AI vs Diseases: పదేళ్లలో ప్రాణాంతక వ్యాధులకు ఏఐతో చెక్.. వైద్య రంగంలో భారీ మార్పులు వస్తాయంటున్న ఆంత్రోపిక్ సీఈఓ..

AI vs Diseases: కృత్రిమ మేధ (AI) వైద్య రంగంలో సరికొత్త విప్లవం సృష్టించనుందా? క్యాన్సర్, అల్జీమర్స్, గుండె జబ్బులు, మానసిక అనారోగ్యాలు మరో పదేళ్లలో గత చరిత్రగా మారిపోనున్నాయా? ప్రముఖ ఏఐ పరిశోధనా సంస్థ ‘ఆంథ్రోపిక్’ (Anthropic) సీఈఓ డారియో అమోడెయ్ (Dario Amodei) చేసిన తాజా ప్రకటన ఇప్పుడు ప్రపంచవ్యాప్తంగా తీవ్ర చర్చనీయాంశమైంది. అయితే ఆయన అంచనాలపై ఔషధ రంగానికి చెందిన నిపుణులు, శాస్త్రవేత్తలు తీవ్ర సందేహాలు వ్యక్తం చేస్తున్నారు.

‘‘మనం సరైన దిశలో శ్రమిస్తే క్యాన్సర్, అల్జీమర్స్, గుండె జబ్బులు వంటివన్నీ దశాబ్దంలోపే గత చరిత్రగా మారిపోతాయి. వేల ఏళ్లుగా మానవాళిని వేధిస్తున్న సంక్లిష్ట ఆరోగ్య సమస్యలకు పరిష్కారం చూపే అద్భుత యుగాన్ని సృష్టించవచ్చని ఆంథ్రోపిక్ సీఈఓ డారియో అమోడెయ్ ధీమా వ్యక్తం చేశారు.

జీవశాస్త్ర పరిశోధనలు, ఔషధాల అభివృద్ధి, నూతన వైద్య ఆవిష్కరణల వేగాన్ని ఏఐ ఊహించని రీతిలో పెంచగలదని ఆయన అభిప్రాయపడ్డారు. గూగుల్ ఏఐ విభాగం (DeepMind) అధిపతి డెమిస్ హసాబిస్, టెస్లా అధినేత ఎలాన్ మస్క్ కూడా గతంలో ఇలాంటి ఆశాభావాన్నే వ్యక్తం చేశారు. ఒక నూతన ఔషధ అభివృద్ధికి పట్టే దశాబ్ద కాల సమయాన్ని ఏఐ కేవలం కొన్ని వారాలకు కుదించగలదని హసాబిస్ పేర్కొన్నారు. ఇందుకు నిదర్శనంగా 20 కోట్లకు పైగా ప్రొటీన్ల నిర్మాణాలను అంచనా వేసిన ‘ఆల్ఫాఫోల్డ్’ (AlphaFold) సాధనాన్ని ఉదాహరణగా చూపిస్తున్నారు.

ఔషధ రంగ నిపుణులు ఏమంటున్నారు?

అయితే, ఏఐ నిపుణుల అంచనాలపై ఔషధ తయారీ సంస్థలు (Pharma Industry) అంతగా విశ్వాసం చూపడం లేదు. వెర్టెక్స్ ఫార్మాస్యూటికల్స్ ఎగ్జిక్యూటివ్ ఛైర్మన్ జెఫ్ లీడెన్ ఇటువంటి కాలపరిమితులను తీవ్రంగా తప్పుబట్టారు. సుమారు 10 వేల ఔషధ సమ్మేళనాలను (Drug Compounds) పరిశీలించేందుకు 50 ఏఐ సంస్థల సాంకేతిక పరిజ్ఞానాన్ని పరీక్షించామని, అయితే వాటిలో ఏ ఒక్కటి కూడా స్వతంత్రంగా ఒక ఔషధాన్ని విజయవంతంగా అభివృద్ధి చేయలేకపోయిందని వెల్లడించారు.

కంప్యూటర్ నమూనాలో (Computer Model) ఒక ఔషధ అణువు ఆశాజనకంగా కనిపించడం పరిశోధనలో అతిచిన్న తొలి అడుగు మాత్రమేనని నిపుణులు గుర్తుచేస్తున్నారు. ఆ తర్వాత సదరు ఔషధం సురక్షితమైనదా? కాదా? నిజంగా వ్యాధిని నయం చేస్తుందా? అన్నది నిర్ధారించేందుకు క్లినికల్ ట్రయల్స్, నియంత్రణ సంస్థల అనుమతులు తప్పనిసరి. సాంకేతికంగా ఏఐ వేగం పెంచినప్పటికీ, మానవ శరీరంపై జరిగే ప్రయోగాల సమయాన్ని కుదించడం సాధ్యం కాదని ఔషధ రంగానికి చెందిన శాస్త్రవేత్తలు స్పష్టం చేస్తున్నారు.