Super El Niño Alert: భారత్‌కు ఎల్‌నినో ముప్పు? మార్చి 2027 నాటికి 55 వేల మరణాలు సంభవించే అవకాశం..

Super El Niño Alert: భారత్‌తో పాటు ప్రపంచ దేశాలను కలవరపెడుతున్న ఎల్‌నినో (El Nino) వాతావరణ ముప్పు, దాని ప్రభావం వల్ల తలెత్తబోయే ప్రాణనష్ట అంచనాలపై షికాగో విశ్వవిద్యాలయానికి చెందిన ‘క్లైమేట్ ఇంపాక్ట్ ల్యాబ్’ విడుదల చేసిన తాజా నివేదిక అత్యంత ప్రాధాన్యం సంతరించుకుంది. పసిఫిక్ మహాసముద్రంలో ఏర్పడే అసాధారణ ఉష్ణోగ్రతల మార్పుల కారణంగా ప్రపంచవ్యాప్తంగా వాతావరణ వ్యవస్థ తీవ్రంగా ప్రభావితమవుతుంది. ఈ నేపథ్యంలో రాబోయే నెలల్లో భారత్‌లో సంభవించే ఉష్ణోగ్రతల పెరుగుదల, వాటివల్ల ప్రజారోగ్యంపై పడే దుష్ప్రభావాల గురించి ఈ అధ్యయనం అనేక కీలక విషయాలను వెల్లడించింది.

ప్రపంచ వాతావరణ సంస్థ (WMO) హెచ్చరికల ప్రకారం ఈసారి ఎల్‌నినో ప్రభావం చాలా తీవ్రంగా ఉండే అవకాశం ఉంది. దీనివల్ల 2026 అక్టోబర్ నుంచి 2027 మార్చి వరకు ఉన్న కాలంలో ప్రపంచవ్యాప్తంగా సాధారణం కంటే అధిక వేడి నమోదై లక్షలాది మందిపై ప్రభావం చూపనుందని అంచనా వేశారు. ముఖ్యంగా అమెరికాలోని షికాగో యూనివర్సిటీ రీసెర్చర్లు రూపొందించిన ప్రత్యేక ట్రాకర్ నివేదిక ప్రకారం, భారత్‌లో ఈ ఆరు నెలల కాలంలో అధిక ఉష్ణోగ్రతల కారణంగా సాధారణ స్థాయికి మించి సుమారు 55 వేల మంది ప్రాణాలు కోల్పోయే ప్రమాదం ఉందని హెచ్చరిస్తున్నారు. ఇందులోనూ అత్యధిక మరణాలు మార్చి నెలలో సంభవించే అవకాశం ఉందని, ఎందుకంటే ఆ సమయంలో దేశంలో ఎండల తీవ్రత ఒక్కసారిగా పెరుగుతుందని నిపుణులు విశ్లేషిస్తున్నారు.

ఈ పరిశోధన కేవలం వాతావరణ సమాచారం, గత సంవత్సరాల ఉష్ణోగ్రత సరళి , మరణాల మధ్య ఉన్న గణాంక సంబంధాల ఆధారంగా రూపొందించిన నమూనా అంచనా మాత్రమేనని, ఇది కచ్చితమైన ప్రాణనష్టాన్ని నిర్ధారించదని పరిశోధకులు స్పష్టం చేశారు. అయినప్పటికీ, గ్లోబల్ వార్మింగ్ , ఎల్‌నినో సమ్మేళనం వల్ల ఏర్పడే ఈ ముప్పును తేలికగా తీసుకోలేమని హెచ్చరిస్తున్నారు. ప్రపంచవ్యాప్తంగా చూస్తే ఈ కాలంలో సుమారు 3.73 లక్షల మందికి పైగా అదనపు మరణాలు సంభవించవచ్చని, ఇందులో నైజీరియా తర్వాత భారత్ అత్యధికంగా ప్రభావితమయ్యే దేశాల జాబితాలో రెండో స్థానంలో ఉందని ఆందోళన వ్యక్తం చేశారు.

ఈ తీవ్ర వాతావరణ పరిస్థితుల వల్ల ముఖ్యంగా బహిరంగ ప్రదేశాల్లో పనిచేసే నిరుపేద కూలీలు, రైతులు, వృద్ధులు , సరైన రక్షణ వసతులు లేని వర్గాలు ఎక్కువగా నష్టపోయే ప్రమాదం ఉంది. అయితే, ఈ ముప్పును చూసి భయపడాల్సిన అవసరం లేదని, ప్రభుత్వాలు , అధికారిక యంత్రాంగాలు తగిన ముందస్తు జాగ్రత్తలు తీసుకోవడం ద్వారా ప్రాణనష్టాన్ని భారీగా తగ్గించవచ్చని నిపుణులు సూచిస్తున్నారు. ముఖ్యంగా ఎండ తీవ్రత ఎక్కువగా ఉండే ప్రాంతాల్లో చల్లదనం కల్పించే ప్రత్యేక కేంద్రాలు, సురక్షిత తాగునీటి సదుపాయాలు, బయట పనిచేసే కార్మికులకు తగిన పనివేళల సర్దుబాటు , ఆరోగ్య రక్షణ సేవలను మెరుగుపరచడం ద్వారా ఈ ప్రమాదం నుంచి ప్రజలను రక్షించవచ్చని నిపుణులు అభిప్రాయపడుతున్నారు.