SIR Row: రాజ్‌ఘాట్‌కు రాహుల్ గాంధీ.. సీఈసీ జ్ఞానేష్ కుమార్‌పై విపక్షాల పోరు.. ఢిల్లీలో హైటెన్షన్….

SIR Row: ఎన్నికల ప్రక్రియలో అవకతవకలు జరిగాయంటూ కేంద్ర ఎన్నికల ప్రధాన కమిషనర్ (సీఈసీ) జ్ఞానేష్ కుమార్‌పై విపక్షాలు చేస్తున్న ఆందోళనలు మరింత ఉధృతమవుతున్నాయి. కాంగ్రెస్ అగ్రనేత, లోక్‌సభలో ప్రతిపక్ష నేత రాహుల్ గాంధీ రాజ్‌ఘాట్‌కు వెళ్లేందుకు సిద్ధమయ్యారు. సీఈసీ జ్ఞానేష్ కుమార్ రాజీనామా చేయాలని డిమాండ్ చేస్తూ ఇండియా కూటమి ఎంపీలు చేపట్టిన నిరసనల నేపథ్యంలో రాహుల్ గాంధీ రాజ్‌ఘాట్‌ వైపు వెళ్లనున్న విషయం రాజకీయంగా ప్రాధాన్యత సంతరించుకుంది.

బుధవారం జంతర్ మంతర్ వైపు చేపట్టిన ఇండియా కూటమి నిరసన ర్యాలీలో రాహుల్ గాంధీ, ప్రియాంక గాంధీ వాద్రా సహా పలువురు ప్రతిపక్ష నేతలను ఢిల్లీ పోలీసులు అదుపులోకి తీసుకున్నారు. అనంతరం వారిని విడుదల చేశారు. ఈ సందర్భంగా పోలీసులు ప్రతిపక్ష నేతల పట్ల వ్యవహరించిన తీరుపై కాంగ్రెస్ తీవ్ర అభ్యంతరం వ్యక్తం చేసింది.

రాహుల్ గాంధీ, ప్రియాంక గాంధీ సహా ప్రతిపక్ష నేతలను ఢిల్లీ పోలీసులు అడ్డుకోవడం, వారితో దురుసుగా వ్యవహరించారని ఆరోపిస్తూ కాంగ్రెస్ గురువారం దేశవ్యాప్తంగా నిరసనలు చేపట్టాలని తన రాష్ట్ర శాఖలకు పిలుపునిచ్చింది. గురువారాన్ని బ్లాక్ డేగా పాటించాలని, అన్ని రాష్ట్రాల్లో నిరసన కార్యక్రమాలు నిర్వహించాలని సూచించింది.

మరోవైపు ఢిల్లీలో ఇండియా కూటమి ఎంపీలు చేపట్టనున్న భారీ నిరసనకు ముందు జంతర్ మంతర్, పరిసర ప్రాంతాల్లో భద్రతను భారీగా పెంచారు. సీఈసీ జ్ఞానేష్ కుమార్ రాజీనామా చేయాలని, ఎన్నికల ప్రక్రియలో చోటుచేసుకున్నట్లు ఆరోపిస్తున్న అవకతవకలపై చర్యలు తీసుకోవాలని విపక్ష ఎంపీలు డిమాండ్ చేస్తున్నారు.

అక్టోబర్ 10న ప్రతిపాదించిన సీజేపీ నిరసన నేపథ్యంలోనూ ఢిల్లీ పోలీసులు అప్రమత్తమయ్యారు. రాజధానిలో అదనపు బలగాలను మోహరించడంతో పాటు నిఘాను మరింత కట్టుదిట్టం చేస్తున్నారు.

ఫేషియల్ రికగ్నిషన్ సిస్టమ్ ద్వారా గతంలో నేర చరిత్ర ఉన్నట్లు గుర్తించిన సుమారు 2,800 మందిపై ఢిల్లీ పోలీసులు ప్రత్యేకంగా దృష్టి సారించారు. వీరిలో ఎవరైనా అక్టోబర్ 10న జరిగే నిరసనకు ముందు న్యూఢిల్లీ జిల్లా వైపు ప్రయాణిస్తున్నారా అనే విషయాన్ని స్థానిక పోలీస్ స్టేషన్ల ద్వారా పరిశీలిస్తున్నారు.

అదేవిధంగా నిరసనకారులు ఢిల్లీకి చేరుకునే మార్గాలు, రవాణా ఏర్పాట్లపైనా పోలీసులు నిఘా పెట్టారు. పెద్ద సంఖ్యలో వ్యక్తులు ఒకేసారి ఢిల్లీకి తరలివచ్చే అవకాశాలపై ప్రత్యేకంగా దృష్టి సారిస్తున్నారు.

గతంలో జరిగిన సీజేపీ నిరసన సందర్భంగా రవాణా, ఇతర ఏర్పాట్లకు సహకరించిన బస్సు ఆపరేటర్లు, ఇతర సరఫరాదారుల వివరాలను కూడా పోలీసులు పరిశీలిస్తున్నారు. వారు మరోసారి నిరసనకు సంబంధించి సేవలు అందిస్తున్నారా అనే కోణంలో ఆరా తీస్తున్నారు.

బస్సుల బుకింగ్స్‌పై కూడా స్థానిక పోలీసులు వివరాలు సేకరిస్తున్నారు. ఎవరు బస్సులను బుక్ చేస్తున్నారు, ఎంతమంది ప్రయాణిస్తున్నారు, వారి గమ్యస్థానం ఏమిటి అనే అంశాలను పరిశీలిస్తున్నారు.

ముఖ్యంగా ఉత్తరప్రదేశ్ వైపు ఉన్న తూర్పు ఢిల్లీ, షాహదరా సరిహద్దులతో పాటు రాజస్థాన్ నుంచి నైరుతి ఢిల్లీ వైపు వచ్చే మార్గాలపై నిఘాను పెంచారు. నిరసనకారులు సంఘటితంగా ఢిల్లీలోకి ప్రవేశించే అవకాశం ఉన్న మార్గాలను పోలీసులు ప్రత్యేకంగా పర్యవేక్షిస్తున్నారు.

ఇదిలా ఉండగా, కర్ణాటకలోనూ సీఈసీ వ్యవహారంపై నిరసనలు కొనసాగుతున్నాయి. గురువారం బెంగళూరులో ‘పీపుల్స్ ట్రిబ్యునల్’ నిర్వహించనున్నట్లు నటుడు ప్రకాశ్ రాజ్ ప్రకటించారు. కర్ణాటకలో ఎస్ఐఆర్ కారణంగా నష్టపోయామని ఆరోపిస్తున్న బాధితులు ఈ కార్యక్రమంలో పాల్గొననున్నట్లు తెలిపారు. సీజేపీ వ్యవస్థాపకుడు అభిజీత్ దీప్కే, యూట్యూబర్ ధ్రువ్ రాఠీ కూడా ఈ కార్యక్రమానికి హాజరుకానున్నట్లు సమాచారం.

సీఈసీ జ్ఞానేష్ కుమార్ రాజీనామా చేయాలన్న డిమాండ్‌తో పాటు ఎన్నికల ప్రక్రియపై విపక్షాలు చేస్తున్న ఆరోపణల నేపథ్యంలో ఢిల్లీతో పాటు పలు రాష్ట్రాల్లో రాజకీయ వేడి మరింత పెరుగుతోంది.