Godavari Floods: గోదావరి వరదలు.. 7 ఏళ్ల తర్వాత నాసిక్లో గోదావరి నది ఉగ్రరూపం.. 3 గంటల పాటు నీటిలో మునిగిన దుటోండ్యా మారుతి విగ్రహం
odavari Floods in 7 Years
Godavari floods: మహారాష్ట్రలోని నాసిక్ నగరంతో పాటు ఎగువ పరీవాహక ప్రాంతాల్లో కురిసిన కుండపోత వర్షాల కారణంగా గోదావరి నది ఉప్పొంగి ప్రమాదకర స్థాయిలో ప్రవహిస్తోంది. నాసిక్లో గత 24 గంటల్లో ఏకంగా 116 మిల్లీమీటర్లకు పైగా భారీ వర్షపాతం నమోదు కావడంతో.. నది నీటిమట్టం ఒక్కసారిగా పెరిగింది. ఈ భారీ వరదల ధాటికి, గోదావరి నది వరద తీవ్రతకు కొలమానంగా భావించే ప్రసిద్ధ ‘దుతోండ్య మారుతి’ విగ్రహం శుక్రవారం తెల్లవారుజామున 3 గంటల నుండి 6 గంటల మధ్య పూర్తిగా నీట మునిగింది. ఏడేళ్ల తర్వాత (గతంలో 2019 సెప్టెంబర్లో) ఈ విగ్రహం పూర్తిగా మునిగిపోవడం ఇదే తొలిసారని పర్యావరణవేత్తలు వెల్లడించారు.
నాసిక్ జిల్లాలోని త్రియంబకేశ్వర్లో 193 మి.మీ, సుర్గానాలో 164.5 మి.మీ చొప్పున అత్యధిక వర్షపాతం నమోదైంది. దీంతో గంగాపూర్ డ్యామ్ నీటిమట్టం 98.26 శాతానికి చేరుకోగా, జిల్లాలోని డ్యామ్ల మొత్తం నీటి నిల్వ 72.40 శాతానికి పెరిగింది. పరిస్థితి తీవ్రత దృష్ట్యా అహల్యాబాయి హోల్కర్ వంతెన కింద ఉన్న ఆనకట్ట నుండి నీటి విడుదలను గురువారం రాత్రి ఉన్న 19,500 క్యూసెక్కుల నుంచి శుక్రవారం తెల్లవారుజామున ఒక్కసారిగా 27,747 క్యూసెక్కులకు పెంచారు. అంతేకాకుండా దర్నా డ్యామ్ నుంచి 19,312 క్యూసెక్కులు.. చంకాపూర్ నుంచి 18,879 క్యూసెక్కులు, నందూర్-మధ్యమేశ్వర్ ఆనకట్ట నుండి అత్యధికంగా 94,497 క్యూసెక్కుల నీటిని దిగువకు విడుదల చేశారు. పగటిపూట వర్షం తగ్గడంతో ప్రవాహం 18,232 క్యూసెక్కులకు తగ్గినప్పటికీ.. రాత్రి వైపునకు కూడా నీటిమట్టం విగ్రహం నుదుటి స్థాయిలోనే కొనసాగింది.
గోదావరి వరద నీరు రామ్కుండ్, గోడా ఘాట్ ప్రాంతాల్లోని చిన్న ఆలయాలను ముంచెత్తడమే కాకుండా.. సమీపంలోని భండి బజార్లోకి ప్రవేశించి 50కి పైగా దుకాణాలను ప్రభావితం చేసింది. ముప్పును గుర్తించిన సరఫ్ బజార్లోని 100 మంది స్వర్ణకారులతో సహా దాదాపు 300 మంది వ్యాపారులు తమ విలువైన సరుకులను సురక్షిత ప్రాంతాలకు తరలించారు. రామ్సేతు వంతెన 24 గంటలకు పైగా నీట మునిగిపోగా, గాడ్గే మహారాజ్ వంతెన వరకు నీరు చేరింది. ఇటు గ్రామీణ ప్రాంతాలైన నిఫాడ్ తాలూకాలోని సాయ్ఖేడా వంతెన మునిగిపోగా.. చందోరి, సాయ్ఖేడా గ్రామాల్లోకి వరద నీరు చేరి వేలాది హెక్టార్ల వ్యవసాయ పంటలు నీట మునిగాయి.
ఎడతెరిపి లేని వర్షాల వల్ల నాసిక్ మున్సిపల్ కార్పొరేషన్కు 79 అత్యవసర పిలుపులు వచ్చాయి. నగరం అంతటా 51 చెట్లు, నాలుగు ఇళ్లు కూలిపోయాయి. పంచవటి ప్రాంతంలో ఖాళీగా ఉన్న ఒక పాత వాడ నేలమట్టం కాగా, జిల్లా కలెక్టరేట్ పార్కింగ్లో భారీ చెట్టు కూలి 10 కార్లు, ద్విచక్ర వాహనాలు దెబ్బతిన్నాయి. అగ్నిమాపక సిబ్బంది రంగంలోకి దిగి శిథిలాలను తొలగించారు. భారత వాతావరణ శాఖ (IMD) శనివారం కూడా ‘ఎల్లో అలర్ట్’ జారీ చేయడంతో, నదీ తీర ప్రాంత ప్రజలు నదుల్లోకి దిగవద్దని, తమ పశువులు, నిత్యవసరాలను సురక్షిత ప్రాంతాలకు తరలించుకోవాలని జిల్లా యంత్రాంగం కఠిన ఆదేశాలు జారీ చేసింది.
సంబంధిత వార్తలు
