అమీర్పేటలో భారీ అగ్నిప్రమాదం: హెవీ ట్రాఫిక్జామ్.. మెట్రోసర్వీసులు బంద్
Ameerpet Fire Accident Triggers Massive Traffic Jam, Metro Services Suspended
హైదరాబాద్లోని ప్రముఖ వ్యాపార కేంద్రమైన అమీర్పేటలో గురువారం మధ్యాహ్నం ఘోర అగ్నిప్రమాదం సంభవించింది. మైత్రివనం సిగ్నల్కు అత్యంత సమీపంలో, అమీర్పేట మెట్రో స్టేషన్ పిల్లర్ నంబర్ 1043 వద్ద ఉన్న ‘కేఎస్సార్ షాపింగ్ మాల్’ (కేఎస్సార్ ఫ్యాషన్స్) కాంప్లెక్స్లో హఠాత్తుగా మంటలు చెలరేగాయి. శ్రీనివాసనగర్ వెస్ట్ కమాన్ను ఆనుకుని ఉన్న ఈ మాల్లో ప్రారంభమైన మంటలు నిమిషాల వ్యవధిలోనే వేగంగా వ్యాపిస్తూ పక్కనే ఉన్న దుకాణాలకు, ఓ మెస్కు కూడా అంటుకున్నాయి. ఈ ప్రమాదం కారణంగా అమీర్పేట-మైత్రివనం పరిసర ప్రాంతమంతా దట్టమైన నల్లటి పొగ అలుముకుంది.
ప్రమాద సమాచారం అందిన వెంటనే అగ్నిమాపక సిబ్బంది ఆరు ఫైరింజన్లు, వాటర్ ట్యాంకర్లతో ఘటనా స్థలానికి చేరుకుని మంటలను అదుపు చేసేందుకు రెస్క్యూ ఆపరేషన్ ప్రారంభించారు. అయితే, ఈ అగ్నిప్రమాదం మెట్రో ట్రాక్కు, పిల్లర్కు అత్యంత సమీపంలో జరగడం, మంటల సెగలు మెట్రో పిల్లర్కు కూడా అంటుకోవడంతో అధికారులు ముందస్తు జాగ్రత్తగా మెట్రో రైలు సేవలను తాత్కాలికంగా నిలిపివేశారు. మెట్రో సేవలకు అంతరాయం కలగడంతో ప్రయాణికులు తీవ్ర ఇబ్బందులు ఎదుర్కొన్నారు. ప్రమాద తీవ్రతను బట్టి భారీగానే ఆస్తి నష్టం వాటిల్లే అవకాశం కనిపిస్తోంది, అయితే ప్రమాదానికి గల ఖచ్చితమైన కారణాలు ఇంకా తెలియాల్సి ఉంది.
మరోవైపు, ఈ అగ్నిప్రమాదం, సహాయక చర్యల కారణంగా అమీర్పేట నుండి ఎస్సార్ నగర్ వెళ్లే ప్రధాన రహదారిపై వాహనాల రాకపోకలు పూర్తిగా స్తంభించిపోయి, భారీగా ట్రాఫిక్జామ్ అయ్యింది. ఈ ఉదంతంపై నగర పోలీస్ కమిషనర్ సి.వి. సజ్జనార్ ఎక్స్ (ట్విట్టర్) వేదికగా స్పందించారు. అమీర్పేట కెఎస్సార్ ఫ్యాషన్స్లో జరిగిన ప్రమాదం వల్ల అత్యవసర సహాయక చర్యలు కొనసాగుతున్నాయని, కాబట్టి వాహనదారులు ఎస్సార్ నగర్ వెళ్లే మార్గంలో ప్రయాణించకుండా ప్రత్యామ్నాయ మార్గాలను ఎంచుకోవాలని ఆయన విజ్ఞప్తి చేశారు. ప్రయాణికులు, వాహనదారులు రోడ్లపై విధుల్లో ఉన్న ట్రాఫిక్ పోలీసులకు మరియు అత్యవసర సేవల సిబ్బందికి సహకరించాలని కమిషనర్ కోరారు.
సంబంధిత వార్తలు
