DK Shivakumar: డీకే శివకుమార్, వీడీ సతీశన్‌లపై స్టింగ్‌ ఆపరేషన్ కుట్ర.. కర్ణాటక సీఎం సంచలన ఆరోపణలు.. ఉన్నత స్థాయి విచారణకు కాంగ్రెస్ ఆదేశం
DK Shivakumar
DK Shivakumar: కాంగ్రెస్ ముఖ్య నాయకులైన తన పైన, కేరళ అసెంబ్లీ ప్రతిపక్ష నాయకుడు వీడీ సతీశన్‌పైన రహస్యంగా స్టింగ్‌ ఆపరేషన్ నిర్వహించేందుకు కుట్రలు జరిగాయని కర్ణాటక ఉపముఖ్యమంత్రి డీకే శివకుమార్ ఆరోపించారు. అయితే అధికారంలో ఉన్న భారతీయ జనతా పార్టీ (బీజేపీ) లేదా దాని నేతృత్వంలోని ఎన్‌డీయే (NDA) మిత్రపక్షాలకు చెందిన ముఖ్యమంత్రులపై మాత్రం ఇటువంటి కుట్రపూరిత ప్రయత్నాలు జరగలేదని ఆయన విమర్శించారు. ఒక ప్రముఖ కన్నడ వార్తాసంస్థకు ఇచ్చిన ప్రత్యేక ఇంటర్వ్యూలో డీకే చేసిన ఈ వ్యాఖ్యలు కర్ణాటక రాజకీయాల్లో తీవ్ర కలకలం రేపాయి.
తనను కలవడానికి వచ్చిన ఒక వ్యాపారవేత్త మెటా (Meta) కంపెనీకి చెందిన అత్యాధునిక స్మార్ట్ గ్లాసెస్ (కండ్లద్దాలు) ధరించి రావడంతో తమ సంభాషణలను రహస్యంగా రికార్డ్‌ చేసే యత్నం జరిగి ఉండవచ్చనే అనుమానం తనకు కలిగిందని డీకే శివకుమార్ వెల్లడించారు. ఆ తర్వాత సదరు వ్యక్తి పూర్వాపరాలు, అతని కదలికలు , ఇతర ప్రముఖ రాజకీయ నాయకులతో అతను జరిపిన సమావేశాల గురించి సమగ్ర సమాచారం సేకరించాలని తాను అధికారులను ఆదేశించినట్లు చెప్పారు. తనను కలిసిన తర్వాత ఆ వ్యాపారవేత్త కేరళ కాంగ్రెస్ సీనియర్ నేత వీడీ సతీశన్‌తో సమావేశమైనప్పుడు కూడా అవే మెటా కండ్లద్దాలను ధరించి ఉన్నట్లు తమ పరిశీలనలో తేలిందని తెలిపారు. అయితే విచిత్రంగా ఆంధ్రప్రదేశ్‌ ముఖ్యమంత్రి ఎన్‌. చంద్రబాబు నాయుడు, మహారాష్ట్ర ముఖ్యమంత్రి దేవేంద్ర ఫడ్నవీస్‌, అలాగే ఒక కేంద్ర మంత్రితో భేటీ అయిన సమయంలో మాత్రం ఆ వ్యాపారవేత్త ఆ కండ్లద్దాలను ధరించలేదని డీకే వివరించారు.
కుట్రకు పాల్పడిన వారిపై తక్షణమే ఎందుకు చట్టపరమైన చర్యలు తీసుకోలేదని ప్రశ్నించగా.. భద్రతా అధికారులు అవసరమైన ముందస్తు జాగ్రత్తలు తీసుకున్నారని, అయితే ఆ సున్నితమైన వివరాలను ప్రస్తుతం వెల్లడించలేనని ఆయన స్పష్టం చేశారు. రాజకీయ ప్రత్యర్థులను ఇరికించేందుకు ఇటువంటి కార్యకలాపాల్లో పాల్గొనే అవకాశం ఉన్న వ్యక్తుల ముఠాల గురించి తనకు ముందే స్పష్టమైన సమాచారం అందిందని పేర్కొన్నారు. తన క్యాబినెట్‌ సహచరులు, ఇతర కాంగ్రెస్ నాయకులు తమ వ్యక్తిగత సహాయకులు, సందేహాస్పద ఫోన్‌కాల్స్‌ లేదా ఇతర మార్గాల ద్వారా ఉచ్చులో పడకుండా నిరంతరం జాగ్రత్తగా ఉండాలని ముందే హెచ్చరించినట్లు తెలిపారు.
ఉపముఖ్యమంత్రి డీకే శివకుమార్, కేరళ ప్రతిపక్ష నేత వీడీ సతీశన్‌లను లక్ష్యంగా చేసుకుని సాగిన ఈ స్టింగ్‌ ఆపరేషన్ యత్నాలపై కర్ణాటక రాష్ట్ర పోలీసుల ద్వారా ఉన్నత స్థాయి విచారణ జరిపించాలని కాంగ్రెస్ అధిష్టానం శుక్రవారం రాష్ట్ర పార్టీ నాయకత్వానికి, ప్రభుత్వానికి స్పష్టమైన సూచనలు చేసింది. ఈ స్టింగ్‌ ఆపరేషన్ కుట్రల వెనుక బీజేపీ హస్తం ఉందనే బలమైన అనుమానాన్ని కాంగ్రెస్ అధినాయకత్వం వ్యక్తం చేసింది. మెటా ఏఐ స్మార్ట్ గ్లాసెస్ ధరించి సీనియర్ నేతలపై గూఢచర్యానికి ఒడిగట్టారనే అంశాన్ని తీవ్రంగా పరిగణించిన కాంగ్రెస్, త్వరితగతిన విచారణ జరిపి నిజానిజాలను బయటపెట్టాలని నిర్ణయించింది.
సంబంధిత వార్తలు
