హార్మూజ్‌ జలసంధి వద్ద భారతీయులున్న నౌకపై దాడి.. 24 మంది ప్రస్తుతం క్షేమంగానే ఉన్నారని తెలిపిన కేంద్రం..

హార్ముజ్ జలసంధికి దక్షిణంగా, ఒమన్ తీరంలో సోమవారం (జూన్ 8, 2026) మధ్యాహ్నం పలావు జెండాతో ప్రయాణిస్తున్న MT మారివెక్స్ (MT Marivex) అనే ఆయిల్ ట్యాంకర్‌పై జరిగిన దాడి అంతర్జాతీయంగా కలకలం రేపింది. ఈ నౌకలో 24 మంది భారతీయ సిబ్బంది ఉన్నట్లు కేంద్ర ప్రభుత్వం అధికారికంగా ధృవీకరించింది. మధ్యాహ్నం సుమారు 1:30 గంటల సమయంలో నౌకలోని ఇంజిన్ గదిలో భారీ పేలుడు సంభవించి మంటలు చెలరేగడంతో ఈ ప్రమాదం జరిగింది. ఆ సమయంలో నౌకలో ఎలాంటి సరుకు లేకపోవడం (Ballast condition) వల్ల పెను ప్రమాదం తప్పిందని ప్రాథమిక సమాచారం ద్వారా తెలుస్తోంది.

కేంద్ర నౌకాయాన మంత్రిత్వ శాఖ డైరెక్టర్ ఓపేష్ కుమార్ శర్మ ఈ ఘటనపై స్పందిస్తూ.. నౌకలోని 24 మంది భారతీయ సిబ్బంది ప్రస్తుతం క్షేమంగానే ఉన్నారని వెల్లడించారు. పేలుడు కారణంగా ఇంజిన్ గది దెబ్బతినడమే కాకుండా, నౌకలోని కంట్రోల్స్, లైఫ్ జాకెట్లు వంటి భద్రతా పరికరాలు కూడా పాక్షికంగా దెబ్బతిన్నట్లు సమాచారం. ప్రమాదం జరిగిన వెంటనే ఫార్వర్డ్ సీమెన్స్ యూనియన్ ఆఫ్ ఇండియా (FSUI) సామాజిక మాధ్యమాల వేదికగా భారత నౌకాదళం, విదేశీ వ్యవహారాల శాఖ సహాయాన్ని కోరింది.

ప్రస్తుతం భారత విదేశీ వ్యవహారాల శాఖ, ఒమన్‌లోని భారత రాయబార కార్యాలయం, భారత నౌకాదళం నిరంతరం సమన్వయం చేసుకుంటూ సహాయక చర్యలు చేపడుతున్నాయి. రాయబార కార్యాలయ అధికారులు ఇప్పటికే సిబ్బందితో నేరుగా మాట్లాడి వారి యోగక్షేమాలను అడిగి తెలుసుకున్నారు. ఈ పేలుడు ఏదైనా క్షిపణి లేదా డ్రోన్ దాడి వల్ల జరిగిందా అనే కోణంలో అధికారులు దర్యాప్తు జరుపుతున్నారు. ప్రాంతీయ ఉద్రిక్తతల నేపథ్యంలో ఈ ఘటన జరగడంతో, భారత ప్రభుత్వం సిబ్బందిని సురక్షితంగా వెనక్కి తీసుకురావడానికి, నౌకను సురక్షిత ప్రాంతానికి తరలించడానికి అన్ని చర్యలు తీసుకుంటోంది.