తెలంగాణలో తెరుచుకున్న పాఠశాలలు.. ప్రభుత్వ బడుల్లో బ్రేక్‌ఫాస్ట్‌ పథకం ప్రారంభించిన మంత్రి పొన్నం ప్రభాకర్‌..

తెలంగాణ రాష్ట్రవ్యాప్తంగా ప్రభుత్వ పాఠశాలలు పునఃప్రారంభమైన వేళ విద్యార్థులకు రాష్ట్ర ప్రభుత్వం తీపి కబురు అందించింది. పాఠశాలలు తెరుచుకున్న తొలిరోజే ప్రతిష్టాత్మకమైన ‘ముఖ్యమంత్రి అల్పాహార పథకం’ (Chief Minister’s Breakfast Scheme) అమల్లోకి వచ్చింది. హైదరాబాద్‌లోని రాజ్‌భవన్ ప్రభుత్వ పాఠశాలలో రాష్ట్ర రవాణా ,బీసీ సంక్షేమ శాఖ మంత్రి పొన్నం ప్రభాకర్ ఈ కార్యక్రమాన్ని అధికారికంగా ప్రారంభించారు. ఈ సందర్భంగా మంత్రి, ఉపాధ్యాయులు ,ఇతర సిబ్బంది స్వయంగా విద్యార్థులకు అల్పాహారాన్ని వడ్డించారు. ఈ పథకం ద్వారా రాష్ట్రవ్యాప్తంగా సుమారు 1.44 లక్షల మంది విద్యార్థులకు ప్రతిరోజూ పౌష్టికాహారంతో కూడిన అల్పాహారం అందనుంది.

రాష్ట్రంలోని మొత్తం 1,269 ప్రభుత్వ పాఠశాలల్లో ఈ అల్పాహార పథకాన్ని ప్రభుత్వం శ్రీకారం చుట్టింది. ఇందులో పాఠశాల విద్యార్థులతో పాటు ఇంటర్మీడియట్ చదువుతున్న విద్యార్థులను కూడా భాగస్వామ్యం చేయడం విశేషం. విద్యార్థులకు ఉదయాన్నే పౌష్టికాహారం అందించడం ద్వారా వారి ఆరోగ్యం మెరుగుపడటమే కాకుండా, చదువుపై ఏకాగ్రత పెరుగుతుందని ప్రభుత్వం భావిస్తోంది. కొత్త విద్యా సంవత్సరం ప్రారంభం కావడంతో పాఠశాలలన్నీ కొత్త పుస్తకాలు, ఏకరూప దుస్తులు (యూనిఫాం) ధరించిన చిన్నారులతో సందడిగా మారాయి. విద్యార్థుల ముఖాల్లో కొత్త ఉత్సాహం కనిపిస్తోంది.

అల్పాహారంతో పాటు, విద్యా సంవత్సరం మొదటి రోజే విద్యార్థులకు అవసరమైన పాఠ్యపుస్తకాలు ,నోట్ పుస్తకాల పంపిణీకి ప్రభుత్వం పక్కా ఏర్పాట్లు చేసింది. గతంలో పుస్తకాల పంపిణీలో జరుగుతున్న ఆలస్యానికి తావులేకుండా, బడి తెరిచిన రోజే చేతికి పుస్తకాలు అందేలా చర్యలు తీసుకోవడంపై విద్యార్థుల తల్లిదండ్రులు హర్షం వ్యక్తం చేస్తున్నారు. నాణ్యమైన విద్యతో పాటు, విద్యార్థుల కనీస అవసరాలను తీరుస్తూ ప్రభుత్వ పాఠశాలలను బలోపేతం చేయడమే లక్ష్యంగా ప్రభుత్వం ఈ దిశగా అడుగులు వేస్తోంది. దీనివల్ల ప్రభుత్వ పాఠశాలల్లో విద్యార్థుల నమోదు శాతం కూడా పెరిగే అవకాశం ఉందని విద్యాశాఖ అధికారులు ఆశాభావం వ్యక్తం చేస్తున్నారు.