ఖమేనీ అంత్యక్రియల షెడ్యూల్ ఖరారు..జూలై 4 నుంచి అంత్యక్రియలు, 9న అంతిమ సంస్కారాలు
Funeral for Iran’s Late Supreme Leader Ali Khamenei to Begin on July 4 in Tehran (Photo-AI Generated Image)
ఇరాన్ దేశాన్ని సుదీర్ఘ కాలం పాటు నడిపించిన మాజీ సుప్రీం లీడర్ అయతొల్లా అలీ ఖమేనీ అంత్యక్రియల అధికారిక షెడ్యూల్ ఎట్టకేలకు ఖరారైంది. వచ్చే నెల, అంటే జూలై 4వ తేదీ నుంచి రాజధాని టెహ్రాన్లో ఈ అంత్యక్రియల ప్రక్రియ ప్రారంభం కానుందని ఇరాన్ ప్రభుత్వ అధికారిక మీడియా ఆదివారం వెల్లడించింది.
ఖమేనీ సంస్మరణ బాధ్యతలను పర్యవేక్షిస్తున్న ప్రధాన కమిటీ విడుదల చేసిన ప్రకటన ప్రకారం.. జూలై 4, 5 తేదీల్లో టెహ్రాన్లోని ప్రసిద్ధ ఇమామ్ ఖమేనీ ముసల్లా ప్రార్థనా మందిరంలో ఆయన పార్థివ దేహానికి వీడ్కోలు వేడుకలు నిర్వహిస్తారు. ఆ తర్వాత జూలై 6, 7 తేదీల్లో రాజధాని టెహ్రాన్తో పాటు పవిత్ర నగరమైన కోమ్లలో భారీ అంతిమ యాత్రలు సాగుతాయి. చివరగా జూలై 9న దేశ ఈశాన్య ప్రాంతంలోని మషాద్ నగరంలో తుది వీడ్కోలు కార్యక్రమం ముగుస్తుంది. అదే రోజున షియా ముస్లింలు అత్యంత పవిత్రంగా భావించే ఎనిమిదో ఇమామ్ ‘ఇమామ్ రెజా’ పవిత్ర క్షేత్రంలో ఖమేనీ దేహాన్ని ఖననం చేయనున్నారు.
నిజానికి ఈ అంత్యక్రియల ప్రక్రియ మార్చి నెలలోనే జరగాల్సి ఉన్నప్పటికీ, అక్కడ నెలకొన్న యుద్ధ పరిస్థితుల కారణంగా ఇన్నాళ్లూ వాయిదా పడుతూ వచ్చింది. 86 ఏళ్ల వయసున్న అలీ ఖమేనీ, ఇరాన్పై దాదాపు 36 ఏళ్ల పాటు తిరుగులేని పాలన సాగించారు. అయితే ఫిబ్రవరి 28న అమెరికా, ఇజ్రాయెల్ సంయుక్తంగా జరిపిన భారీ వైమానిక దాడుల్లో ఆయన మరణించడంతో ఆ సుదీర్ఘ పాలనకు ముగింపు పడింది.
ఈ దారుణ దాడిలో ఖమేనీతో పాటు ఆయన కుమార్తె, మనవడు, అల్లుడు, మరో నలుగురు కుటుంబసభ్యులు కూడా ప్రాణాలు కోల్పోయారు. ఖమేనీ మరణం తర్వాత, మార్చి మొదటి వారంలోనే ఆయన కుమారుడు మొజ్తబా ఖమేనీ ఇరాన్ నూతన సుప్రీం లీడర్గా బాధ్యతలు స్వీకరించారు. తీవ్ర ఉద్రిక్తతల మధ్య ఎట్టకేలకు ఇరాన్ ప్రభుత్వం ఈ అంత్యక్రియల అధికారిక షెడ్యూల్ను ప్రకటించింది.
సంబంధిత వార్తలు
