Passive Smoking in India: మీరు స్మోకింగ్ చేయకపోయినా ప్రమాదమే.. భారత్‌లో నాన్-స్మోకర్లకు పొంచి ఉన్న ముప్పు.. పాసివ్ స్మోకింగ్ పంజాతో ఏటా 3.25 లక్షల మంది బలి!

jagan 03 Oct 2026 1 నిమిషాల పఠనం లైఫ్ స్టైల్

Passive Smoking in India

Passive Smoking in India: సిగరెట్ తాగే వ్యక్తి వదిలే పొగ గాలిలో కలిసిపోతుందని భావిస్తే పొరపాటే. అది పక్కనున్న వారి ఊపిరితిత్తుల్లోకి చేరి, వారి ప్రాణాలను నిశ్శబ్దంగా హరిస్తోంది. పొగ తాగే అలవాటు లేకపోయినా, ఇతరులు వదిలిన పొగను పీల్చడం (సెకండ్ హ్యాండ్ స్మోకింగ్ లేదా పాసివ్ స్మోకింగ్) వల్ల కలిగే నష్టం ఊహించిన దానికంటే చాలా తీవ్రంగా ఉందని తాజా అధ్యయనాలు హెచ్చరిస్తున్నాయి. ప్రతిష్ఠాత్మక ‘ది లాన్సెట్ పబ్లిక్ హెల్త్’ జర్నల్‌లో ప్రచురితమైన ఒక అధ్యయనం ప్రకారం, కేవలం 2023 సంవత్సరంలోనే భారత్‌లో సుమారు 3.25 లక్షల మంది ఈ కారణంతో ప్రాణాలు కోల్పోయారు. 1990లో ఈ సంఖ్య 2.17 లక్షలుగా ఉండగా, మూడు దశాబ్దాల్లో మరణాలు దాదాపు 50 శాతం పెరగడం పరిస్థితి తీవ్రతకు అద్దం పడుతోంది.

గాంధీ జయంతిని పురస్కరించుకుని ‘టొబాకో ఫ్రీ ఇండియా’ సంస్థ అక్టోబర్ 2న నిర్వహించిన వెబినార్‌లో నీతి ఆయోగ్ మాజీ సభ్యుడు డాక్టర్ వీకే పాల్ పాల్గొని ఈ ఆందోళనకర గణాంకాలను పంచుకున్నారు. 1990లో దేశ జనాభాలో 43 శాతం మంది సెకండ్ హ్యాండ్ స్మోకింగ్‌కు గురైతే, 2023 నాటికి ఆ శాతం 31కి తగ్గింది. అయితే, దేశ జనాభా భారీగా పెరగడంతో బాధితుల సంఖ్య మాత్రం 37.5 కోట్ల నుంచి 44.4 కోట్లకు పెరిగిపోవడం ఆందోళన కలిగిస్తోంది. ప్రపంచవ్యాప్తంగా సెకండ్ హ్యాండ్ స్మోక్ వల్ల ఏటా 17 లక్షల మంది చనిపోతుండగా, ప్రపంచంలో చైనా (49.2 కోట్లు) తర్వాత అత్యధికంగా 44.4 కోట్ల మంది బాధితులతో భారత్ రెండో స్థానంలో నిలిచింది.

ఈ నిశ్శబ్ద మహమ్మారి కారణంగా పురుషులు, మహిళలు ఇద్దరూ తీవ్రంగా ప్రభావితమవుతున్నారు. 1990లో 1,13,400 మంది మహిళలు పాసివ్ స్మోకింగ్‌తో మరణించగా, 2023 నాటికి ఆ సంఖ్య 1,56,900కు చేరింది. ఇదే సమయంలో పురుషుల మరణాలు 1,04,300 నుంచి 1,68,700కు పెరిగాయి. ఈ అకాల మరణాల వల్ల దేశం ఏకంగా 9.28 మిలియన్ల ‘డిసెబిలిటీ-అడ్జస్టెడ్ లైఫ్ ఇయర్స్’ను (ప్రజలు ఆరోగ్యంగా గడపాల్సిన జీవితకాలం) కోల్పోయింది.

భారత్‌లో బహిరంగ ప్రదేశాల్లో పొగతాగడాన్ని నిషేధిస్తూ చట్టం వచ్చి 18 ఏళ్లు పూర్తయినప్పటికీ, క్షేత్రస్థాయిలో అమలు తీరు మందగించడంతో ఇళ్లు, కార్యాలయాలు, ప్రజా రవాణా వ్యవస్థల్లో మహిళలు, చిన్నారులు తీవ్ర అనారోగ్యానికి గురవుతున్నారు. ఈ ప్రమాదాన్ని నివారించేందుకు ప్రభుత్వం 100 శాతం పొగ రహిత ప్రజారోగ్య ప్రదేశాల నిబంధనలను కఠినంగా అమలు చేయాలని, అలాగే కుటుంబ సభ్యులు కూడా ఇళ్లలో పొగ తాగకుండా స్వచ్ఛందంగా జాగ్రత్తపడాలని నిపుణులు విజ్ఞప్తి చేస్తున్నారు.