Bahuda River Overflow: అర్నబ్ తుపాను బీభత్సం.. ఉప్పొంగిన బహుదా, వంశధార నదులు.. జలదిగ్బంధంలో ఉత్తరాంధ్ర, నిలిచిపోయిన రైళ్లు..

Bahuda River Overflow: ‘అర్నాబ్’ తీవ్ర తుపాను సృష్టించిన బీభత్సానికి ఉత్తరాంధ్ర ప్రాంతం అతలాకుతలమవుతోంది. ఒడిశాతో పాటు శ్రీకాకుళం, పార్వతీపురం మన్యం, విజయనగరం జిల్లాల్లో ఎడతెరిపి లేకుండా కురిసిన భారీ వర్షాలకు ప్రధాన నదులన్నీ ఉగ్రరూపం దాల్చి ప్రమాదకర స్థాయిలో ప్రవహిస్తున్నాయి. ముఖ్యంగా బాహుదా నదికి మునుపెన్నడూ లేని రీతిలో ఏకంగా 86,458 క్యూసెక్కుల వరద నీరు వచ్చి చేరడంతో ఆంధ్రప్రదేశ్ , ఒడిశా రాష్ట్రాల మధ్య అంతర్రాష్ట్ర రవాణా వ్యవస్థ పూర్తిగా స్తంభించిపోయింది.

మరోవైపు వంశధార, నాగావళి, మహేంద్రతనయ, సువర్ణముఖి, వేగావతి నదులు పొంగిపొర్లుతున్నాయి. గొట్టా బ్యారేజ్ వద్ద వంశధార నది వరద ప్రవాహం 73,324 క్యూసెక్కులకు చేరుకోవడంతో అధికారులు మొదటి ప్రమాద హెచ్చరికను జారీ చేశారు. ఈ వరదల ధాటికి శ్రీకాకుళం జిల్లాలోని ఇచ్ఛాపురం, పలాస, మందస, పాతపట్నం నియోజకవర్గాలతో పాటు పార్వతీపురం మన్యం, విజయనగరం జిల్లాల్లోని వందలాది గ్రామాలు జలదిగ్బంధంలో చిక్కుకున్నాయి.

వరద ఉద్ధృతి కారణంగా ప్రాంతీయ , జాతీయ రవాణా వ్యవస్థలు తీవ్రంగా దెబ్బతిన్నాయి. ఇచ్ఛాపురం లొద్దపుట్టి వద్ద చెన్నై-కోల్‌కతా జాతీయ రహదారిపైకి భారీగా వరద నీరు చేరుకోవడంతో కిలోమీటర్ల మేర వాహనాలు నిలిచిపోయాయి. ఇచ్ఛాపురం-జడుపూడి స్టేషన్ల మధ్య రైల్వే ట్రాక్‌లు , వంతెన నిర్మాణ ప్రాంతాలు దెబ్బతినడంతో ఆ మార్గంలో రైళ్ల రాకపోకలను అధికారులు తాత్కాలికంగా నిలిపివేశారు. విశాఖ మన్యం ప్రాంతంలోని గాలికొండ వద్ద కొండచరియలు విరిగిపడటంతో అరకు-విశాఖ ఘాట్ రోడ్డును భద్రతా కారణ దృష్ట్యా మూసివేశారు. అలాగే బొర్రా-కారకవలస స్టేషన్ల మధ్య రైలు మార్గం దెబ్బతినడంతో కొత్తవలస-కిరండూల్ ప్యాసింజర్ రైలును నవంబర్ 3వ తేదీ వరకు రద్దు చేస్తున్నట్లు రైల్వే అధికారులు ప్రకటించారు.

వరద తీవ్రతకు వ్యవసాయ , ఉద్యానవన రంగాలు దారుణంగా దెబ్బతిన్నాయి. ప్రాథమిక అంచనాల ప్రకారం, ఒక్క శ్రీకాకుళం జిల్లాలోనే 728 గ్రామాల పరిధిలో సుమారు 21,590 హెక్టార్లలో వరి పంట, 383 హెక్టార్లలో ఉద్యాన పంటలు నీట మునిగి తీవ్రంగా ధ్వంసమయ్యాయి. బారువ వద్ద సముద్ర తీరప్రాంత కోత పెరగడంతో వందలాది కొబ్బరి తోటలు సముద్రంలో కలిసిపోయాయి. సోంపేట-బారువ ప్రధాన రహదారికి ఇరువైపులా ఉన్న పొలాల్లో సుమారు 7 కిలోమీటర్ల మేర 10 అడుగుల లోతున నీరు నిలిచి ఉండటంతో క్షేత్రస్థాయిలో పరిస్థితి ఎంత తీవ్రంగా ఉందో స్పష్టమవుతోంది. బాధితులను సురక్షిత ప్రాంతాలకు తరలించేందుకు అధికారులు సహాయక చర్యలను ముమ్మరం చేశారు.