CJP Plan B: తగ్గేదే లే అంటున్న అజింక్య షిండే…అభిజిత్ అరెస్టుతో తెరపైకి వచ్చిన సీజేపీ కొత్త నాయకత్వం..(Video)

Who Is Ajinkya Shinde? ప్రధాన ఎన్నికల కమిషనర్ (CEC) జ్ఞానేశ్ కుమార్‌కు వ్యతిరేకంగా.. ఓటర్ల జాబితా ప్రత్యేక సమగ్ర సవరణ (SIR) ప్రక్రియలో జరిగాయని భావిస్తున్న అవకతవకలను నిరసిస్తూ కాక్రోచ్ జనతా పార్టీ (సీజేపీ) ఢిల్లీలోని జంతర్ మంతర్ వద్ద తలపెట్టిన ఆందోళన తీవ్ర ఉద్రిక్తతకు దారితీసింది.

ఆందోళనకారులు రాజధానికి చేరుకోకముందే పోలీసులు ముందస్తు అరెస్టులకు దిగారు. సీజేపీ వ్యవస్థాపకుడు, కీలక నేత అభిజీత్ దీప్కేతో పాటు సౌరవ్ దాస్, అశుతోష్ రాంకాలను.. వారు ప్రయాణిస్తున్న విమానం ఇందిరాగాంధీ అంతర్జాతీయ విమానాశ్రయంలో దిగగానే విమానంలోకే ప్రవేశించి అదుపులోకి తీసుకోగా, ప్రముఖ యూట్యూబర్ ధృవ్ రాథీని గురుగ్రామ్‌లోని ఆయన నివాసంలోనే పోలీసులు నిర్బంధించారు.

ఈ ఊహించని అరెస్టుల నేపథ్యంలో సీజేపీ వ్యూహాత్మకంగా వ్యవహరించింది. తాను అరెస్టు అయ్యే అవకాశం ఉందని ముందే ఊహించిన అభిజీత్ దీప్కే, ముందు రోజు రాత్రే రికార్డు చేసిన ఒక వీడియో సందేశాన్ని సామాజిక మాధ్యమం ‘X’ వేదికగా విడుదల చేశారు. తాను , తన సహచరులు కస్టడీలో ఉన్నంత కాలం జంతర్ మంతర్ వద్ద జరిగే నిరసన కార్యక్రమాలకు పార్టీ జాతీయ సంస్థాగత ఇన్‌చార్జి అజింక్య షిండే పూర్తి నాయకత్వం వహిస్తారని ఆ వీడియోలో స్పష్టం చేశారు. దీంతో ఈ కీలక సమయంలో ఆందోళన బాధ్యతలను భుజాన వేసుకున్న అజింక్య షిండే నేపథ్యం ప్రాధాన్యత సంతరించుకుంది.

అలీబాగ్‌కు చెందిన రైతు కుటుంబ నేపథ్యం ఉన్న అజింక్య షిండే.. కంప్యూటర్ సైన్స్‌లో పట్టభద్రుడై పూణేలోని ఒక బహుళజాతి ఐటీ కంపెనీలో ఉద్యోగం చేసేవారు. రాజకీయాలపై ఆసక్తితో మంచి జీతం వచ్చే ఉద్యోగాన్ని సైతం వదులుకుని ఆమ్ ఆద్మీ పార్టీ (ఆప్)లో చేరారు. 2016 గోవా అసెంబ్లీ ఎన్నికల సమయంలో అభిజీత్ దీప్కేతో ఏర్పడిన పరిచయంతో వారిద్దరి మధ్య మైత్రి బలపడింది. ఆ తర్వాత ఆప్ మహారాష్ట్ర యువజన విభాగానికి కన్వీనర్‌గా, జాతీయ సంస్థాగత నిర్మాణ బృంద సభ్యుడిగా సేవలందిస్తూ మహారాష్ట్రలోని ప్రతి జిల్లాలోనూ ఆప్ పునాదులను బలోపేతం చేయడంలో అజింక్య కీలక పాత్ర పోషించారు. పింప్రి-చించ్వాడ్‌లో పార్టీ బాధ్యతలు నిర్వహించిన ఆయనకు క్షేత్రస్థాయిలో టీమ్ బిల్డింగ్ , నిరసనల నిర్వహణలో విశేష అనుభవం ఉంది.

మరోవైపు, దేశ రాజధానిలో ఢిల్లీ పోలీసులు, కేంద్ర సాయుధ బలగాలకు చెందిన దాదాపు 40,000 మంది సిబ్బందిని మోహరించి రోడ్లపై స్పైక్ స్ట్రిప్స్, కట్టుదిట్టమైన బారికేడ్లతో నగర సరిహద్దులను దిగ్బంధించారు. కీలక నాయకులందరినీ పోలీసులు నిర్బంధించిన పరిణామాల మధ్య, జంతర్ మంతర్ వద్ద సీఈసీ జ్ఞానేశ్ కుమార్ రాజీనామా డిమాండ్‌తో జరుగుతున్న ఈ పోరాటాన్ని అజింక్య షిండే ఏ విధంగా ముందుకు తీసుకెళ్తారనేది ఇప్పుడు ఆసక్తికరంగా మారింది.