Vijayasai Reddy: వైసీపీలో తీవ్ర అవమానాలు ఎదుర్కున్నా.. జగన్ నన్ను బలవంతంగా బయటకు పంపారు.. మాజీ ఎంపీ విజయసాయిరెడ్డి సంచలన వ్యాఖ్యలు..

Vijayasai Reddy: వైఎస్సార్ కాంగ్రెస్ పార్టీలో తాను తీవ్ర అవమానాలను ఎదుర్కొన్నానని మాజీ ఎంపీ, నూతనంగా స్థాపించిన ‘పరివర్తన రాజనీతి పార్టీ’ (PRP) అధినేత వి. విజయసాయిరెడ్డి అన్నారు. విజయవాడలో తన నూతన రాజకీయ పార్టీని అధికారికంగా ప్రకటించిన అనంతరం ఏర్పాటు చేసిన మీడియా సమావేశంలో ఆయన మాట్లాడారు. తాను వైసీపీని స్వచ్ఛందంగా వీడలేదని, తనను నిరంతరం అవమానించి బలవంతంగా పార్టీ నుంచి బయటకు పంపించారని ఆయన స్పష్టం చేశారు.

వైసీపీలో ఉన్న సమయంలో తాను 70కి పైగా తీవ్రమైన అవమానాలను భరించానని విజయసాయిరెడ్డి ఆవేదన వ్యక్తం చేశారు. ఒక సగటు మనిషి తట్టుకోలేని రీతిలో అక్కడ అవమానాలు జరిగాయని, ఆత్మగౌరవం దెబ్బతిన్న చోట ఎవరూ ఉండలేరని వ్యాఖ్యానించారు. వైసీపీ అధినేత వైఎస్ జగన్ మోహన్ రెడ్డి కొందరి చెప్పుడు మాటలు విని తనను తీవ్ర ఇబ్బందులకు గురిచేశారని విజయసాయిరెడ్డి ఆరోపించారు. ప్రారంభం నుంచి పార్టీ బలోపేతం కోసం ఎంతగానో శ్రమించిన తనను చివరకు అవమానకర రీతిలో బయటకు నెట్టేశారని పేర్కొన్నారు.

ఈ పరిణామాల నేపథ్యంలోనే ప్రజాస్వామ్య బద్ధంగా ప్రజలకు సేవ చేసేందుకు సరికొత్త రాజకీయ ప్రయాణానికి శ్రీకారం చుట్టినట్లు విజయసాయిరెడ్డి వెల్లడించారు. ఇప్పటికే ఆంధ్రప్రదేశ్ రాష్ట్రంలోని అన్ని జిల్లాల నుంచి కీలక వ్యక్తులు, సీనియర్ నాయకులు తమ కొత్త పార్టీలోకి చేరుతున్నారని తెలిపారు. రాబోయే రోజుల్లో ప్రజా సమస్యల పరిష్కారమే ఏకైక లక్ష్యంగా తమ పార్టీ ముందుకు సాగుతుందని ఆయన స్పష్టం చేశారు.