US Education: ట్రంప్ దెబ్బకు అమెరికా చదువు అంటేనే భయపడుతున్న భారతీయులు.. ఈ ఏడాది 39 శాతం మేర పడిపోయిన భారత విద్యార్థుల సంఖ్య

US Education: ఉన్నత చదువుల కోసం అమెరికా వెళ్లే భారతీయ విద్యార్థుల సంఖ్యలో తీవ్రస్థాయిలో తగ్గుదల నమోదైంది. అమెరికా వాణిజ్య శాఖకు చెందిన ‘ఇంటర్నేషనల్ ట్రేడ్ అడ్మినిస్ట్రేషన్’ (ITA) విడుదల చేసిన నూతన అధికారిక గణాంకాల ప్రకారం.. గత ఏడాది ఆగస్టు నెలతో పోలిస్తే ఈ ఏడాది ఆగస్టులో ఎఫ్‌ (F), ఎం (M) కేటగిరీ వీసాలపై అమెరికాలో అడుగుపెట్టిన భారతీయ విద్యార్థుల సంఖ్య ఏకంగా 39 శాతం మేర పడిపోయింది. విదేశీ విద్యారంగంలో అగ్రస్థానంలో కొనసాగుతున్న అమెరికా వైపు చూడటానికి భారత విద్యార్థులు వెనుకంజ వేస్తున్నారనడానికి ఈ తీవ్ర క్షీణత స్పష్టమైన నిదర్శనంగా నిలుస్తోంది.

అమెరికాలో డోనాల్డ్ ట్రంప్ నాయకత్వంలోని ప్రభుత్వం అధికారం చేపట్టిన తర్వాత అమల్లోకి తెచ్చిన అత్యంత కఠినమైన ఇమ్మిగ్రేషన్ నిబంధనలే ఈ హఠాత్ క్షీణతకు ప్రధాన కారణమని విశ్లేషకులు స్పష్టం చేస్తున్నారు. ట్రంప్ పరిపాలన యంత్రాంగం విద్యార్థి వీసా దరఖాస్తుదారులకు సోషల్ మీడియా స్క్రీనింగ్‌ను (Social Media Screening) నిబంధనగా మార్చడంతో పాటు, దరఖాస్తుల తిరస్కార రేటును (Visa Rejection Rate) గణనీయంగా పెంచింది. దీనికి తోడు గ్రాడ్యుయేషన్ పూర్తి చేసిన తర్వాత లభించే పోస్ట్-స్టడీ వర్క్ పర్మిట్లపై (OPT) వేల డాలర్ల అదనపు రుసుములను ప్రతిపాదించడం, అలాగే ‘డ్యూరేషన్ ఆఫ్ స్టేటస్’ నిబంధనలను రద్దు చేస్తూ విద్యార్థుల కాలపరిమితిపై కఠిన ఆంక్షలు విధించడం వంటి నిర్ణయాలు విద్యార్థుల్లో తీవ్ర ఆందోళన నింపాయి.

చదువు ముగిసిన తర్వాత ఉద్యోగావకాశాలు , వీసా నిబంధనల విషయంలో నిలకడ లేని విధానాలు అవలంబిస్తుండటంతో అమెరికా విద్యా వ్యవస్థపై అంతర్జాతీయ విద్యార్థులకు, ముఖ్యంగా భారతీయులకు నమ్మకం క్రమంగా సడలుతోందని గ్లోబల్ ఎడ్యుకేషన్ కన్సల్టెంట్లు చెబుతున్నారు. అధిక తిరస్కార రేట్లు , వీసా ప్రాసెసింగ్ ఇంటర్వ్యూ స్లాట్లు సకాలంలో లభించకపోవడం వల్ల చాలామంది విద్యార్థులు తమ విదేశీ విద్యా లక్ష్యాల కోసం జర్మనీ, నెదర్లాండ్స్, ఫ్రాన్స్, స్పెయిన్, సింగపూర్ వంటి ప్రత్యామ్నాయ దేశాల వైపు మొగ్గు చూపుతున్నారని లేదా భారతదేశంలోని ప్రముఖ ప్రైవేట్ విశ్వవిద్యాలయాలలోనే ఉన్నత విద్యను కొనసాగిస్తున్నారని విద్యా నిపుణులు వెల్లడించారు.