Card Payment Alert: వినియోగదారులపై ఎండీఆర్ ఛార్జీల భారం వేయడానికి వీల్లేదు.. సుప్రీంకోర్టుకు ఎన్‌పీసీఐ అఫిడవిట్..

Card Payment Alert: యూనిఫైడ్ పేమెంట్స్ ఇంటర్‌ఫేస్ (UPI) ద్వారా జరిపే చెల్లింపులపై విధించే ‘మర్చంట్ డిస్కౌంట్ రేట్’ (MDR) ఛార్జీలను వ్యాపారులు వినియోగదారులపై (Consumers) బదిలీ చేయడానికి వీల్లేదని నేషనల్ పేమెంట్స్ కార్పొరేషన్ ఆఫ్ ఇండియా (NPCI) స్పష్టం చేసింది. రూ. 2,000 కంటే ఎక్కువ విలువైన నిర్దిష్ట యూపీఐ (P2M) లావాదేవీలపై ఎండీఆర్ ఛార్జీలు విధించే కేంద్ర నిర్ణయాన్ని సవాలు చేస్తూ దాఖలైన ప్రజా ప్రయోజన పిటిషన్‌పై, భారత ప్రధాన న్యాయమూర్తి (CJI) జస్టిస్ సూర్యకాంత్ నేతృత్వంలోని ధర్మాసనానికి ఎన్‌పీసీఐ ప్రతిస్పందన అఫిడవిట్ సమర్పించింది.

వినియోగదారులకు యూపీఐ సేవలు ఉచితం: నవంబరు 3న దాఖలు చేసిన అఫిడవిట్‌లో ఎన్‌పీసీఐ పలు కీలక అంశాలను పొందుపరిచింది.

ప్లాట్‌ఫామ్ ఫీజులపై నిషేధం: యూపీఐ అప్లికేషన్ ప్రొవైడర్లు (UPI App Providers) చెల్లింపులు జరిపే వినియోగదారుల నుంచి ఎలాంటి ప్లాట్‌ఫామ్ ఫీజులు లేదా అదనపు ఛార్జీలు వసూలు చేయకూడదని నిర్దేశించింది.

ఎండీఆర్ వ్యాపారులకే పరిమితం: ఎండీఆర్ అనేది వ్యాపార చెల్లింపుల వ్యవస్థకు సంబంధించింది మాత్రమే. వ్యాపారులు తమ ఉత్పత్తుల లేదా సేవల ధరలకు అదనంగా ఎండీఆర్ ఛార్జీలను వినియోగదారులపై వేయడానికి చట్టరీత్యా అనుమతి లేదు.

సాధారణ బదిలీలు ఉచితం: పర్సన్-టు-పర్సన్ (P2P) లావాదేవీలు, చిన్న వ్యాపారులకు (నెలవారీ రూ. 1 లక్ష వరకు యూపీఐ ఆమోదించేవారు) జరిగే లావాదేవీలపై ఎలాంటి ఎండీఆర్ వర్తించదు.

మధ్యంతర స్టేకు నిరాకరించిన సుప్రీంకోర్టు: రూ. 2,000 పైబడిన యూపీఐ చెల్లింపులపై 0.4% ఎండీఆర్ (గరిష్ట పరిమితి రూ. 300) విధించడాన్ని సవాలు చేస్తూ దాఖలైన పిటిషన్‌పై సెప్టెంబరు 28న విచారణ జరిపిన సుప్రీంకోర్టు, కేంద్ర ప్రభుత్వంతో పాటు ఎన్‌పీసీఐకి నోటీసులు జారీ చేసింది. అయితే పూర్తి విచారణ జరిపే వరకు సదరు విధానం అమలుపై మధ్యంతర స్టే (Interim Stay) ఇచ్చేందుకు సర్వోన్నత న్యాయస్థానం అప్పట్లోనే నిరాకరించింది. ఈ అంశంపై కేంద్ర ప్రభుత్వం కూడా సుప్రీంకోర్టులో డిజిటల్ చెల్లింపుల భద్రత, సైబర్ మౌలిక సదుపాయాల సమర్థవంతమైన నిర్వహణకే నిధుల అవసరం ఉందని అఫిడవిట్ ద్వారా సమర్థించుకుంది.