Cyclone Arnab Impact: అర్నాబ్ తుపాను పెను విలయం.. రూ. 4,600 కోట్ల ప్రాథమిక నష్టం, ఏడుగురు మృతి చెందినట్లు సీఎం చంద్రబాబు ప్రకటన

Cyclone Arnab Impact: ఆంధ్రప్రదేశ్ కోస్తా జిల్లాలను అతలాకుతలం చేసిన ‘అర్నాబ్’ తీవ్ర తుపాను రాష్ట్రంలో పెను విలయాన్నే మిగిల్చింది. ఈ తుపాను ధాటికి ప్రాథమిక అంచనాల ప్రకారమే సుమారు రూ. 4,600 కోట్ల మేర ఆస్తి, పంట నష్టం వాటిల్లగా, విషాదకరంగా ఏడుగురు ప్రాణాలు కోల్పోయారని రాష్ట్ర ముఖ్యమంత్రి నారా చంద్రబాబు నాయుడు అధికారికంగా వెల్లడించారు. తుపాను ప్రభావం అత్యంత తీవ్రంగా ఉన్న జిల్లాల్లో గురువారం హెలికాప్టర్ ద్వారా ఏరియల్ సర్వే నిర్వహించిన అనంతరం అమరావతిలో ఆయన మీడియాతో మాట్లాడారు.

బుధవారం మధ్యాహ్నం ఆంధ్రప్రదేశ్-యానాం తీరప్రాంతాన్ని దాటిన ఈ తీవ్ర తుపాను ధాటికి ఉమ్మడి ఉభయ గోదావరి, విశాఖపట్నం, కాకినాడ , డాక్టర్ బి.ఆర్. అంబేద్కర్ కోనసీమ జిల్లాలు తీవ్రంగా దెబ్బతిన్నాయి. కుండపోత వర్షాలు, గంటకు 100 కిలోమీటర్లకు పైగా వేగంతో వీచిన భీకర గాలుల ధాటికి వేలాది చెట్లు, విద్యుత్ పోల్స్ నేలకూలి మౌలిక సదుపాయాలు పూర్తిగా ధ్వంసమయ్యాయి. లక్షలాది ఎకరాల్లో పంట పొలాలు నీటమునిగాయి. ముఖ్యంగా ఒక్క కోనసీమ జిల్లాలోనే ఏకంగా 8,000 కు పైగా విద్యుత్ స్తంభాలు నేలమట్టం కావడం పరిస్థితి తీవ్రతకు అద్దం పడుతోందని సీఎం పేర్కొన్నారు. చీకట్లో అల్లలాడుతున్న ప్రాంతాల్లో విద్యుత్ పునరుద్ధరణను అత్యంత ప్రాధాన్య అంశంగా చేపట్టామని, ఇందుకోసం పొరుగున ఉన్న తెలంగాణతో పాటు అవసరమైతే ఇతర రాష్ట్రాల సాంకేతిక బృందాల సహాయం కూడా తీసుకుంటున్నామని వివరించారు.

ప్రభుత్వం పటిష్టమైన ముందస్తు చర్యలు చేపట్టి లక్షలాది మంది ప్రజలను సురక్షిత ప్రాంతాలకు, పునరావాస శిబిరాలకు తరలించినప్పటికీ ఏడుగురు ప్రాణాలు కోల్పోవడంపై ముఖ్యమంత్రి తీవ్ర దిగ్భ్రాంతి వ్యక్తం చేశారు. విద్యుత్ వైర్లు తెగిపడటం, మట్టి గోడలు కూలడం, చెట్లు విరిగిపడటంతోనే ఈ మరణాలు సంభవించాయని తెలిపారు. ముందస్తు అప్రమత్తత వల్లే భారీ ప్రాణనష్టాన్ని నివారించగలిగామని అభిప్రాయపడ్డారు. మృతుల కుటుంబాలకు తక్షణ ఆర్థిక సాయం, పునరావాస కేంద్రాల్లో ఉన్న బాధితులకు నిత్యవసర సరుకులు , దెబ్బతిన్న పంటలకు ఇన్‌పుట్ సబ్సిడీని త్వరితగతిన అందిస్తామని హామీ ఇచ్చారు.

తుపాను సృష్టించిన బీభత్సంపై కేంద్ర హోంశాఖ మంత్రి అమిత్ షాతో స్వయంగా మాట్లాడి రాష్ట్రంలోని పరిస్థితులను వివరించినట్లు చంద్రబాబు తెలిపారు. ఈ మేరకు ప్రాథమిక అంచనా నివేదికను కేంద్ర ప్రభుత్వానికి అందజేశారు. క్షేత్రస్థాయిలో నష్ట తీవ్రతను స్వయంగా పరిశీలించేందుకు శుక్రవారం కేంద్ర అధికారుల బృందం రాష్ట్రంలో విస్తృతంగా పర్యటించనుంది. పూర్తిస్థాయి సర్వే పూర్తయిన తర్వాత ఆస్తి, పంట నష్టాల తుది గణాంకాలపై సంపూర్ణ స్పష్టత వస్తుందని, బాధితులందరినీ ఆదుకుంటామని ప్రభుత్వం స్పష్టం చేసింది.