US-Iran Tensions: నేను అడ్డుకోకుంటే ఇరాన్ చేతిలో ఇజ్రాయెల్ శ్మశానం అయ్యేది.. అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు

US-Iran Tensions: ఇరాన్ అణు సామర్థ్యాలను కట్టడి చేయడం , పశ్చిమాసియా (మధ్యప్రాచ్యం) వ్యూహాత్మక ఉద్రిక్తతలపై అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలు చేశారు. ఇరాన్‌ను అణ్వాయుధ తయారీకి దూరం చేయడంలో తాను వ్యవహరించిన కఠిన వైఖరి వల్లే నేడు ఇజ్రాయెల్ , మొత్తం పశ్చిమాసియా ప్రాంతం సురక్షితంగా మనుగడ సాగిస్తున్నాయని ఆయన అభిప్రాయపడ్డారు. తన అధికారిక సామాజిక మాధ్యమ వేదిక ‘ట్రూత్ సోషల్’ (Truth Social) లో చేసిన ఒక పోస్ట్‌లో ఆయన ఈ విషయాలను పంచుకున్నారు.

ట్రంప్ తన ‘ట్రూత్ సోషల్’ పోస్ట్‌లో పేర్కొంటూ.. “నేను ఇరాన్‌ను అణ్వాయుధం పొందకుండా ఆపి ఉండకపోతే, ఇజ్రాయెల్ తో పాటు మొత్తం పశ్చిమాసియా ఈ రోజు అసలు ఉనికిలోనే ఉండేది కాదు. ఈ నిజాన్ని బయటకు చెప్పడానికి ఎవరూ సాహసించరు, కానీ ఇది అక్షరాలా నిజమని ప్రపంచమంతటికీ తెలుసు!” అని స్పష్టం చేశారు.

ఖతార్ మధ్యవర్తిత్వంతో ఇరాన్ అమెరికాకు ఏడు షరతులతో కూడిన అణు ప్రతిపాదనను పంపిన నేపథ్యంలో ట్రంప్ చేసిన ఈ వ్యాఖ్యలు ప్రాధాన్యత సంతరించుకున్నాయి. ఇరాన్‌పై సైనిక చర్య తీవ్రతను పెంచాలా వద్దా అనే అంశంపై డొనాల్డ్ ట్రంప్ తమ జాతీయ భద్రతా బృందంతో నిరంతరం సమావేశాలు నిర్వహిస్తున్నట్లు శ్వేతసౌధ వర్గాలు ధ్రువీకరించాయి. గురువారం విలేకరులతో మాట్లాడిన ట్రంప్, ఇరాన్ మిగిలిన ప్రాంతాలను పూర్తిగా విధ్వంసం చేయడం తనకు ఇష్టం లేదని, అయితే పరిస్థితులను బట్టి తాను తీవ్ర నిర్ణయం తీసుకోవాల్సి రావచ్చునని హెచ్చరించారు.

2025, 2026లలో ఇరాన్ అణు , సైనిక కేంద్రాలపై అమెరికా-ఇజ్రాయెల్ బలగాలు క్షిపణి దాడులు జరపగా, ప్రతికారంగా గల్ఫ్ ప్రాంతంలోని అమెరికా స్థావరాలపై ఇరాన్ దాడులు చేసింది. మరోవైపు, 2026 చివరి నాటికి ఇజ్రాయెల్‌కు ఏటా ఇస్తున్న $3.8 బిలియన్ల అమెరికా సైనిక గ్రాంట్‌ను నిలిపివేసి, వాణిజ్య భాగస్వామ్యంగా మార్చే ప్రతిపాదనను కూడా అమెరికా ముందుకు తెచ్చింది.

మధ్యంతర ఎన్నికలలో (Midterm Elections) కాంగ్రెస్‌లోని ఉభయ సభల్లోనూ డెమోక్రాట్లు మెజారిటీ సాధించడంతో రిపబ్లికన్ పార్టీకి ఎదురుదెబ్బ తగిలినప్పటికీ, ఇరాన్ వివాదంలో తన నిర్ణయమే సరైనదని నిరూపించుకునే ప్రయత్నంలో ట్రంప్ ఈ రకమైన రాజకీయ ప్రకటనలు చేస్తుండటం గమనార్హం.