AP MPTC ZPTC Election Results: ఒక్క ఓటు తేడాతో గెలుపు.. తండ్రి వైసీపీ, కూతురు టీడీపీ.. ఏపీ పరిషత్ ఎన్నికల్లో ఆసక్తికర పరిణామాలు

AP MPTC ZPTC Election Results: ఆంధ్రప్రదేశ్‌లో పరిషత్ ఎన్నికల ఫలితాలు వెలువడుతున్న వేళ పలు ఆసక్తికర సంఘటనలు చోటుచేసుకున్నాయి. కొన్ని చోట్ల అభ్యర్థుల గెలుపోటములను కేవలం ఒక్క ఓటు మాత్రమే నిర్ణయించగా, మరికొన్ని ప్రాంతాల్లో ఒకే కుటుంబానికి చెందిన వారు వేర్వేరు పార్టీల తరఫున పోటీ చేసి విజయం సాధించారు. ఇంకొన్ని చోట్ల రాజకీయంగా ప్రత్యేక గుర్తింపు ఉన్న గ్రామాల్లోనూ అనూహ్య ఫలితాలు వచ్చాయి. దీంతో ఈ ఎన్నికల ఫలితాల్లోని ఆసక్తికర అంశాలు చర్చనీయాంశంగా మారాయి.

ఒక్క ఓటు.. ఇద్దరు అభ్యర్థుల పేరూ అరుణ

పరిషత్ ఎన్నికల్లో ఒక్క ఓటు ఎంత కీలకమో నెల్లూరు, పశ్చిమ గోదావరి జిల్లాల్లో వెలువడిన ఫలితాలు స్పష్టం చేశాయి. నెల్లూరు జిల్లా చిల్లకూరు మండలం తమ్మనపట్నంలో టీడీపీ అభ్యర్థి అరుణ కేవలం ఒక్క ఓటు ఆధిక్యంతో విజయం సాధించారు. ఈ ఫలితంపై వైసీపీ అభ్యర్థి అభ్యంతరం వ్యక్తం చేస్తూ కౌంటింగ్ కేంద్రం వద్ద ఆందోళనకు దిగారు. తనకు న్యాయం చేయాలని కోరారు.

ఇదే తరహాలో పశ్చిమ గోదావరి జిల్లా పెనుమంట్ర మండలంలోనూ ఆసక్తికర ఫలితం నమోదైంది. అక్కడ టీడీపీ అభ్యర్థి కొల్లి అరుణ కుమారి ఒక్క ఓటు మెజార్టీతో గెలుపొందారు. రెండు వేర్వేరు ప్రాంతాల్లో ఒకే పేరున్న మహిళా అభ్యర్థులు ఒక్కో ఓటు తేడాతో విజయం సాధించడం విశేషంగా మారింది.

తండ్రి వైసీపీ నుంచి.. కుమార్తె టీడీపీ నుంచి.. ఇద్దరికీ విజయం

కోనసీమ జిల్లాలో జరిగిన మరో ఆసక్తికర పరిణామం రాజకీయ వర్గాల దృష్టిని ఆకర్షించింది. కొత్తపేట మండలంలో తండ్రీకూతుళ్లు వేర్వేరు రాజకీయ పార్టీల తరఫున ఎన్నికల బరిలో నిలిచారు.

వైసీపీ తరఫున పొనుగుపాటి సత్యనారాయణ పలివెల-2 ఎంపీటీసీ స్థానానికి పోటీ చేయగా, ఆయన కుమార్తె చాందిని టీడీపీ అభ్యర్థిగా కొత్తపేట-2 ఎంపీటీసీ స్థానంలో పోటీ చేశారు. ఎన్నికల ఫలితాల్లో ఇద్దరూ విజయం సాధించారు. రాజకీయంగా వేర్వేరు పార్టీల్లో ఉన్నప్పటికీ తండ్రీకూతుళ్లు ఇద్దరూ తమ తమ స్థానాల్లో గెలుపొందడం ఈ ఎన్నికల్లో ప్రత్యేక ఆకర్షణగా నిలిచింది.

జగన్ మేనత్త సొంత గ్రామంలో టీడీపీకి విజయం

ఎన్టీఆర్ జిల్లాలోని గణపవరం గ్రామంలోనూ ఆసక్తికరమైన ఫలితం వెలువడింది. వైఎస్ జగన్ మేనత్త, దివంగత మాజీ ముఖ్యమంత్రి వైఎస్ రాజశేఖర్ రెడ్డి సోదరి విమలమ్మ స్వగ్రామంగా గుర్తింపు ఉన్న ఈ ప్రాంతంలో టీడీపీ ఎంపీటీసీ అభ్యర్థి విజయం సాధించారు.

ఈ గ్రామంలో దాదాపు రెండు దశాబ్దాల తర్వాత టీడీపీ గెలుపొందడం రాజకీయంగా చర్చకు దారితీసింది. స్థానికంగా ఈ ఫలితంపై ఆసక్తి నెలకొంది.

తోడికోడళ్ల మధ్య ఎన్నికల పోరు.. జనసేన అభ్యర్థి గెలుపు

పశ్చిమ గోదావరి జిల్లా ఆచంట మండలం పెదమల్లం గ్రామంలో కుటుంబ సభ్యుల మధ్యే రాజకీయ పోటీ నెలకొంది. ఎంపీటీసీ స్థానం కోసం ఇద్దరు తోడికోడళ్లు వేర్వేరు పార్టీల తరఫున ఎన్నికల బరిలో నిలిచారు.

ఈ పోటీలో వైసీపీ అభ్యర్థిపై జనసేన తరఫున పోటీ చేసిన తోడికోడలు విజయం సాధించారు. ఆమె 18 ఓట్ల ఆధిక్యంతో గెలుపొందారు. ఒకే కుటుంబానికి చెందిన ఇద్దరు మహిళలు వేర్వేరు పార్టీల తరఫున పోటీ చేయడం, వారిలో జనసేన అభ్యర్థి విజయం సాధించడం స్థానికంగా ఆసక్తికరంగా మారింది.

సోషల్ మీడియాలో చర్చనీయాంశంగా ఎన్నికల ఫలితాలు

ఏపీ పరిషత్ ఎన్నికల్లో నమోదైన ఈ ఘటనలు రాజకీయ ఆసక్తిని మరింత పెంచాయి. ఒక్క ఓటుతో అభ్యర్థుల భవిష్యత్తు మారడం, తండ్రీకూతుళ్లు వేర్వేరు పార్టీల నుంచి గెలవడం, తోడికోడళ్ల మధ్య పోటీలో ఒకరు విజయం సాధించడం వంటి పరిణామాలు ప్రజల్లో చర్చకు కారణమయ్యాయి. ముఖ్యంగా ఒక్క ఓటు కూడా ఎన్నికల ఫలితాలను ఎంతగా ప్రభావితం చేయగలదో ఈ ఘటనలు మరోసారి చాటిచెప్పాయి.