France Travel Advisory: ఫ్రాన్స్‌లో మిన్నంటిన ఆందోళనలు.. భారతీయులు అప్రమత్తంగా ఉండాలని ఎంబసీ సూచన
France Riots
France Travel Advisory: పెరుగుతున్న నిత్యావసర వస్తువుల ధరలు, ద్రవ్యోల్బణం, విద్యుత్ ఛార్జీల భారం , మౌలిక వసతుల లేమికి నిరసనగా ఫ్రాన్స్ దేశవ్యాప్తంగా సాగుతున్న నిరసన ప్రదర్శనలు తీవ్ర హింసాత్మకంగా మారాయి. రాజధాని పారిస్‌తో పాటు మార్సెల్, లియోన్ వంటి ప్రధాన నగరాల్లో ఆందోళనకారులు దహనకాండలు, దోపిడీలకు పాల్పడటంతో అక్కడి స్థానిక ప్రభుత్వాలు రాత్రివేళల్లో ప్రత్యేక కర్ఫ్యూలు విధించాయి. దేశంలో నెలకొన్న ఈ అశాంతియుత, అభద్రతా పరిస్థితుల నేపథ్యంలో పారిస్‌లోని భారత రాయబార కార్యాలయం (Indian Embassy) ఫ్రాన్స్‌లోని భారతీయ పౌరులకు, విద్యార్థులకు , ఆ దేశానికి వెళ్లాలనుకుంటున్న పర్యాటకులకు అత్యవసర భద్రతా సూచనలు జారీ చేసింది.
ఆందోళనలు తీవ్రంగా జరుగుతున్న ప్రదేశాలు, జనాలు భారీగా గుమిగూడే ప్రాంతాలకు ఎట్టిపరిస్థితుల్లోనూ వెళ్లవద్దని భారత ఎంబసీ హెచ్చరించింది. స్థానిక ఫ్రెంచ్ ప్రభుత్వం వెలువరించే అధికారిక ప్రకటనలను నిరంతరం గమనిస్తూ, పారిస్ రవాణా వ్యవస్థ (RATP) నవీకరణలను పరిశీలించుకుని ప్రయాణాలు ప్లాన్ చేసుకోవాలని సూచించింది. అత్యవసర పరిస్థితుల్లో సహాయం కోసం భారత ఎంబసీ ప్రత్యేక హెల్ప్‌లైన్ నంబర్లను పంచుకుంటూ, భారత పౌరులంతా అత్యంత జాగరూకతతో ఉండాలని విజ్ఞప్తి చేసింది.
ఫ్రాన్స్‌లో చోటుచేసుకుంటున్న ఈ హింసాత్మక ఆందోళనలపై అమెరికా అధ్యక్షుడు డోనాల్డ్ ట్రంప్ చేసిన వివాదాస్పద వ్యాఖ్యలపై ఫ్రెంచ్ అధ్యక్షుడు ఇమాన్యుయేల్ మేక్రాన్ తీవ్ర స్థాయిలో విరుచుకుపడ్డారు. ఫ్రాన్స్ ప్రభుత్వం అవలంబిస్తున్న సడలించిన వలస విధానాలు, ముస్లిం వలసదారుల వల్లే దేశం తగలబడిపోతోందంటూ ట్రంప్ విమర్శలు గుప్పించగా, ఆ వ్యాఖ్యలను మేక్రాన్ తీవ్రంగా ఖండించారు. విదేశీ నేతలు తమ సొంత రాజకీయ ప్రచారాల కోసం, రాజకీయ లబ్ధి పొందడం కోసమే ఫ్రాన్స్ అంతర్గత విషయాలపై వ్యాఖ్యలు చేస్తున్నారని మండిపడ్డారు.
ట్రంప్ చేసిన వ్యాఖ్యలు ఎంతో మూర్ఖత్వంతో కూడుకున్నవని, వాటికి ఎలాంటి ప్రామాణికత లేదా ఆమోదయోగ్యత లేదని మేక్రాన్ స్పష్టం చేశారు. సోషల్ మీడియాలో కృత్రిమ మేధ (AI) ద్వారా రూపొందించిన నకిలీ దృశ్యాలను ప్రచారం చేస్తూ ఫ్రాన్స్‌పై అబద్ధాలు ప్రచారం చేస్తున్నారని ఆరోపించారు. ద్రవ్యోల్బణం, విద్యార్థుల సమస్యల నుంచి ఉద్భవించిన ఆందోళనలను పరిష్కరించేందుకు ప్రభుత్వం చర్యలు చేపడుతోందని, శాంతిభద్రతలకు విఘాతం కలిగించే అరాచక శక్తులపై కఠిన చర్యలు ఉంటాయని ఆయన తేల్చిచెప్పారు.
సంబంధిత వార్తలు
