Eiffel Tower: ఈఫిల్ టవర్ వద్ద లింగ వివక్ష వివాదం.. మహిళా ఉద్యోగులను పక్కకు తప్పించడంపై సిబ్బంది ఆగ్రహం..

jagan 08 Sep 2026 1 నిమిషాల పఠనం ప్రపంచం

Eiffel Tower

Eiffel Tower Row: ప్రపంచ ప్రఖ్యాత పర్యాటక కేంద్రమైన పారిస్ ఈఫిల్ టవర్ వద్ద చోటుచేసుకున్న ఓ వివాదం అంతర్జాతీయంగా చర్చకు దారితీసింది. బోచసన్వాసి అక్షర్ పురుషోత్తం స్వామినారాయణ సంస్థ (BAPS)కు చెందిన ప్రతినిధి బృందం పర్యటన సందర్భంగా మహిళా ఉద్యోగులను వారి విధుల నుంచి పక్కకు తప్పించారన్న ఆరోపణలు రావడంతో ఈఫిల్ టవర్ సిబ్బంది తీవ్రంగా స్పందించారు. తమ లింగం కారణంగా ఉద్యోగులను విధుల నుంచి దూరం చేయడాన్ని వ్యతిరేకిస్తూ సిబ్బంది విధులను బహిష్కరించడంతో టవర్‌ను సందర్శకుల కోసం మూసివేయాల్సి వచ్చింది.

ఫ్రాన్స్‌లో కొత్తగా నిర్మించిన BAPS హిందూ ఆలయ ప్రారంభోత్సవం అనంతరం సంస్థకు చెందిన సుమారు 100 మంది సభ్యులు ఈఫిల్ టవర్‌ను సందర్శించినట్లు సమాచారం. ఈ పర్యటన సందర్భంగా మహిళా ఉద్యోగులతో తమ బృందం సభ్యుల ప్రత్యక్ష సంబంధాలు, సంభాషణలు పరిమితం చేయాలని నిర్వాహకులను కోరినట్లు ఆరోపణలు వచ్చాయి. ఈ అభ్యర్థనకు యాజమాన్యం అంగీకరించి, విధుల్లో ఉన్న మహిళా ఉద్యోగులను ఇతర ప్రాంతాలకు తరలించిందని యూనియన్ ప్రతినిధులు ఆరోపించారు.

మహిళా ఉద్యోగులను కేవలం వారు మహిళలు అన్న కారణంతో విధుల నుంచి తప్పించడం తమకు ఆమోదయోగ్యం కాదని సిబ్బంది స్పష్టం చేశారు. ఈ నిర్ణయానికి వ్యతిరేకంగా వారు విధులను బహిష్కరించి నిరసనకు దిగడంతో పరిస్థితి ఉద్రిక్తంగా మారింది. ఫలితంగా సందర్శకుల భద్రత, కార్యకలాపాల నిర్వహణ దృష్ట్యా ఈఫిల్ టవర్‌ను తాత్కాలికంగా మూసివేయాల్సి వచ్చినట్లు నిర్వహణ సంస్థ ‘సెట్’ వెల్లడించింది.

ఈ వ్యవహారంపై నిర్వహణ సంస్థ కూడా స్పందించింది. ఇటువంటి షరతులను అంగీకరించడం తమవైపు జరిగిన తప్పిదమేనని అంగీకరించినట్లు సమాచారం. ఉద్యోగులను లింగం ఆధారంగా విధుల నుంచి పక్కకు తప్పించడం సమర్థనీయం కాదని స్పష్టం చేసింది. ఈ ఘటనతో ఈఫిల్ టవర్ వంటి అంతర్జాతీయ గుర్తింపు కలిగిన ప్రదేశంలో సందర్శకుల అభ్యర్థనలను ఎలా నిర్వహించాలన్న దానిపై కూడా ప్రశ్నలు తలెత్తాయి.

మరోవైపు, ఈ వివాదంపై పారిస్‌లోని BAPS ప్రతినిధులు స్పందించారు. ఘటన కారణంగా ఏర్పడిన అసౌకర్యానికి విచారం వ్యక్తం చేస్తూ క్షమాపణలు తెలిపారు. తమ సంస్థ సమానత్వం, సార్వత్రిక గౌరవం వంటి విలువలను విశ్వసిస్తుందని పేర్కొన్నారు. ఇతర సందర్శకులకు ఎలాంటి అసౌకర్యం కలగకుండా ఉండేందుకు ముందస్తు అనుమతితో ఉదయం సమయంలో ప్రత్యేక పర్యటనను ఏర్పాటు చేసుకున్నామని వివరణ ఇచ్చారు. అయితే మహిళా ఉద్యోగులను పక్కకు తప్పించాలనే ఉద్దేశంతో తాము వ్యవహరించలేదని తమ వైఖరిని స్పష్టం చేసినట్లు తెలుస్తోంది.

ఈ ఘటనపై ఫ్రాన్స్ రాజకీయ వర్గాల నుంచి కూడా తీవ్ర స్పందన వచ్చింది. ఇలాంటి వివక్షతతో కూడిన షరతులకు అంగీకరించడం ఎంతమాత్రం ఆమోదయోగ్యం కాదని పారిస్ అధికారులు అభిప్రాయపడ్డారు. ఘటనపై ఉన్నత స్థాయి దర్యాప్తునకు ఆదేశాలు జారీ చేసినట్లు సమాచారం. విదేశాల నుంచి వచ్చే సందర్శకుల అభ్యర్థనల పేరుతో మహిళా ఉద్యోగులు తమ విధులను వదులుకోవాల్సిన అవసరం లేదని ఫ్రాన్స్ జాతీయ అసెంబ్లీ అధ్యక్షురాలు యాఎల్ బ్రాన్-పివెట్ స్పష్టం చేశారు. మహిళా, పురుష ఉద్యోగులందరికీ సమాన హక్కులు, గౌరవం ఉండాల్సిందేనని ఆమె పేర్కొన్నారు.

ఈ వివాదం చోటుచేసుకున్న సమయం కూడా ప్రాధాన్యత సంతరించుకుంది. ఫ్రాన్స్‌లో BAPS సంస్థ నిర్మించిన తొలి భారీ హిందూ ఆలయ ప్రారంభోత్సవం జరిగిన మరుసటి రోజే ఈ ఘటన వెలుగులోకి వచ్చింది. ఆలయ ప్రారంభోత్సవం సందర్భంగా భారత ప్రధాని నరేంద్ర మోదీ ఆలయ నిర్మాణాన్ని ప్రశంసిస్తూ.. భారత్-ఫ్రాన్స్ మధ్య ఉన్న వ్యూహాత్మక, సాంస్కృతిక సంబంధాలకు ఇది మరింత బలాన్నిచ్చే ప్రతీకగా నిలుస్తుందని ఆకాంక్షించారు.

ఒకవైపు ఫ్రాన్స్‌లో భారతీయ ఆధ్యాత్మిక, సాంస్కృతిక వారసత్వానికి సంబంధించిన కార్యక్రమం ఘనంగా జరిగిన సమయంలోనే.. మరోవైపు ఈఫిల్ టవర్ వద్ద మహిళా ఉద్యోగుల విషయంలో తలెత్తిన వివాదం చర్చనీయాంశమైంది. ఈ ఘటనపై దర్యాప్తు పూర్తయిన తర్వాత అసలు పరిస్థితులు, నిర్ణయం వెనుక ఉన్న కారణాలు మరింత స్పష్టమయ్యే అవకాశం ఉంది.