తెలంగాణ ఆర్టీసీ ఉద్యోగులకు గుడ్ న్యూస్.. జులై 1 నుంచి 11% ఫిట్మెంట్.. యూనియన్ ఎన్నికలకు లైన్ క్లియర్!
Telangana Minister Ponnam Prabhakar Hits Back at Pawan Kalyan Over Telangana Remarks
తెలంగాణ ఆర్టీసీ పురోగతి, భవిష్యత్ కార్యాచరణపై రవాణాశాఖ మంత్రి పొన్నం ప్రభాకర్ గురువారం సచివాలయంలో ఉన్నత స్థాయి సమీక్ష నిర్వహించారు. ప్రభుత్వం బాధ్యతలు స్వీకరించి 30 నెలలు పూర్తి చేసుకున్న సందర్భంగా నిర్వహించిన ఈ భేటీలో ఆర్టీసీ కార్మికులకు, సంస్థ అభివృద్ధికి సంబంధించి మంత్రి పలు కీలక నిర్ణయాలు ప్రకటించారు.
గతంలో ఆర్టీసీ సమ్మె సందర్భంగా ఉద్యోగులకు ఇచ్చిన హామీని నిలబెట్టుకుంటూ వేతన సవరణ (PRC)-2021 కింద ప్రకటించిన 11 శాతం ఫిట్మెంట్ను ఈ ఏడాది జులై 1వ తేదీ నుంచి పూర్తిస్థాయిలో అమలు చేయనున్నట్లు మంత్రి పొన్నం ప్రభాకర్ అధికారికంగా ప్రకటించారు. దీనితో పాటు ఆర్టీసీలో చాలా కాలంగా పెండింగ్లో ఉన్న గుర్తింపు సంఘాల (ట్రేడ్ యూనియన్) ఎన్నికల ప్రక్రియను ప్రారంభించాలని, ఇందుకు సంబంధించిన షెడ్యూల్ను తక్షణమే విడుదల చేయాలని అధికారులను ఆదేశించారు.
ఇటీవల ఆత్మహత్య చేసుకుని ప్రాణాలు కోల్పోయిన ఆర్టీసీ డ్రైవర్ శంకర్ కుటుంబానికి ప్రభుత్వం అండగా నిలిచింది. ఆర్టీసీ ఉద్యోగులందరి నుండి సేకరించిన విరాళాల ద్వారా సమకూరిన రూ. 1 కోటి రూపాయల ఆర్థిక సహాయం చెక్కుతో పాటు, ఆయన కుటుంబంలో ఒకరికి ఆర్టీసీలో ఉద్యోగం, అలాగే ప్రభుత్వ పక్షాన ఒక ఇందిరమ్మ ఇల్లు ఇవ్వాలని మంత్రి అధికారులకు స్పష్టమైన ఆదేశాలు జారీ చేశారు.
గడిచిన మూడేళ్ల కాలంలో (2023-2026 మధ్య) ఆర్టీసీ అభివృద్ధికి ప్రభుత్వం తీసుకున్న చర్యలను మంత్రి ఈ సందర్భంగా వివరించారు. ఈ కాలంలో ప్రభుత్వం రూ. 1,078 కోట్ల భారీ వ్యయంతో మొత్తం 2,815 నూతన బస్సులను కొనుగోలు చేసిందని తెలిపారు. సంస్థను మరింత బలోపేతం చేయడంలో భాగంగా ఏటూరునాగారం, పెద్దపల్లి ప్రాంతాలలో రెండు కొత్త బస్సు డిపోలను మంజూరు చేసినట్లు వెల్లడించారు. అలాగే గతంలో పేరుకుపోయిన పీఎఫ్ (PF) బకాయిలను రూ. 2,018.15 కోట్ల నుండి రూ. 1,714.39 కోట్లకు విజయవంతంగా తగ్గించగలిగామని మంత్రి పేర్కొన్నారు. గతంలో వివిధ కారణాల వల్ల సర్వీసు నుండి తొలగించబడిన 490 మంది ఉద్యోగులలో ఇప్పటికే 244 మందిని తిరిగి మానవతా దృక్పథంతో విధుల్లోకి తీసుకున్నట్లు ఆయన స్పష్టం చేశారు.
ప్రయాణికులకు మెరుగైన వసతులు కల్పించేలా వేములవాడ, కథలాపూర్, హుజూర్నగర్, కోదాడ, నాగర్కర్నూల్ ప్రాంతాలలో నిర్మించ తలపెట్టిన ఆధునిక బస్స్టేషన్ల పనులను వేగవంతం చేయాలని, వీటికి త్వరలోనే శంకుస్థాపనలు నిర్వహించేలా ఏర్పాట్లు చేయాలని పొన్నం ప్రభాకర్ అధికారులకు సూచించారు. ఈ సమీక్షా సమావేశంలో ఆర్టీసీ మేనేజింగ్ డైరెక్టర్ (MD) వై. నాగిరెడ్డితో పాటు ఎగ్జిక్యూటివ్ డైరెక్టర్లు (EDs) వెంకన్న, కుష్రోశాఖాన్, రాజశేఖర్, ఏ. శ్రీధర్ మరియు ఇతర ఉన్నతాధికారులు పాల్గొన్నారు.
సంబంధిత వార్తలు
