పంజాబ్‌లోని ఐదు ప్రధాన ఆలయాలకు బాంబు బెదిరింపులు..భారీ భద్రతా చర్యలు చేపట్టిన పోలీసులు..

పంజాబ్‌లోని ఐదు ప్రముఖ హిందూ దేవాలయాలకు గురువారం ఒక అనామక ఈమెయిల్ ద్వారా బాంబు బెదిరింపులు రావడం రాష్ట్రవ్యాప్తంగా తీవ్ర సంచలనం సృష్టించింది. కేవలం ఆలయాలనే కాకుండా, కొన్ని కీలక ప్రభుత్వ సంస్థలను కూడా బాంబులతో పేల్చివేస్తామని ఆ ఈమెయిల్‌లో దుండగులు హెచ్చరించారు. సరిగ్గా ఆపరేషన్ బ్లూ స్టార్ జరిగి 42 ఏళ్లు పూర్తికాబోతున్న తరుణంలో ఈ పరిణామాలు చోటుచేసుకోవడంతో పంజాబ్ ప్రభుత్వం, పోలీస్ యంత్రాంగం అత్యంత అప్రమత్తమయ్యాయి. రాష్ట్రంలో శాంతిభద్రతలకు విఘాతం కలగకుండా ఉండేందుకు భద్రతా బలగాలు తక్షణమే రంగంలోకి దిగి ముమ్మర తనిఖీలు చేపట్టాయి.

ఉగ్రవాదుల లక్ష్యంగా మారిన ఆ ఐదు దేవాలయాలలో అమృత్‌సర్‌లోని చారిత్రక దుర్గియానా ఆలయం, పఠాన్‌కోట్‌లోని ప్రసిద్ధ ముక్తేశ్వర్ ధామ్ ఆలయం, జలంధర్‌లోని 51 శక్తిపీఠాలలో ఒకటైన దేవీ తలాబ్ మందిర్, భటిండాలోని మైసర్ ఖానా ఆలయం మరియు పటియాలాలోని ప్రసిద్ధ మాతా కాళీ ఆలయం ఉన్నాయి. ఈ దేవాలయాలన్నీ పంజాబ్ సంస్కృతిలో, భక్తుల విశ్వాసాలలో ఎంతో కీలకమైనవి కావడంతో పోలీసులు ఈ బెదిరింపులను చాలా సీరియస్‌గా తీసుకున్నారు. బాంబు స్క్వాడ్, డాగ్ స్క్వాడ్ సిబ్బందితో కలిసి అన్ని ఆలయ పరిసరాలను క్షుణ్ణంగా తనిఖీ చేశారు.

ఇప్పటికే జలంధర్‌లోని దేవీ తలాబ్ ఆలయం వద్ద నిర్వహించిన ప్రాథమిక తనిఖీల్లో ఎలాంటి అనుమానాస్పద వస్తువులు లభించలేదని పోలీస్ ఉన్నతాధికారులు వెల్లడించారు. సమాజంలో భయాందోళనలు సృష్టించేందుకు, ప్రజలను భయపెట్టేందుకు ఎవరో కావాలనే చేసిన నకిలీ బెదిరింపుగా ఇది ప్రాథమికంగా కనిపిస్తున్నప్పటికీ, తాము ఎలాంటి రిస్క్ తీసుకోబోమని స్పష్టం చేశారు. భక్తుల రక్షణే ధ్యేయంగా ఆలయాల వద్ద భద్రతను గరిష్ట స్థాయికి పెంచినట్లు, ప్రతి ఒక్కరినీ నిశితంగా పరిశీలించిన తర్వాతే లోపలికి అనుమతిస్తున్నట్లు పేర్కొన్నారు.

ఈ ఉదంతం పంజాబ్‌లో ఇంతటి ఆందోళనకు కారణం కావడానికి బలమైన చారిత్రక నేపథ్యం ఉంది. 1984 జూన్ మొదటి వారంలో పంజాబ్‌లో ‘ఆపరేషన్ బ్లూ స్టార్’ పేరిట భారీ సైనిక చర్య జరిగింది. ఆ సమయంలో సిక్కుల కోసం ప్రత్యేక ‘ఖలిస్థాన్’ దేశం కావాలనే డిమాండ్‌తో వేర్పాటువాదం తీవ్రరూపం దాల్చింది. వేర్పాటువాద నేత జర్నైల్ సింగ్ భింద్రన్‌వాలే తన సాయుధ అనుచరులతో కలిసి అమృత్‌సర్‌లోని పవిత్రమైన స్వర్ణ దేవాలయం (గోల్డెన్ టెంపుల్) లోపల దాక్కున్నాడు. పవిత్రమైన ప్రార్థనాలయం నుండి ఉగ్రవాదులను, వారు దాచిన ఆయుధాలను ఏరిపారేయడానికి అప్పటి ప్రధానమంత్రి ఇందిరాగాంధీ ఆదేశాల మేరకు భారత సైన్యం ఈ ఆపరేషన్ చేపట్టింది.

మేజర్ జనరల్ కుల్దీప్ సింగ్ బ్రార్ నాయకత్వంలో కొనసాగిన ఈ ‘ఆపరేషన్ బ్లూ స్టార్’, భారత సైనిక చరిత్రలోనే అత్యంత క్లిష్టమైన, అతిపెద్ద అంతర్గత సైనిక చర్యల్లో ఒకటిగా నిలిచింది. ఆలయ ప్రాశస్త్యానికి భంగం కలగకుండా ఉగ్రవాదులను అణచివేయడానికి జరిగిన ఈ భీకర పోరాటంలో వేర్పాటువాద నేత భింద్రన్‌వాలేతో పాటు అతని ప్రధాన అనుచరులు హతమయ్యారు. అయితే, ఈ పోరాటంలో దేశ రక్షణ కోసం పోరాడిన 83 మంది భారత సైనికులు వీరమరణం పొందారు.

ఈ చారిత్రక ఘటన జరిగి 42 ఏళ్లు పూర్తవుతున్న తరుణంలో, ఖలిస్థాన్ అనుకూల శక్తులు లేదా సమాజ విద్రోహ శక్తులు ఏదైనా అలజడి సృష్టించే ప్రమాదం ఉందని నిఘా వర్గాలు ముందే హెచ్చరించాయి. ఈ నేపథ్యంలోనే ఆలయాలకు బాంబు బెదిరింపులు రావడంతో పంజాబ్ అంతటా నిఘాను మరింత కఠినతరం చేశారు. సరిహద్దులను సీల్ చేసి, అదనపు బలగాలను మోహరించారు. ప్రజలు ఎలాంటి పుకార్లను నమ్మవద్దని, దేవాలయాల సందర్శనకు వచ్చేవారు భద్రతా సిబ్బందికి సహకరించాలని అధికారులు విజ్ఞప్తి చేశారు.