India’s Hidden Jobs Crisis: డిగ్రీలు ఉన్నాయి.. ఉద్యోగాలు లేవు.. ఇండియా ఆర్థిక వ్యవస్థలో కనిపించని జాబ్ సంక్షోభానికి కారణాలు ఇవే..

India’s Hidden Jobs Crisis: ప్రపంచంలోనే అత్యధిక యువ శ్రామిక శక్తి కలిగిన దేశంగా భారత్ సాధిస్తున్న ప్రగతిపై, 2045-2050 నాటి ‘వికసిత్ భారత్’ రూపకల్పనపై ప్రపంచవ్యాప్తంగా విస్తృత చర్చ జరుగుతోంది. అయితే, అంతకంటే ముందే దేశ ఆర్థిక భవిష్యత్తును తీవ్రంగా ప్రభావితం చేసే అత్యంత సవాలుతో కూడిన ‘ఉపాధి సంక్షోభం’ ఒక అదృశ్య ఆర్థిక టైమ్ బాంబ్‌లా భారత్‌ను వెంటాడుతోంది. ఐక్యరాజ్యసమితి (UN) తాజా నివేదిక ప్రకారం.. ప్రస్తుతం భారతదేశంలో 15 నుండి 29 సంవత్సరాల మధ్య వయస్సు గల యువకులు ఏకంగా 36.7 కోట్లకు పైగా ఉన్నారు. ఇది మొత్తం జనాభాలో దాదాపు 28 శాతానికి సమానమైనప్పటికీ, వీరికి తగిన ఉపాధి , నిరుద్యోగిత నివారణ లభించకపోవడం తీవ్ర ఆందోళన కలిగిస్తోంది.

దేశీయంగా ఏటా కనీసం కోటి కొత్త ఉద్యోగాలను సృష్టించాల్సిన అత్యవసర పరిస్థితి నెలకొంది. ప్రస్తుతం 22 నుండి 25 ఏళ్ల వయస్సులో ఉన్న యువత రాబోయే 6 నుండి 7 ఏళ్లలో 30 ఏళ్ల మైలురాయిని దాటనున్నారు. జీవితంలో ఎంతో కీలకమైన ఈ వ్యవధిలో యువతకు సరైన ఉద్యోగం, తగిన ఆదాయం, నైపుణ్యం లభించకపోతే, అది కేవలం వ్యక్తిగత కుటుంబాలపైనే కాకుండా దేశ ఆర్థిక వ్యవస్థలో వినియోగం, ఇళ్ల కొనుగోళ్లు, వివాహాలు , సామాజిక భద్రతను కుప్పకూల్చే ప్రమాదముంది. ప్రైవేట్ రంగం ఎంత వేగంగా విస్తరిస్తున్నప్పటికీ ప్రతి ఏటా కోటి మందికి అవకాశాలు ఇవ్వలేకపోవడంతో, యువత ఆశలన్నీ ప్రభుత్వ ఉద్యోగాలపైనే నిలుస్తున్నాయి. ఉదాహరణకు, కేవలం 15,118 పోస్టుల కోసం నిర్వహించిన SSC CGL పరీక్షకు 28 లక్షలకు పైగా అభ్యర్థులు పోటీ పడగా, ఆర్‌ఆర్‌బీ (RRB) పరీక్షలకు గత మూడున్నరేళ్లలో సుమారు 4 కోట్ల మంది హాజరు కావడమే దీనికి నిదర్శనం.

యువత తమ విలువైన 22 నుండి 30 ఏళ్ల వయస్సు వరకు పోటీ పరీక్షలకే వెచ్చిస్తూ, తుది ఎంపిక కాకపోవడంతో నైపుణ్య లోపం వల్ల పరిశ్రమల్లో ఇతర అవకాశాలు పొందలేక తీవ్ర నిరాశకు గురవుతున్నారు. సరిగ్గా ఇదే సమయంలో సర్వీస్ రంగాన్ని ఆర్టిఫిషియల్ ఇంటెలిజెన్స్ (AI) సాంకేతికత విప్లవాత్మకంగా మారుస్తూ అనేక సంప్రదాయ ఉద్యోగాలను ఆటోమేషన్ ద్వారా భర్తీ చేస్తోంది. మరోవైపు, పెద్ద ఎత్తున కార్మికులను శోషించుకునే సామర్థ్యం ఉన్న ఉత్పాదక రంగం (Manufacturing Sector) వాటా గత రెండు దశాబ్దాలుగా కేవలం 16-18 శాతానికే పరిమితం కావడం ఆందోళనకరంగా మారింది.

ఈ ఉపాధి గండం నుండి భారత్ బయటపడాలంటే కేవలం ఉచిత పథకాలు లేదా తాత్కాలిక నియామకాలు సరిపోవని, ఐదు కీలక సూత్రాలతో కూడిన వ్యూహం అవసరమని నిపుణులు స్పష్టం చేస్తున్నారు. మేక్ ఇన్ ఇండియా , ప్రొడక్షన్ లింక్డ్ ఇన్సెంటివ్ (PLI) పథకాలను ఎలక్ట్రానిక్స్, ఆటోమొబైల్, టెక్స్‌టైల్స్ రంగాలలో విస్తరించి ఉత్పాదక రంగ వాటాను కనీసం 25 శాతానికి పెంచాలి. అదేవిధంగా, ఏఐ, రోబోటిక్స్, గ్రీన్ ఎనర్జీ, సెమీకండక్టర్ తయారీ వంటి అభివృద్ధి చెందుతున్న రంగాల్లో విశ్వవిద్యాలయ స్థాయి నుంచే ఉచిత ప్రాక్టికల్ నైపుణ్య శిక్షణను అందించాల్సిన అవసరం ఉంది. దీనితో పాటు చిన్న, మధ్య తరహా పరిశ్రమలకు (MSME) రుణ ప్రాప్తిని పెంచడం, విదేశీ ప్రత్యక్ష పెట్టుబడులను (FDI) ప్రోత్సహించడం ద్వారా మాత్రమే భారత్ తన జనాభా ప్రయోజనాన్ని సంపూర్ణంగా ఉపయోగించుకోగలదు.