Mamata Banerjee vs Rebels: దమ్ముంటే రాజీనామా చేసి బీజేపీ గుర్తుపై పోటీ చేసి గెలవండి.. తృణమూల్ కాంగ్రెస్ రెబల్ నేతలకు సవాల్ విసిరిన మమతా బెనర్జీ..

Mamata Banerjee vs Rebels: పశ్చిమ బెంగాల్ మాజీ ముఖ్యమంత్రి, తృణమూల్ కాంగ్రెస్ పార్టీ అధినేత్రి మమతా బెనర్జీ కోల్‌కతాలోని బిర్లా ప్లానెటేరియం సమీపంలో జరిగిన అమరవీరుల దినోత్సవ ర్యాలీలో తమ పార్టీ తిరుగుబాటు నాయకులపై తీవ్రస్థాయిలో విరుచుకుపడ్డారు. పార్టీకి వెన్నుపోటు పొడిచి బీజేపీకి మద్దతు పలికిన నాయకులందరినీ దొంగలుగా అభివర్ణించిన ఆమె, టీఎంసీ గుర్తుపై గెలిచి ద్రోహానికి పాల్పడ్డారని మండిపడ్డారు.

ధైర్యముంటే వారందరూ తమ పదవులకు రాజీనామా చేసి, బీజేపీ తరఫున నిలబడి ఎన్నికలలో పోటీ చేసి గెలవాలని బహిరంగ సవాలు విసిరారు. పార్టీని వీడి వెళ్లేవారి వల్ల తనకు ఎలాంటి అభ్యంతరం లేదని, అసలైన బలం కార్యకర్తలేనని చెబుతూ వారి స్థానాలను భర్తీ చేయడానికి తమ వద్ద చాలామంది నాయకులు సిద్ధంగా ఉన్నారని ధీమా వ్యక్తం చేశారు. అయితే, తమ తప్పును తెలుసుకుని తిరిగి పార్టీలోకి రావాలనుకునే వారికి తలుపులు తెరిచే ఉంటాయని స్పష్టం చేశారు.

ఈ సందర్భంగా బీజేపీ ప్రభుత్వంపై కూడా ఆమె తీవ్రమైన ఆరోపణలు చేశారు. ఈ అమరవీరుల దినోత్సవ కార్యక్రమాన్ని అడ్డుకునేందుకు ప్రత్యర్థులు కుట్రలు పన్నారని, సోమవారం రాత్రి సుమారు 600 మంది బైకర్లు తుపాకులతో వచ్చి సభ వేదికను ధ్వంసం చేయడానికి ప్రయత్నించారని వెల్లడించారు. తాము పోలీసులకు ఎన్నిసార్లు సమాచారం అందించినప్పటికీ వారి నుంచి ఎలాంటి సహాయం అందలేదని, ఈ నిర్లక్ష్యం వెనుక ఎవరి ఆదేశాలు పనిచేస్తున్నాయో అందరికీ తెలుసని ఆమె ఆరోపించారు.

తీవ్ర ప్రతికూలతల మధ్య కూడా తాను, అభిషేక్ బెనర్జీ మరియు ఇతర నాయకులు కలిసి షహీద్ దివస్ వేదికను కాపాడుకున్నామని తెలిపారు. వేలాదిగా తరలివచ్చిన మద్దతుదారుల నడుమ సాగిన ఈ ర్యాలీలో ఆమె మేనల్లుడు అభిషేక్ బెనర్జీ కూడా పాల్గొన్నారు.