ఢిల్లీలో INDIA కూటమి ‘చలో ఢిల్లీ’.. రామ్‌లీలా మైదాన్‌కు భారీగా చేరుకుంటున్న కార్యకర్తలు

ఓటర్ల జాబితా సవరణ (SIR)లో అక్రమాలు జరిగాయంటూ, ప్రధాన ఎన్నికల కమిషనర్ గ్యానేశ్ కుమార్ రాజీనామా చేయాలని డిమాండ్ చేస్తూ INDIA కూటమి నేడు ఢిల్లీలో భారీ నిరసన కార్యక్రమానికి సిద్ధమైంది. ‘ఓటును కాపాడండి.. దేశాన్ని కాపాడండి’ నినాదంతో రామ్‌లీలా మైదాన్‌లో బహిరంగ సభ నిర్వహించనున్నారు. ఉదయం నుంచే వివిధ రాష్ట్రాల నుంచి కార్యకర్తలు, మద్దతుదారులు సభా ప్రాంగణానికి చేరుకుంటున్నారు. ఢిల్లీ పోలీసుల డీసీపీ రోహిత్ రాజ్‌బీర్ తెలిపిన వివరాల ప్రకారం.. ఆదివారం ఉదయం 5.30 గంటల నుంచే ప్రజలు మైదానానికి రావడం ప్రారంభించారు.

మధ్యాహ్నం 12 గంటలకు ‘చలో ఢిల్లీ’ పాదయాత్ర

INDIA కూటమికి చెందిన ఎంపీలు ఉదయం 11 గంటలకు ఢిల్లీలోని కాన్‌స్టిట్యూషన్ క్లబ్ వద్ద సమావేశం కానున్నారు. అక్కడి నుంచి మధ్యాహ్నం 12 గంటలకు మింటో రోడ్–కనాట్ ప్లేస్ కూడలి నుంచి పాదయాత్ర ప్రారంభమవుతుంది. అజ్మేరీ గేట్ మీదుగా రామ్‌లీలా మైదాన్‌కు చేరుకోనుంది.

ఈ కార్యక్రమంలో రాహుల్ గాంధీ, మల్లికార్జున ఖర్గే, పశ్చిమ బెంగాల్ ముఖ్యమంత్రి మమతా బెనర్జీ, అభిషేక్ బెనర్జీ, జార్ఖండ్ ముఖ్యమంత్రి హేమంత్ సోరెన్, తెలంగాణ ముఖ్యమంత్రి రేవంత్ రెడ్డి, తేజస్వి యాదవ్, అఖిలేష్ యాదవ్ తదితర ప్రముఖ నేతలు పాల్గొనే అవకాశం ఉంది.

మోదీ, అమిత్ షాలకు గట్టి హెచ్చరిక: కేసీ వేణుగోపాల్

ఈ నిరసన కార్యక్రమంపై కాంగ్రెస్ ప్రధాన కార్యదర్శి కేసీ వేణుగోపాల్ కీలక వ్యాఖ్యలు చేశారు. సీఈసీ గ్యానేశ్ కుమార్ రాజీనామా కోసం నిర్వహిస్తున్న ఈ ఆందోళన ప్రధాని నరేంద్ర మోదీ, కేంద్ర హోంమంత్రి అమిత్ షాలకు గట్టి హెచ్చరిక అని అన్నారు.

నిరసనకు ప్రజల నుంచి వస్తున్న మద్దతును చూసి ప్రధాని, హోంమంత్రి తమ సంయమనం కోల్పోయారని వేణుగోపాల్ ఆరోపించారు. అందుకే ఆందోళనకారులను అరాచకవాదులుగా చిత్రీకరిస్తున్నారని, ఈ నిరసన పార్లమెంట్‌ను అవమానించడమేనంటూ వ్యాఖ్యలు చేస్తున్నారని విమర్శించారు.

గ్యానేశ్ కుమార్ తన పదవిలో కొనసాగలేరని, ఆయనను ఆ పదవి నుంచి తొలగించే వరకు పోరాటం కొనసాగిస్తామని వేణుగోపాల్ స్పష్టం చేశారు. ఈ కార్యక్రమం సజావుగా సాగేందుకు పోలీసులు సహకరిస్తే వారికే మంచిదని వ్యాఖ్యానించారు.

భారీ భద్రత.. ట్రాఫిక్ ఆంక్షలు

సభ, పాదయాత్ర నేపథ్యంలో ఢిల్లీలో భారీ భద్రతా ఏర్పాట్లు చేశారు. పోలీసు, కేంద్ర సాయుధ బలగాలతో కలిపి వేలాది మంది సిబ్బందిని మోహరించారు. ఢిల్లీ పోలీసుల అంచనా ప్రకారం సుమారు 50 వేల మంది సభకు హాజరుకావచ్చు. అయితే INDIA కూటమి మాత్రం దేశవ్యాప్తంగా దాదాపు 10 లక్షల మంది వస్తారని అంచనా వేస్తోంది.

ఉదయం 10 గంటల నుంచి సాయంత్రం 5 గంటల వరకు సభ నిర్వహించనున్నారు. ఈ సమయంలో మధ్య ఢిల్లీలోని పలు ప్రధాన రహదారులపై ట్రాఫిక్ ఆంక్షలు, వాహనాల మళ్లింపులు అమల్లో ఉంటాయి. ఐటీఓ, ఢిల్లీ గేట్, రాజ్‌ఘాట్, అజ్మేరీ గేట్ ప్రాంతాల్లో ప్రయాణించే వాహనదారులు ప్రత్యామ్నాయ మార్గాలను ఎంచుకోవాలని పోలీసులు సూచించారు.

ఎన్నికల జాబితాల సవరణలో అక్రమాలు జరిగాయన్న ఆరోపణలు, అర్హులైన ఓటర్ల పేర్ల తొలగింపు, ఎన్నికల సంఘం స్వతంత్రత వంటి అంశాలపై ప్రతిపక్షాలు తమ నిరసనను కొనసాగిస్తున్నాయి. నిన్న నిర్వహించిన ప్రతీకాత్మక ‘పబ్లిక్ ఇంపీచ్‌మెంట్’ తర్వాత నేడు రామ్‌లీలా మైదాన్‌లో జరిగే సభ ద్వారా తమ డిమాండ్లను మరింత బలంగా వినిపించేందుకు INDIA కూటమి సిద్ధమైంది.