పులివెందుల ఆర్వో ఆఫిస్ ముందు జగన్ ధర్నా…రీపోలింగ్‌కు డిమాండ్
పులివెందుల ఆర్వో ఆఫిస్ వద్ద జగన్ ధర్నా...రీపోలింగ్‌కు డిమాండ్
వైఎస్ఆర్ జిల్లా పులివెందుల మున్సిపల్ ఎన్నికల పోలింగ్ తీవ్ర వివాదానికి దారితీసింది. ఎన్నికల ప్రక్రియలో అధికార పార్టీ నేతలు అక్రమాలకు పాల్పడుతున్నారని ఆరోపిస్తూ వైసీపీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి ఆందోళనకు దిగారు. రిటర్నింగ్ అధికారి కార్యాలయం ఎదుట తన పార్టీకి చెందిన ఏజెంట్లతో కలిసి ధర్నా చేపట్టారు. ఎన్నికల్లో ప్రజాస్వామ్య పద్ధతులు పాటించడం లేదని, ఓటర్లకు స్వేచ్ఛ లేకుండా చేస్తున్నారని ఆయన తీవ్రస్థాయిలో విమర్శించారు.
పులివెందులలో మొత్తం 80 పోలింగ్ బూత్‌లు ఉండగా, 70 బూత్‌ల నుంచి వైసీపీ ఏజెంట్లను బయటకు పంపించారని జగన్ ఆరోపించారు. కేవలం 10 పోలింగ్ కేంద్రాల్లో మాత్రమే తమ పార్టీ ఏజెంట్లు ఉన్నారని వెల్లడించారు. తెల్లవారుజామున 4 గంటల నుంచే పోలింగ్ కేంద్రాలను ఆక్రమించుకునే ప్రయత్నాలు జరిగాయని, టీడీపీకి చెందిన వ్యక్తులు బూత్ కబ్జాలకు పాల్పడుతున్నారని ఆరోపించారు.
అంతేకాకుండా, ఓటర్లు తమ ఓటు హక్కును వినియోగించుకోకుండా పోలీసులు దగ్గరుండి రిగ్గింగ్ చేయిస్తున్నారని జగన్ సంచలన వ్యాఖ్యలు చేశారు. పోలింగ్ కేంద్రాల్లో సీసీటీవీ కెమెరాలు కూడా ఏర్పాటు చేయలేదని విమర్శించారు. ఓటర్లు, ఏజెంట్లు మాత్రమే కాకుండా మీడియా ప్రతినిధులకు కూడా స్వేచ్ఛగా తిరిగే పరిస్థితి లేదని ఆగ్రహం వ్యక్తం చేశారు.
మరోవైపు, తన పులివెందుల పర్యటనను అడ్డుకునేందుకు కూడా కుట్ర జరిగిందని జగన్ ఆరోపించారు. తాను సగం దూరం ప్రయాణించిన తర్వాత హెలికాప్టర్ ల్యాండింగ్‌కు ఇచ్చిన అనుమతిని రద్దు చేశారని, తనను పులివెందులకు రాకుండా చేసేందుకు ప్రయత్నించారని అన్నారు. ఈ వ్యవహారంపై కూడా ఆయన తీవ్ర అసంతృప్తి వ్యక్తం చేశారు.
ఎన్నికల్లో జరుగుతున్నాయని చెబుతున్న అక్రమాలపై ఫిర్యాదు చేసేందుకు రిటర్నింగ్ అధికారి కార్యాలయానికి వెళ్తున్నట్లు జగన్ తెలిపారు. పులివెందులలో ప్రజాస్వామ్యం ఉందా? అంటూ ప్రశ్నించారు. రాష్ట్రంలో ప్రజాస్వామ్యం ప్రమాదంలో పడిందని, ఇలాంటి పరిస్థితుల వల్లే కాక్రోచ్‌లు, మావోయిస్టులు పుట్టుకొస్తున్నారంటూ వివాదాస్పద వ్యాఖ్యలు చేశారు.
పులివెందులలో ఎన్నికల నిర్వహణ తీరు బీహార్ పరిస్థితులను తలపిస్తోందని విమర్శించిన జగన్.. ఎన్నికల సంఘం వెంటనే స్పందించాలని కోరారు. పోలింగ్‌లో అక్రమాలు జరిగిన కేంద్రాల్లో ఎన్నికలను రద్దు చేసి తక్షణమే రీపోలింగ్ నిర్వహించాలని డిమాండ్ చేశారు. దీంతో పులివెందులలో ఎన్నికల వివాదం రాజకీయంగా మరింత వేడెక్కింది.
సంబంధిత వార్తలు
