Hair Tips: ప్రతిరోజూ తలస్నానం చేయడం మంచిదేనా? వైద్య నిపుణులు ఏమంటున్నారు?

వర్షాకాలంలో జుట్టు సంబంధిత సమస్యలు ఎక్కువయ్యే అవకాశం ఉంటుంది. ముఖ్యంగా జుట్టు రాలడం, చుండ్రు, తల చర్మంపై దురద వంటి సమస్యలతో చాలా మంది వైద్యులను సంప్రదిస్తున్నారు. ఈ నేపథ్యంలో ప్రతిరోజూ తలస్నానం చేయడం వల్ల ఈ సమస్యలు తగ్గుతాయా? లేక మరింత పెరుగుతాయా? అనే సందేహం చాలామందిలో ఉంటుంది. దీనికి సమాధానం ప్రతి వ్యక్తి జుట్టు, తల చర్మం పరిస్థితిని బట్టి మారుతుందని కేశ నిపుణులు చెబుతున్నారు.

ముందుగా, రోజూ ఎక్కువ మొత్తంలో జుట్టు రాలుతోందా? లేక అప్పుడప్పుడు కొన్ని వెంట్రుకలు మాత్రమే రాలుతున్నాయా? అనే విషయాన్ని గమనించాలి. అలాగే మీ తల చర్మం జిడ్డుగా ఉందా? తరచూ బయటకు వెళ్తున్నారా? వంటి అంశాలు కూడా కీలకంగా ఉంటాయి.

మీకు జిడ్డుగల తల చర్మం ఉండి, ప్రతిరోజూ బయటకు వెళ్లాల్సి వస్తే రోజూ తలస్నానం చేయడంలో తప్పు లేదని నిపుణులు చెబుతున్నారు. అయితే, అలాంటి సందర్భాల్లో తేలికపాటి (మైల్డ్) షాంపూనే ఉపయోగించడం మంచిది. కఠినమైన రసాయనాలు ఉన్న షాంపూలను ప్రతిరోజూ ఉపయోగిస్తే జుట్టు పొడిబారడం, నిర్జీవంగా మారడం వంటి సమస్యలు తలెత్తుతాయి. అంతేకాదు, జుట్టు రాలడం మరింత పెరిగే అవకాశం కూడా ఉంటుంది.

ప్రతిరోజూ తలస్నానం చేయాల్సిన అవసరం లేనివారు ఎవరు?

యశోద మెడిసిటీ ఆస్పత్రి డెర్మటాలజీ విభాగానికి చెందిన డాక్టర్ కీర్తి మహేశ్వరి ప్రకారం, సాధారణ లేదా పొడి తల చర్మం ఉన్నవారు ప్రతిరోజూ షాంపూతో తలస్నానం చేయాల్సిన అవసరం లేదు. వారానికి రెండు నుంచి మూడు సార్లు తలస్నానం చేస్తే సరిపోతుంది. అయితే, వర్షంలో జుట్టు తడిస్తే మాత్రం ఇంటికి వచ్చిన వెంటనే శుభ్రమైన నీటితో జుట్టును కడుక్కోవాలని ఆమె సూచిస్తున్నారు. ఎందుకంటే వర్షపు నీటిలో కాలుష్యకారకాలు, ధూళి, ఇతర హానికర పదార్థాలు ఉండే అవకాశం ఉంది. అవి జుట్టు, తల చర్మానికి హాని కలిగించవచ్చు.

తలస్నానం చేసిన తర్వాత జుట్టును పూర్తిగా ఆరబెట్టాలి

వర్షాకాలంలో తలస్నానం చేయడం ఎంత ముఖ్యమో, జుట్టును పూర్తిగా ఆరబెట్టడం కూడా అంతే ముఖ్యమని డాక్టర్ కీర్తి మహేశ్వరి తెలిపారు. తడి జుట్టును ఎక్కువసేపు కట్టివేయడం లేదా కప్పి ఉంచడం వల్ల తల చర్మంలో తేమ నిల్వ ఉంటుంది. దీంతో చుండ్రు సమస్య పెరగడమే కాకుండా, కొందరిలో ఫంగల్ ఇన్ఫెక్షన్లు వచ్చే ప్రమాదం కూడా ఉంటుంది. అందుకే తలస్నానం చేసిన తర్వాత జుట్టును సహజంగా లేదా అవసరమైతే తక్కువ వేడితో పూర్తిగా ఆరబెట్టి, తలను పొడిగా ఉంచుకోవాలని నిపుణులు సూచిస్తున్నారు.