 మ్యాచ్‌లను నిర్వహించనుంది. ఇందుకోసం జింబాబ్వేలోని విక్టోరియా ఫాల్స్ వద్ద సరికొత్తగా నిర్మిస్తున్న ‘ఫేల్ మోసీ-ఓ-తున్యా’ స్టేడియం ఈ ఏడాది చివరి నాటికే అందుబాటులోకి రానుంది. ఇక మరో సహ-ఆతిథ్య దేశమైన నమీబియా 3 మ్యాచ్‌లను నిర్వహించనుంది.

గత రెండు ప్రపంచకప్‌లలో కేవలం 10 జట్లు మాత్రమే తలపడగా, ఈసారి ఐసీసీ పాత ఫార్మాట్‌ను పునరుద్ధరిస్తూ జట్ల సంఖ్యను 14కు పెంచింది. ఈ 14 జట్లను ఏడేసి చొప్పున రెండు గ్రూపులుగా విభజిస్తారు. ప్రతి గ్రూప్ నుండి మొదటి మూడు స్థానాల్లో నిలిచిన జట్లు ‘సూపర్ సిక్స్’ దశకు చేరుకుంటాయి. పూర్తిస్థాయి సభ్య హోదా ఉన్నందున ఆతిథ్య దేశాలైన దక్షిణాఫ్రికా, జింబాబ్వేలు నేరుగా అర్హత సాధించగా, నమీబియా మాత్రం క్వాలిఫైయింగ్ రౌండ్ల ద్వారానే టోర్నీలోకి రావాల్సి ఉంటుంది.

ఐసీసీ యొక్క 2027-2031 ఫ్యూచర్ టూర్స్ ప్రోగ్రామ్ (ఎఫ్‌టీపీ) కింద జరగనున్న మొదటి పెద్ద ఈవెంట్ ఇదే కావడం గమనార్హం. ఈ ప్రపంచకప్ షెడ్యూల్ మరియు తేదీలపై అహ్మదాబాద్‌లో జరిగిన ఐసీసీ బోర్డు సమావేశంలో ప్రాథమికంగా చర్చించారు. కాగా, జులైలో ఎడిన్‌బర్గ్‌లో జరగబోయే వార్షిక సర్వసభ్య సమావేశంలో (AGM) ఈ తేదీలకు తుది ఆమోదం లభించనుంది. ఇదే కీలక సమావేశంలో ప్రపంచ టెస్ట్ ఛాంపియన్‌షిప్ (WTC) ఫార్మాట్‌లో చేయాల్సిన మార్పులు, అలాగే అన్ని పూర్తిస్థాయి సభ్య దేశాలను టెస్ట్ ఛాంపియన్‌షిప్‌లో భాగస్వామ్యం చేయడంపై ఐసీసీ తుది నిర్ణయం తీసుకోనుంది.