మోదీ సర్కారు కీలక నిర్ణయం.. ఇథనాల్‌ పెట్రోల్‌పై ఎక్సైజ్‌ సుంకం మినహాయింపు!

పెట్రోల్‌లో అధిక శాతం ఇథనాల్‌ను కలిపిన ఇంధనాలకు కేంద్ర ప్రభుత్వం ఎక్సైజ్‌ సుంకం నుండి పూర్తి మినహాయింపునిచ్చింది. ముఖ్యంగా 22 శాతం నుండి 30 శాతం వరకు ఇథనాల్‌ మిశ్రమం ఉన్న ఈ22, ఈ25, ఈ27, మరియు ఈ30 రకాల పెట్రోల్ వేరియంట్లకు ఈ పన్ను మినహాయింపు వర్తించనుంది. దేశంలో పర్యావరణహిత స్వచ్ఛ ఇంధనాల వినియోగాన్ని ప్రోత్సహించడం, అంతర్జాతీయ మార్కెట్ నుండి ముడి చమురు దిగుమతులపై ఆధారపడటాన్ని గణనీయంగా తగ్గించడమే లక్ష్యంగా కేంద్ర ప్రభుత్వం ఈ కీలక నిర్ణయం తీసుకుంది.

ఇటీవలే బ్యూరో ఆఫ్ ఇండియన్ స్టాండర్డ్స్ (BIS) ఈ అధిక ఇథనాల్ మిశ్రమ ఇంధనాలకు సంబంధించి ఇథనాల్ శాతం, ఆక్టేన్ రేటింగ్, సల్ఫర్ పరిమితులు మరియు భద్రతా నిబంధనలతో కూడిన కొత్త నాణ్యత ప్రమాణాలను ప్రకటించింది. ఇప్పుడు వీటికి అదనంగా ఎక్సైజ్ సుంకం మినహాయింపు కూడా తోడవడంతో, దేశీయంగా ఈ ఇంధనాల ఉత్పత్తి మరియు వినియోగానికి అవసరమైన సాంకేతిక, ఆర్థిక మద్దతు లభించినట్లయింది.

భారతదేశంలో ఇథనాల్ బ్లెండింగ్ కార్యక్రమం వేగంగా విస్తరిస్తోంది. 2018 నాటి జాతీయ బయోఫ్యూయల్ విధానాన్ని 2022లో సవరించిన కేంద్రం, పెట్రోల్‌లో 20 శాతం ఇథనాల్ కలపాలనే ప్రతిష్టాత్మక లక్ష్యాన్ని 2030 నుండి 2025-26 ఆర్థిక సంవత్సరానికే ముందుకు జరిపింది. ప్రభుత్వ చమురు మార్కెటింగ్ సంస్థలు ఇప్పటికే 2022 జూన్ నాటికే 10 శాతం మిశ్రమ లక్ష్యాన్ని విజయవంతంగా చేరుకున్నాయి. ప్రారంభంలో ఇథనాల్ మిశ్రమాల వల్ల వాహనాల మైలేజ్ తగ్గుతుందని, ఇంజిన్ పనితీరు దెబ్బతింటుందని వాహనదారులు కొంత ఆందోళన వ్యక్తం చేసినప్పటికీ, ఈ20 ఇంధనం వల్ల ఎలాంటి భద్రతా సమస్యలు రావని వాహన తయారీ సంస్థల సంఘం (SIAM) స్పష్టం చేసింది. పూర్తిస్థాయి శాస్త్రీయ అధ్యయనం మరియు పరిశోధనల తర్వాతే ఈ నిర్ణయాలు తీసుకున్నట్లు కేంద్ర ప్రభుత్వం స్పష్టం చేయడంతో, దేశంలో అధిక శాతంతో కూడిన ఇథనాల్ ఇంధన విప్లవానికి మార్గం సుగమమైంది.