Mallikarjun Kharge: ఇండియా కూటమి వెనక్కి తగ్గేది లేదు.. నవంబర్ 1న ఢిల్లీలో భారీ నిరసన చేపట్టి తీరుతామని తేల్చి చెప్పిన ఖర్గే..

Mallikarjun Kharge: ఎన్నికల సంఘం నిర్వహిస్తున్న ‘ప్రత్యేక సమగ్ర సవరణ’ (SIR) ప్రక్రియలో భారీ ఎత్తున ఓట్ల దొంగతనం , అక్రమాలు జరుగుతున్నాయని ఆరోపిస్తూ, నవంబర్ 1న ఢిల్లీలోని రాంలీలా మైదాన్‌లో నిర్వహించ తలపెట్టిన ‘వ్యాపార, ప్రజాస్వామ్య పరిరక్షణ’ మార్చ్‌ను వాయిదా వేసే ప్రసక్తే లేదని కాంగ్రెస్ జాతీయ అధ్యక్షుడు మల్లికార్జున ఖర్గే తెగేసి చెప్పారు. కేంద్ర ఎన్నికల కమిషన్ (CEC) ప్రధాన అధికారి జ్ఞానేశ్ కుమార్ వ్యవహరిస్తున్న తీరు ప్రజాస్వామ్యాన్ని, పౌరుల ప్రాథమిక ఓటు హక్కును కాలరాసేలా ఉందంటూ ఆయన మండిపడ్డారు. ఓటర్ల హక్కులను కాపాడటమే ధ్యేయంగా INDIA కూటమి భాగస్వామ్య పక్షాలన్నీ ఏకమై ఈ నిరసన పోరాటాన్ని ముందుకు తీసుకెళ్తున్నాయని ఖర్గే స్పష్టం చేశారు.

పండుగల సీజన్ , దివాళీ వ్యాపార వేళ ఢిల్లీలోని రాంలీలా మైదాన్ పరిసర ప్రాంతాల్లో లక్షలాది మందితో భారీ నిరసన ర్యాలీ నిర్వహిస్తే, రాకపోకలు స్తంభించి తమ వ్యాపార లావాదేవీలు తీవ్రంగా దెబ్బతింటాయని, జీవనోపాధిపై ప్రతికూల ప్రభావం పడుతుందంటూ పలు స్థానిక వ్యాపార సంఘాలు కాంగ్రెస్ అగ్రనేత రాహుల్ గాంధీకి విజ్ఞప్తి చేశాయి. ర్యాలీని మరో తేదీకి మార్చాలని కోరినప్పటికీ, పౌరుల ప్రజాస్వామ్య హక్కులను రక్షించడమే తమ ప్రధాన ప్రాధాన్యతని పేర్కొంటూ కాంగ్రెస్ నాయకత్వం ఈ విజ్ఞప్తులను తోసిపుచ్చింది. రాంలీలా మైదాన్‌లో నిర్ణీత షెడ్యూల్ ప్రకారమే నవంబర్ 1న ‘వ్యూహాత్మక ప్రతిఘటన సభ’ జరుగుతుందని తేల్చిచెప్పారు.

లోక్‌సభ ప్రతిపక్ష నేత రాహుల్ గాంధీ కూడా ఈ నిరసనలో పాల్గొనాలని దేశ ప్రజలకు, విద్యార్థి సంఘాలకు పిలుపునిచ్చారు. ఇది కేవలం ఒక రాజకీయ పార్టీ కి సంబంధించినది కాదని, రాజ్యాంగాన్ని, పౌరుల ఓటు హక్కును కాపాడుకోవడం కోసం ‘భారతదేశ ఆత్మ’ జరుపుతున్న ధర్మపోరాటమని అభివర్ణించారు. కాగా, ఈ నిరసన మహోద్యమానికి సన్నాహకంగా అక్టోబర్ 30న ఢిల్లీలోని కాంగ్రెస్ అధ్యక్షుడు మల్లికార్జున ఖర్గే నివాసంలో (10 రాజాజీ మార్గ్) ప్రత్యామ్నాయ ‘మాక్ పార్లమెంట్’ (జన మహాభియోగ కార్యక్రమం) నిర్వహించనున్నట్లు పార్టీ వర్గాలు వెల్లడించాయి. CEC జ్ఞానేశ్ కుమార్‌పై ప్రజాభియోగం మోపే లక్ష్యంతో ఏర్పాటు చేస్తున్న ఈ చర్చా కార్యక్రమంలో ఇండియా కూటమి ప్రతిపక్ష నేతలందరూ పాల్గొననున్నారు.