రోగుల భద్రతపై కేంద్రం కీలక నిర్ణయం.. 16 రకాల కాంబినేషన్ మందులపై తక్షణ నిషేధం.. సుప్రీంకోర్టు ఆదేశాలతో చర్యలు!

దేశంలో రోగుల భద్రతను మరింత బలోపేతం చేయడం ,ఔషధాల హేతుబద్ధ వినియోగాన్ని ప్రోత్సహించడమే లక్ష్యంగా కేంద్ర ప్రభుత్వం ఒక విప్లవాత్మక నిర్ణయం తీసుకుంది. దేశవ్యాప్తంగా విస్తృతంగా వినియోగంలో ఉన్న 16 రకాల ఫిక్స్‌డ్ డోస్ కాంబినేషన్ (FDC) మందుల తయారీ, అమ్మకం, పంపిణీ ,సరఫరాపై తక్షణమే నిషేధం విధిస్తున్నట్లు కేంద్ర ఆరోగ్య, కుటుంబ సంక్షేమ మంత్రిత్వ శాఖ శనివారం ఒక ప్రకటనలో వెల్లడించింది.

రెండు లేదా అంతకంటే ఎక్కువ ఔషధాల క్రియాశీలక పదార్థాలను (APIs) ఒక నిర్దిష్ట నిష్పత్తిలో కలిపి ఒకే మాత్ర లేదా సిరప్‌గా తయారు చేయడాన్ని ఫిక్స్‌డ్ డోస్ కాంబినేషన్ మందులు అంటారు. ఇటువంటి మందుల వాడకం వల్ల కలిగే ప్రయోజనాల కంటే ప్రజల ఆరోగ్యానికి పొంచి ఉన్న నష్టాలే ఎక్కువగా ఉన్నాయనే నిర్ధారణకు రావడంతో, డ్రగ్స్ అండ్ కాస్మెటిక్స్ చట్టం-1940లోని సెక్షన్ 26ఏ కింద ఈ కఠిన ఆదేశాలను జారీ చేశారు.

భారత మార్కెట్‌లో లభ్యమవుతున్న వివిధ రకాల కాంబినేషన్ మందుల భద్రతపై సమగ్ర సమీక్ష జరపాలని సుప్రీంకోర్టు గతంలో జారీ చేసిన కీలక ఆదేశాల మేరకు కేంద్ర ప్రభుత్వం ఈ తనిఖీ ప్రక్రియను చేపట్టింది. ఇందులో భాగంగా డ్రగ్స్ టెక్నికల్ అడ్వైజరీ బోర్డ్ (DTAB) ఒక ఉన్నత స్థాయి నిపుణుల కమిటీని ఏర్పాటు చేసింది. ఈ నిపుణుల కమిటీ దేశంలోని వివిధ ఎఫ్‌డీసీ మందులపై లోతైన శాస్త్రీయ విశ్లేషణలు జరిపి, వాటి చికిత్సా విలువలను అంచనా వేసింది.

అయితే, ప్రస్తుతం నిషేధానికి గురైన ఈ 16 రకాల మందుల కాంబినేషన్లకు ఎటువంటి శాస్త్రీయ లేదా చికిత్సాపరమైన హేతుబద్ధత (Therapeutic Justification) లేదని నిపుణులు తేల్చి చెప్పారు. ఈ మందుల నిరంతర వినియోగం వల్ల రోగులకు ఎలాంటి అదనపు ప్రయోజనం కలగకపోగా, అవి మానవ ఆరోగ్యానికి తీవ్రమైన హాని కలిగించే ప్రమాదం ఉందని కమిటీ తన నివేదికలో స్పష్టం చేసింది.

నిపుణుల కమిటీ సమర్పించిన శాస్త్రీయ సిఫార్సుల ఆధారంగానే కేంద్ర ప్రభుత్వం ఈ 16 రకాల ఔషధ కాంబినేషన్లను పూర్తిగా నిషేధించింది. ఈ నిషేధిత జాబితాలో ప్రధానంగా యాంటీబయాటిక్స్ ఆధారిత కాంబినేషన్లయిన అమోక్సిసిలిన్ విత్ సెర్రాటియోపెప్టిడేస్, సెఫురాక్సిమ్ విత్ సెర్రాటియోపెప్టిడేస్ వంటి మందులతో పాటు, తీవ్రమైన కడుపునొప్పి, కండరాల నొప్పుల నివారణకు వాడే యాంటిస్పాస్మోడిక్ ,పెయిన్ కిల్లర్ డ్రగ్స్ ఉన్నాయి. అంతేకాకుండా చర్మ రక్షణ, చర్మ వ్యాధుల చికిత్సకు ఉపయోగించే అలోవెరా (కలబంద) ఎక్స్‌ట్రాక్ట్, విటమిన్ ఈ, జోజోబా ఆయిల్ వంటి వివిధ రకాల డెర్మటలాజికల్ ఫార్ములేషన్లను కూడా తగిన శాస్త్రీయ ఆధారాలు లేవనే కారణంతో నిషేధించారు.

ప్రజలకు అత్యంత సురక్షితమైన, సమర్థవంతమైన ,అంతర్జాతీయ ప్రమాణాలతో ధ్రువీకరించబడిన మందులను మాత్రమే అందుబాటులో ఉంచేందుకు తమ ప్రభుత్వం కట్టుబడి ఉందని కేంద్ర ఆరోగ్య శాఖ స్పష్టం చేసింది. గతంలో కూడా ఇటువంటి హేతుబద్ధత లేని అనేక నిరుపయోగ కాంబినేషన్ మందులను క్షుణ్ణంగా సమీక్షించి నిషేధించిన విషయాన్ని ఈ సందర్భంగా గుర్తుచేసింది. తాజాగా విడుదలైన ప్రభుత్వ నోటిఫికేషన్ ప్రకారం, ఈ మందుల దిగుమతి, తయారీ ,పంపిణీ దేశవ్యాప్తంగా తక్షణమే నిలిచిపోవాల్సి ఉంటుంది.

ఈ నిషేధాజ్ఞలను అత్యంత కఠినంగా అమలు చేయాలని కేంద్రం అన్ని రాష్ట్రాల డ్రగ్ కంట్రోలర్లను, రెగ్యులేటరీ ఎన్ఫోర్స్‌మెంట్ ఏజెన్సీలను ఆదేశించింది. ఔషధ తయారీదారులు, ఫార్మా కంపెనీలు ,పంపిణీదారులు ఎవరైనా సరే వెంటనే ఈ కొత్త నిబంధనలకు అనుగుణంగా తగిన చర్యలు తీసుకోవాలని, నిబంధనలు ఉల్లంఘిస్తే చట్టపరమైన చర్యలు తప్పవని ప్రభుత్వం హెచ్చరించింది.