SIR Protests: ఢిల్లీ దిగ్బంధం…యోగేంద్ర యాదవ్‌, ప్రశాంత్‌ భూషణ్‌, విద్యార్థి నేత నేహా బోరా అరెస్ట్…

SIR Protests : ఢిల్లీలో జంతర్‌ మంతర్‌ 2.0 నిరసనకు వెళ్తున్న యోగేంద్ర యాదవ్‌, ప్రశాంత్‌ భూషణ్‌, దీపాంకర్‌ భట్టాచార్య, నేహా బోరాలను పోలీసులు అదుపులోకి తీసుకున్నారు. సీజేపీ నేతల నిర్బంధంతో రాజకీయ వేడి పెరిగింది.

SIR Protests: దేశ రాజధాని ఢిల్లీలో ఎస్‌ఐఆర్‌ (ఓటర్ల జాబితాల ప్రత్యేక సమగ్ర సవరణ)కు వ్యతిరేకంగా చేపట్టిన నిరసనలపై పోలీసుల ఆంక్షలు కొనసాగుతున్నాయి. జంతర్‌ మంతర్‌ వద్ద కాక్రోచ్‌ జనతా పార్టీ (సీజేపీ) తలపెట్టిన ‘జంతర్‌ మంతర్‌ 2.0’ ఆందోళనకు వెళ్తున్న సామాజిక కార్యకర్తలు యోగేంద్ర యాదవ్‌, ప్రశాంత్‌ భూషణ్‌, సీపీఐ (ఎంఎల్‌) లిబరేషన్‌ ప్రధాన కార్యదర్శి దీపాంకర్‌ భట్టాచార్య, విద్యార్థి నాయకురాలు నేహా బోరాలను శనివారం ఢిల్లీ పోలీసులు అదుపులోకి తీసుకున్నారు. ఐఎన్‌ఏ మార్కెట్‌ సమీపంలో ఈ ఘటన చోటుచేసుకుంది.

జోర్‌బాగ్‌ నుంచి ర్యాలీగా వస్తుండగా..

ఎన్నికల సంఘం చేపట్టిన ఎస్‌ఐఆర్‌ ప్రక్రియను వ్యతిరేకిస్తూ సీఈసీ జ్ఞానేశ్‌ కుమార్‌ రాజీనామా చేయాలని సీజేపీ నిరసనకు పిలుపునిచ్చింది. ఈ కార్యక్రమంలో పాల్గొనేందుకు యోగేంద్ర యాదవ్‌, ప్రశాంత్‌ భూషణ్‌, ఆల్‌ ఇండియా స్టూడెంట్స్‌ అసోసియేషన్‌ (ఐసా) నాయకురాలు నేహా బోరా జోర్‌బాగ్‌ నుంచి దిల్లీ హాట్‌–ఐఎన్‌ఏ వైపు ర్యాలీగా బయలుదేరారు. ఐఎన్‌ఏ మార్కెట్‌ సమీపంలో పోలీసులు వారిని అదుపులోకి తీసుకున్నారు.

యోగేంద్ర యాదవ్‌ ఎన్నికల విశ్లేషకుడిగా, గతంలో ఆమ్‌ ఆద్మీ పార్టీ నాయకుడిగా పనిచేశారు. న్యాయవాది ప్రశాంత్‌ భూషణ్‌ కూడా గతంలో అన్నా హజారే ఉద్యమంలో యోగేంద్ర యాదవ్‌తో కలిసి పనిచేశారు. వీరిద్దరూ నిరసనకు బయలుదేరిన దృశ్యాలు సామాజిక మాధ్యమాల్లో కనిపించాయి.

విమానంలోనే సీజేపీ నేతలను అదుపులోకి తీసుకున్న పోలీసులు

అంతకుముందు సీజేపీ వ్యవస్థాపకుడు అభిజీత్‌ దీప్కే, నాయకులు సౌరవ్‌ దాస్‌, ఆశుతోష్‌ రాంకాలను కూడా ఢిల్లీ పోలీసులు అదుపులోకి తీసుకున్నారు. ముంబై నుంచి ఢిల్లీకి వచ్చిన వారి విమానం ఇందిరా గాంధీ అంతర్జాతీయ విమానాశ్రయంలో దిగిన వెంటనే పోలీసులు విమానంలోకి ప్రవేశించి ముగ్గురినీ అదుపులోకి తీసుకున్నట్లు సమాచారం.

సీఈసీ జ్ఞానేశ్‌ కుమార్‌ రాజీనామా చేయాలని డిమాండ్‌ చేస్తూ సీజేపీ ఈ నిరసనకు పిలుపునిచ్చింది. ఎస్‌ఐఆర్‌ ప్రక్రియపై అభ్యంతరాలు వ్యక్తం చేస్తూ చేపట్టిన ఈ ఆందోళనకు వెళ్లే నాయకులను వరుసగా అదుపులోకి తీసుకోవడం రాజకీయంగా చర్చనీయాంశమైంది.

ఢిల్లీలో భద్రత కట్టుదిట్టం

జంతర్‌ మంతర్‌ నిరసనల నేపథ్యంలో ఢిల్లీలో పోలీసులు భారీ భద్రతా ఏర్పాట్లు చేశారు. కీలక ప్రాంతాల్లో బారికేడ్లు ఏర్పాటు చేయడంతో పాటు తనిఖీలను ముమ్మరం చేశారు. నిరసనకు అనుమతి నిరాకరించిన నేపథ్యంలో ఆందోళనకారులు అక్కడికి చేరకుండా చర్యలు చేపట్టారు.

మరోవైపు, నిరసన తెలిపే హక్కును అడ్డుకుంటున్నారంటూ ప్రతిపక్ష నాయకులు, కార్యకర్తలు విమర్శిస్తున్నారు. శాంతిభద్రతలను కాపాడేందుకు అవసరమైన చర్యలు తీసుకోవడం ఒకవైపు, ప్రజాస్వామ్యబద్ధంగా నిరసన తెలిపే హక్కును పరిరక్షించడం మరోవైపు కీలకంగా మారాయి. వరుసగా ప్రముఖ నాయకులను అదుపులోకి తీసుకోవడంతో జంతర్‌ మంతర్‌ 2.0 నిరసనపై ఉత్కంఠ నెలకొంది.