తెలంగాణలో జాతీయ రహదారి విస్తరణకు కేంద్ర కేబినెట్ ఆమోదం

తెలంగాణ రవాణా రంగానికి, మౌలిక వసతుల కల్పనకు కేంద్ర ప్రభుత్వం ఒక పెద్ద ఊరటనిచ్చింది. రాష్ట్రంలో మొత్తం 190.76 కిలోమీటర్ల పొడవున, రూ. 7,597.16 కోట్ల భారీ అంచనా వ్యయంతో రెండు ప్రధాన జాతీయ రహదారుల విస్తరణ ప్రాజెక్టులకు కేంద్ర మంత్రివర్గం బుధవారం అధికారికంగా ఆమోదం తెలిపింది.

ప్రధానమంత్రి నరేంద్ర మోదీ అధ్యక్షతన బుధవారం సమావేశమైన ఆర్థిక వ్యవహారాల కేబినెట్ కమిటీ (CCEA) ఈ కీలక నిర్ణయాన్ని తీసుకుంది. దీని ప్రకారం, తెలంగాణలోని జాతీయ రహదారి-63 (NH-63) లో ఉన్న ఆర్మూర్-జగిత్యాల-మంచిర్యాల విభాగాన్ని హైబ్రిడ్ యాన్యుటీ మోడల్ (HAM) పద్ధతిలో విస్తరించనున్నారు. అదేవిధంగా, జాతీయ రహదారి-563 (NH-563) పరిధిలోని జగిత్యాల-కరీంనగర్ విభాగాన్ని బిల్డ్-ఆపరేట్-ట్రాన్స్‌ఫర్ (BOT) పద్ధతిలో నాలుగు లేన్ల (4-Lane) రహదారిగా అభివృద్ధి చేసేందుకు కేంద్రం అనుమతులు మంజూరు చేసింది.

కేంద్ర ప్రభుత్వం విడుదల చేసిన అధికారిక ప్రకటన ప్రకారం, తెలంగాణలోని నిజామాబాద్, జగిత్యాల , మంచిర్యాల జిల్లాల గుండా వెళ్లే ఆర్మూర్-జగిత్యాల-మంచిర్యాల జాతీయ రహదారి విభాగం ప్రస్తుతం విపరీతమైన రద్దీతో కూడుకుని ఉంది. ఈ హైవే వెంబడి అంక్సాపూర్, కోరుట్ల, జగిత్యాల, ధర్మపురి, లక్షెట్టిపేట , మంచిర్యాల వంటి కీలకమైన నివాస ప్రాంతాలు, పట్టణాలు ఉండటంతో నిత్యం తీవ్రమైన ట్రాఫిక్ సమస్యలు తలెత్తుతున్నాయి. ఈ నేపథ్యంలో, కేంద్రం తీసుకున్న తాజా విస్తరణ నిర్ణయంతో ఈ ప్రాంతాల్లో ట్రాఫిక్ ఇబ్బందులు తొలగిపోవడమే కాకుండా, జిల్లాల మధ్య రవాణా సౌకర్యాలు మరింత మెరుగుపడనున్నాయి.