Dussehra 2026: నవరాత్రుల్లో అమ్మవారి 9 అవతారాలు ఇవే.. శైలపుత్రి నుంచి సిద్ధిదాత్రి వరకు ఒక్కో రూపం విశిష్టత గురించి తెలుసా..

jagan 03 Oct 2026 1 నిమిషాల పఠనం లైఫ్ స్టైల్

Dussehra 2026

Dussehra 2026: నవరాత్రులు అంటే తొమ్మిది రోజుల పాటు దుర్గాదేవిని వివిధ రూపాల్లో ఆరాధించే పవిత్రమైన పర్వదినాలు. ఈ తొమ్మిది రోజుల్లో అమ్మవారిని నవదుర్గలుగా పూజిస్తారు. శైలపుత్రి నుంచి సిద్ధిదాత్రి వరకు ప్రతి రూపానికి ప్రత్యేకమైన పురాణ నేపథ్యం, ప్రతీకాత్మకత, ఆధ్యాత్మిక ప్రాధాన్యం ఉంది. భక్తుల విశ్వాసం ప్రకారం ఈ తొమ్మిది రూపాలు శక్తి, జ్ఞానం, ధైర్యం, కరుణ, విజయానికి ప్రతీకలుగా నిలుస్తాయి. తొమ్మది అవతారాల గురించి ఓ సారి తెలుసుకుందాం..

శైలపుత్రి

నవరాత్రుల మొదటి రోజున శైలపుత్రి దేవిని ఆరాధిస్తారు. ‘శైల’ అంటే పర్వతం. పర్వతరాజు హిమవంతుడి కుమార్తె కావడంతో ఆమెకు శైలపుత్రి అనే పేరు వచ్చింది. ఆమెను ఎద్దుపై ఆసీనురాలిగా, ఒక చేతిలో త్రిశూలం, మరో చేతిలో కమలం ధరించిన రూపంలో వర్ణిస్తారు. దుర్గాదేవి ఆరాధనకు శైలపుత్రి రూపంతో శ్రీకారం చుడతారు.

బ్రహ్మచారిణి

రెండో రోజు బ్రహ్మచారిణి దేవిని పూజిస్తారు. చేతిలో జపమాల, కమండలం ధరించిన ఈ రూపం తపస్సు, నియమం, ఆత్మనిగ్రహానికి ప్రతీకగా భావిస్తారు. పార్వతీదేవి శివుడిని భర్తగా పొందేందుకు కఠినమైన తపస్సు చేసిన రూపమే బ్రహ్మచారిణి అని పురాణాల్లో చెబుతారు. అందుకే ఈ రూపాన్ని ఆరాధించడం ద్వారా మనోధైర్యం, సహనం కలుగుతాయని భక్తుల విశ్వాసం.

చంద్రఘంట

నవరాత్రుల మూడో రోజు చంద్రఘంట దేవిని కొలుస్తారు. ఆమె నుదుటిపై గంట ఆకారంలో చంద్రుడు ఉండటంతో ఈ పేరు వచ్చింది. సింహంపై ఆసీనురాలిగా, అనేక ఆయుధాలు ధరించిన రూపంలో అమ్మవారిని వర్ణిస్తారు. చంద్రఘంట రూపం ధైర్యం, శౌర్యం, శత్రు సంహారానికి ప్రతీకగా భావిస్తారు.

కూష్మాండ

నాలుగో రోజు కూష్మాండ దేవిని పూజిస్తారు. సృష్టికి ఆది శక్తిగా ఈ రూపాన్ని భావిస్తారు. ఆమె చిరునవ్వుతో విశ్వాన్ని సృష్టించిందనే పురాణ విశ్వాసం ఉంది. ఎనిమిది చేతులతో దర్శనమిచ్చే ఈ రూపాన్ని ‘అష్టభుజ దేవి’ అని కూడా పిలుస్తారు. ఆరోగ్యం, శక్తి, ఐశ్వర్యానికి కూష్మాండ దేవి ప్రతీకగా భావిస్తారు.

స్కందమాత

ఐదో రోజు స్కందమాతను ఆరాధిస్తారు. కుమారస్వామి లేదా స్కందుడిని ఒడిలో ఉంచుకుని ఉండే రూపం కావడంతో ఆమెకు స్కందమాత అనే పేరు వచ్చింది. సింహంపై ఆసీనురాలిగా దర్శనమిచ్చే ఈ రూపం మాతృత్వం, ప్రేమ, కరుణకు ప్రతీక. భక్తులకు శాంతి, శుభం ప్రసాదిస్తుందని నమ్మకం.

కాత్యాయనీ

ఆరవ రోజు కాత్యాయనీ దేవిని పూజిస్తారు. మహర్షి కాత్యాయనుడి తపస్సు ఫలంగా దేవి ఈ రూపంలో అవతరించిందని పురాణ కథనం. మహిషాసురుడితో జరిగిన యుద్ధంలో కాత్యాయనీ రూపం కీలకమైనదిగా భావిస్తారు. అందువల్ల ఆమెను శక్తి, వీరత్వానికి ప్రతీకగా ఆరాధిస్తారు.

కాళరాత్రి

ఏడో రోజు కాళరాత్రి దేవి ఆరాధన జరుగుతుంది. రూపంలో ఉగ్రంగా కనిపించినప్పటికీ భక్తులకు అభయం ప్రసాదించే దేవతగా ఆమెను భావిస్తారు. దుష్టశక్తులను సంహరించే శక్తికి ప్రతీకగా కాళరాత్రి రూపాన్ని కొలుస్తారు. భయాలు, ప్రతికూలతలు తొలగిపోవాలని భక్తులు ఈ రోజున ప్రత్యేక పూజలు చేస్తారు.

మహాగౌరి

ఎనిమిదో రోజు మహాగౌరి దేవిని పూజిస్తారు. తెల్లని వర్ణంతో, శాంత స్వరూపిణిగా దర్శనమిచ్చే అమ్మవారి రూపమే మహాగౌరి. పవిత్రత, ప్రశాంతత, కరుణకు ఈ రూపం ప్రతీకగా భావిస్తారు. దుర్గాష్టమి సందర్భంగా అనేక ఆలయాల్లో మహాగౌరి ఆరాధనతో పాటు ప్రత్యేక పూజలు నిర్వహిస్తారు.

సిద్ధిదాత్రి

నవరాత్రుల తొమ్మిదో రోజు సిద్ధిదాత్రి దేవిని ఆరాధిస్తారు. ‘సిద్ధి’ అంటే ఆధ్యాత్మిక శక్తి లేదా సాధన ఫలితం. భక్తులకు వివిధ సిద్ధులను ప్రసాదించే దేవతగా ఆమెను పురాణాల్లో వర్ణిస్తారు. కమలంపై ఆసీనురాలిగా కనిపించే ఈ రూపంతో నవదుర్గల ఆరాధన పూర్తవుతుంది.

నవదుర్గల ఆరాధనలో అంతర్లీన సందేశం

నవదుర్గల తొమ్మిది రూపాలు కేవలం పూజా విధానాలకు మాత్రమే పరిమితం కావు. శక్తి, తపస్సు, ధైర్యం, సృజన, మాతృత్వం, విజయం, ప్రతికూలతలపై పోరాటం, పవిత్రత, ఆధ్యాత్మిక సిద్ధి వంటి విభిన్న లక్షణాలను ఈ రూపాలు ప్రతిబింబిస్తాయని భక్తులు విశ్వసిస్తారు. అందుకే నవరాత్రుల్లో ఒక్కో రోజూ ఒక్కో రూపాన్ని పూజించడం ద్వారా శక్తి స్వరూపిణి అయిన దుర్గాదేవిని సంపూర్ణంగా ఆరాధించినట్లు భావిస్తారు. తొమ్మిది రోజుల అనంతరం వచ్చే విజయదశమి చెడుపై మంచి సాధించిన విజయానికి ప్రతీకగా నిలుస్తుంది.