మీది ఒక ఫ్రాంకెన్‌స్టీన్ రాజ్యం.. ఐరాస వేదికగా పాకిస్తాన్ మీద నిప్పులు చెరిగిన భారత్..

ఐక్యరాజ్యసమితి (UN) వేదికగా భారత్ పొరుగుదేశమైన పాకిస్థాన్‌పై మరోసారి తీవ్రస్థాయిలో విరుచుకుపడింది. ఉగ్రవాదులకు ఆశ్రయం కల్పించడం, శిక్షణ ఇవ్వడం, వారిని ఇతర దేశాలపైకి ప్రయోగించడాన్ని ఒక ప్రభుత్వ విధానంగా మార్చుకున్న పాకిస్థాన్.. ఒక ‘ఫ్రాంకెన్‌స్టీన్ రాజ్యం’ (తన చేతులతో తానే సృష్టించుకున్న రాక్షసుడి చేతిలో వినాశనాన్ని కొనితెచ్చుకునే దేశం) అని భారత్ అభివర్ణించింది. తాను పెంచి పోషించిన ఉగ్రవాదమనే రాక్షసుడు ఇవాళ తననే తిరిగి కాటు వేస్తున్నప్పుడు పాకిస్థాన్ ఆశ్చర్యపోవడంలో అర్థం లేదని ఎద్దేవా చేసింది.

ఐక్యరాజ్యసమితి హైకమిషనర్ వార్షిక నివేదికపై జరిగిన ఇంటరాక్టివ్ డైలాగ్ సందర్భంగా పాకిస్థాన్, ఆర్గనైజేషన్ ఆఫ్ ఇస్లామిక్ కోఆపరేషన్ (OIC) ప్రతినిధులు జమ్మూ కాశ్మీర్ అంశాన్ని లేవనెత్తారు. దీనికి గట్టి కౌంటర్ ఇస్తూ, ఐక్యరాజ్యసమితిలోని భారత శాశ్వత మిషన్ ప్రథమ కార్యదర్శి అనుపమ సింగ్ తన ‘రైట్ ఆఫ్ రిప్లై’ (ప్రత్యుత్తర హక్కు) ద్వారా పాకిస్థాన్ చేసిన నిరాధారమైన, దురుద్దేశపూరితమైన ఆరోపణలను ఖచ్చితంగా ఖండించారు. జమ్మూ కాశ్మీర్ గతంలోనూ, ఇప్పుడు, ఎప్పటికీ భారతదేశంలో ఒక విడదీయరాని, అంతర్భాగంగానే ఉంటుందని ఆమె స్పష్టం చేశారు. ఈ విషయంలో తేలాల్సిన ఏకైక పరిష్కారం.. పాకిస్థాన్ అక్రమంగా ఆక్రమించుకున్న భారత భూభాగాలను తిరిగి భారత్‌కు అప్పగించడమేనని తేల్చి చెప్పారు.

పాకిస్థాన్ ప్రస్తుత రక్షణ మంత్రి ఉగ్రవాదులను మోహరించడం వంటి చర్యలను ప్రభుత్వ విధానంగా గొప్పలు చెప్పుకుంటున్నారని, అయినప్పటికీ ఆ దేశం అంతర్జాతీయ వేదికలపై తనను తాను ఉగ్రవాద బాధిత దేశంగా చిత్రీకరించుకోవడం కేవలం పాకిస్థాన్‌కు మాత్రమే సాధ్యమయ్యే ఒక పెద్ద పరస్పర విరుద్ధమైన నిజం అని అనుపమ సింగ్ దుయ్యబట్టారు. చట్టవిరుద్ధమైన ఆక్రమణలను కేవలం బలప్రయోగం, క్రూరత్వంతోనే కొనసాగించగలరని, అందుకే పాకిస్థాన్‌లో ప్రజలు రొట్టె, విద్యుత్, ప్రాథమిక హక్కులు మరియు కనీస గౌరవం కోరినా కూడా వారిని తూటాలతో అణచివేస్తున్నారని ఆమె ఆవేదన వ్యక్తం చేశారు.

ఇదే తరుణంలో పాకిస్థాన్‌తో ఉన్న సింధు జలాల ఒప్పందాన్ని ప్రస్తావిస్తూ అది “కాలం చెల్లిపోయిన ఒప్పందం” అని భారత్ స్పష్టం చేసింది. ఉగ్రవాదాన్ని ఒక విధాన సాధనంగా ఎగుమతి చేసే దేశం.. సద్భావన, స్నేహంపై ఆధారపడిన సహకార హక్కులను కోరడం హేతుబద్ధతకు పూర్తిగా విరుద్ధమని అనుపమ సింగ్ పేర్కొన్నారు. 2025 ఏప్రిల్‌లో 26 మంది పౌరుల ప్రాణాలను బలిగొన్న పహల్గామ్ ఉగ్రదాడి తర్వాత దశాబ్దాల నాటి ఈ ఒప్పందాన్ని నిలిపివేసిన సంగతిని ఈ సందర్భంగా గుర్తుచేశారు.

1960లో ప్రపంచ బ్యాంకు మధ్యవర్తిత్వంతో కుదిరిన ఈ ఒప్పందం గత ఆరు దశాబ్దాలుగా నదీ జలాల పంపిణీని నియంత్రిస్తున్నప్పటికీ, ప్రస్తుత మారుతున్న ప్రపంచ వాస్తవాలకు ఇది దూరంగా ఉందని భారత్ అభిప్రాయపడింది. ఏ సాంకేతిక ఏర్పాటు కూడా కాలంలో స్తంభించిపోదని, దీనిని జవాబుదారీతనం నుండి వేరుచేసి చూడలేమని దౌత్యవేత్త స్పష్టం చేశారు. ఇతరుల భూభాగాలపై ఆశలు పెంచుకోవడం మానేసి, పాకిస్థాన్ మొదట తన సొంత అంతర్గత వ్యవహారాలను చక్కదిద్దుకుంటే ఆ దేశ ప్రజలకు ఎంతో మేలు జరుగుతుందని భారత్ హితవు పలికింది.