US Rainfall Risk: అమెరికాకు భారీ వర్షాల ముప్పు.. 4 రాష్ట్రాలకు డేంజర్ బెల్స్.. 1,000 ఏళ్లలో ఒకసారి కురిసే స్థాయిలో పడనున్న వర్షం..

jagan 17 Sep 2026 1 నిమిషాల పఠనం ప్రపంచం

US Rainfall Risk

US Rainfall Risk: అమెరికా నైరుతి ప్రాంతాన్ని భారీ వర్షాలు వణికిస్తున్నాయి. అరిజోనా, న్యూ మెక్సికో, ఉటా, కొలరాడో రాష్ట్రాల్లో రానున్న రోజుల్లో భారీ నుంచి అత్యంత భారీ వర్షాలు కురిసే అవకాశం ఉందని వాతావరణ నిపుణులు హెచ్చరించారు. కొన్ని ప్రాంతాల్లో తక్కువ వ్యవధిలోనే భారీగా వర్షం కురిసే అవకాశం ఉండటంతో ఆకస్మిక వరదల ముప్పు పెరిగింది. అత్యంత ప్రభావిత ప్రాంతాల్లో స్థానికంగా 12 అంగుళాలు అంటే దాదాపు 30 సెంటీమీటర్ల వరకు వర్షపాతం నమోదయ్యే అవకాశం ఉందని AccuWeather అంచనా వేసింది. ఇలాంటి అత్యంత అరుదైన వర్షపాతాన్ని ‘1,000 ఏళ్లకు ఒకసారి’ సంభవించే స్థాయిగా వాతావరణ విశ్లేషణల్లో పేర్కొంటున్నారు.

నేషనల్ వెదర్ సర్వీస్ ఇప్పటికే నైరుతి అమెరికాలోని పలు ప్రాంతాలకు ఫ్లాష్ ఫ్లడ్ వాచ్‌లు, హెచ్చరికలు జారీ చేసింది. ముఖ్యంగా గంట వ్యవధిలో 1 నుంచి 2 అంగుళాల వరకు వర్షపాతం నమోదయ్యే పరిస్థితులు కొన్ని ప్రాంతాల్లో కనిపించవచ్చని అధికారులు తెలిపారు. ఫీనిక్స్ ప్రాంతంలోని మారికోపా కౌంటీలో సెప్టెంబర్ 16న కొన్ని ప్రాంతాల్లో ఇప్పటికే 2 నుంచి 4 అంగుళాల వర్షం నమోదై వరదలు సంభవించాయి.

ఫీనిక్స్, టక్సన్‌లో భారీ వర్షాలు

అరిజోనాలో పరిస్థితి ఇప్పటికే ఆందోళనకరంగా మారింది. ఫీనిక్స్, టక్సన్ ప్రాంతాల్లో భారీ వర్షాలతో రోడ్లు, లోతట్టు ప్రాంతాలు నీటమునిగాయి. నేషనల్ వెదర్ సర్వీస్ ప్రకారం మారికోపా కౌంటీలో వరదలు కొనసాగుతున్న సమయంలో కొన్ని ప్రాంతాల్లో 2–4 అంగుళాల వర్షం నమోదైంది. మరోవైపు టక్సన్ ప్రాంతానికి కూడా ఫ్లాష్ ఫ్లడ్ వాచ్ జారీ అయింది.

టక్సన్‌లో భారీ వర్షాల కారణంగా అత్యవసర సహాయక చర్యలు చేపట్టాల్సి వచ్చింది. వాహనాల్లో చిక్కుకున్న పలువురిని సహాయక సిబ్బంది రక్షించారు. వరద నీటి ప్రవాహాన్ని తక్కువగా అంచనా వేయొద్దని అధికారులు ప్రజలను హెచ్చరిస్తున్నారు. నీటితో నిండిన రోడ్లపై వాహనాలు నడపకూడదని, ముఖ్యంగా రాత్రి సమయంలో మరింత జాగ్రత్తగా ఉండాలని సూచిస్తున్నారు.

నాలుగు రాష్ట్రాల్లో వర్షాల ప్రభావం

ఈ వర్షాల ప్రభావం అరిజోనాతో మాత్రమే పరిమితం కాలేదు. న్యూ మెక్సికో, కొలరాడో, ఉటాలోని కొన్ని ప్రాంతాలకు కూడా భారీ వర్షాలు, ఆకస్మిక వరదల ముప్పు పొంచి ఉంది. ఫోర్ కార్నర్స్ ప్రాంతంలో విస్తృతంగా ఉరుములతో కూడిన వర్షాలు కురిసే అవకాశం ఉందని వాతావరణ అధికారులు తెలిపారు. న్యూ మెక్సికోలో ఇప్పటికే భారీ వర్షాల కారణంగా ప్రాణనష్టం నమోదైంది. AccuWeather అంచనా ప్రకారం ఈ ప్రాంతంలో విస్తృతంగా 1–4 అంగుళాల వర్షపాతం నమోదయ్యే అవకాశం ఉంది. కొన్ని ప్రాంతాల్లో 4–8 అంగుళాలకు చేరుకోవచ్చు. అత్యధికంగా ప్రభావితమయ్యే ప్రాంతాల్లో స్థానికంగా 12 అంగుళాల వరకు వర్షం కురిసే అవకాశం ఉందని అంచనా వేసింది.

మెక్సికో నుంచి ఉత్తర దిశగా తేమతో కూడిన గాలులు

నైరుతి అమెరికాలో ఈ తరహా వర్షాలకు ఉత్తర అమెరికా రుతుపవన వ్యవస్థ ఒక కారణంగా ఉంది. మెక్సికో, గల్ఫ్ ఆఫ్ కాలిఫోర్నియా, ఉష్ణమండల పసిఫిక్ ప్రాంతాల నుంచి తేమతో కూడిన గాలులు ఉత్తర దిశగా కదలడంతో వాతావరణంలో తేమ పెరుగుతోంది. ఈ తేమ పైకి ఎగసి ఉరుములు, మెరుపులతో కూడిన భారీ వర్షాలకు దారితీస్తోంది.

ఎండలు, కరువు పరిస్థితులతో ఇబ్బంది పడుతున్న కొలరాడో నది పరివాహక ప్రాంతాలకు ఈ వర్షాలు కొంత ఉపశమనం కలిగించే అవకాశం ఉన్నప్పటికీ.. ఒక్కసారిగా భారీగా వర్షం కురిస్తే వరదలు, కొండచరియలు, మట్టి ప్రవాహాలు వంటి ప్రమాదాలు పెరుగుతాయి. ముఖ్యంగా ఇప్పటికే తడిసిన నేల, లోయలు, చిన్న వాగులు, కాలువలు, లోతట్టు ప్రాంతాల్లో ఆకస్మిక వరదలు చాలా వేగంగా ఏర్పడే అవకాశం ఉంది.

ప్రస్తుతం నైరుతి అమెరికాలో వాతావరణ పరిస్థితులు వేగంగా మారుతున్నందున ప్రజలు స్థానిక నేషనల్ వెదర్ సర్వీస్ హెచ్చరికలను గమనించాలని అధికారులు సూచిస్తున్నారు. వరద నీటిలోకి వాహనాలతో వెళ్లకుండా, నీటి ప్రవాహం కనిపించే ప్రాంతాలకు దూరంగా ఉండటం అత్యంత కీలకమని హెచ్చరిస్తున్నారు.