Europe Heatwave Impact: యూరప్‌లో హీట్‌వేవ్ బీభత్సం..ఈ వేసవిలో 50 వేల మంది బలి, $19 బిలియన్ల ఆర్థిక నష్టం..

Europe Heatwave Impact: ప్రపంచవ్యాప్తంగా విజృంభిస్తున్న వాతావరణ మార్పుల తీవ్రతకు యూరప్ ఖండం దారుణంగా విలవిల్లాడిపోయింది. ఈ వేసవి సీజన్‌లో నమోదైన ఊహించని రికార్డు స్థాయి తీవ్ర ఉష్ణోగ్రతల (Extreme Heatwaves) కారణంగా ఏకంగా 50,000 మందికి పైగా ప్రజలు ప్రాణాలు కోల్పోగా, సుమారు 19 బిలియన్ డాలర్ల (దాదాపు రూ.1.79 లక్షల కోట్లు) భారీ ఆర్థిక నష్టం వాటిల్లిందని రెండు వేర్వేరు అంతర్జాతీయ అధ్యయనాలు సంచలన విషయాలను వెల్లడించాయి. మానవ ప్రాణనష్టం , ఆర్థిక విధ్వంసం పరంగా యూరప్‌ చరిత్రలోనే ఇది అత్యంత ఘోరమైన తీవ్ర వేసవిగా నమోదైంది.

వివిధ ఐరోపా నగరాల్లో సంభవించిన మరణాల తీవ్రతపై ఇంపీరియల్ కాలేజ్ లండన్ శాస్త్రవేత్తల బృందం నేతృత్వంలో సమగ్ర అధ్యయనం జరిగింది. యూరోపియన్ యూనియన్ (EU), బ్రిటన్ (UK), స్విట్జర్లాండ్, నార్వే సహా దాదాపు 30 దేశాలలోని 854 ప్రధాన నగరాల్లో ఈ విస్తృత పరిశోధనలు నిర్వహించారు. ఈ అధ్యయనం పరిధిలోకి వచ్చిన ప్రాంతాల జనాభా మొత్తం ఐరోపా జనాభాలో 40 శాతానికి ప్రాతినిధ్యం వహిస్తుంది.

ఈ పరిశోధనా నివేదిక ప్రకారం, మునుపెన్నడూ లేని విధంగా అత్యధిక వేడికి తాళలేక సుమారు 50,000 మంది మరణించారు. మానవ తప్పిదాలు, శిలాజ ఇంధనాల (Fossil Fuels) విపరీత వాడకం వల్ల ఉత్పన్నమైన వాతావరణ వైపరీత్యాలు లేకపోయి ఉంటే, ఈ మరణాలలో దాదాపు మూడింట రెండొంతుల మంది సజీవంగా మిగిలి ఉండేవారని శాస్త్రవేత్తలు స్పష్టం చేశారు. గతంలో అత్యంత తీవ్ర వేసవిగా నమోదైన 2022లో 29,000 మంది, 2003లో 28,000 మంది మరణించగా, ఈ ఏడాది ఆ రికార్డులన్నింటినీ అధిగమించి మరణాల సంఖ్య ఆందోళనకర స్థాయికి చేరింది.

మరోవైపు ‘బ్లూమ్‌బర్గ్ ఎకనామిక్స్’ చేపట్టిన ఆర్థిక విశ్లేషణలో వాతావరణ మార్పుల వల్ల సంభవించిన ద్రవ్య నష్టాల వివరాలు వెలుగులోకి వచ్చాయి. ఈ ఏడాది ఏప్రిల్ నుంచి సెప్టెంబర్ మధ్య కాలంలో తీవ్ర ఎండల దెబ్బకు యూరోపియన్ సమాఖ్య యొక్క స్థూల జాతీయోత్పత్తిలో (GDP) 0.17 శాతం నష్టం వాటిల్లిందని, దీని నికర విలువ 17 బిలియన్ యూరోలు (19 బిలియన్ డాలర్లు) ఉంటుందని అంచనా వేశారు. గత దశాబ్ద కాలంలో ఇదే కాలానికి నమోదైన సగటు ఆర్థిక నష్టంతో పోలిస్తే ఇది ఏకంగా రెండున్నర రెట్లు ఎక్కువ కావడం గమనార్హం. ఈ తీవ్రమైన ఉష్ణోగ్రతల ప్రభావంతో ఫ్రాన్స్ జీడీపీ 0.2 శాతం, జర్మనీ జీడీపీ 0.1 శాతం, స్పెయిన్ జీడీపీ 0.05 శాతం మేర ఆకస్మిక తగ్గుదలను నమోదు చేశాయి.

ఈ సంవత్సరం యూరప్‌లో సాధారణం కంటే ముందుగానే, అంటే మే నెలలోనే తీవ్ర వడగాల్పులు ప్రారంభమై ఏకంగా సెప్టెంబర్ చివరి వరకు నిరంతరాయంగా కొనసాగాయి. ముఖ్యంగా పశ్చిమ యూరప్ ప్రాంతాల్లో 1991-2020 మధ్య కాలంలో ఉన్న సగటు వేసవి ఉష్ణోగ్రతల కంటే దాదాపు 3 డిగ్రీల సెల్సియస్ అదనంగా నమోదయ్యాయి. కొన్ని ప్రాంతాల్లోనైతే కొన్ని రోజుల పాటు సాధారణ స్థాయి కంటే ఏకంగా 12 డిగ్రీల సెల్సియస్ వరకు అధిక ఉష్ణోగ్రతలు నమోదు కావడం శాస్త్రవేత్తలను దిగ్భ్రాంతికి గురిచేసింది.

దక్షిణ, పశ్చిమ యూరప్ దేశాలు ఈ వాతావరణ మార్పుల తీవ్రతకు తీవ్రంగా దెబ్బతిన్నాయి. ఈ భయంకర ఎండల కారణంగా రవాణా మౌలిక సదుపాయాలు దెబ్బతినడం, విపరీతంగా కార్చిచ్చులు (Wildfires) చెలరేగడం, ఊపిరితిత్తులు, గుండె సంబంధిత సమస్యలతో ఆసుపత్రులపై విపరీతమైన ఒత్తిడి పెరగడం, రైలు, విమాన రవాణా వ్యవస్థలకు తీవ్ర అంతరాయం కలగడం , ఎలక్ట్రిసిటీ కూలింగ్ గ్రిడ్లు విఫలమవడం వంటి అనేక సమస్యలు తలెత్తాయి.

అయితే వడగాల్పుల వల్ల సంభవించే అసలు మరణాల సంఖ్య సాధారణంగా రికార్డుల్లో తక్కువగా నమోదవుతుందని పరిశోధకులు అభిప్రాయపడుతున్నారు. తీవ్రమైన వేడి నేరుగా మరణానికి కారణం కాకుండా, వ్యక్తుల్లో ఇప్పటికే ఉన్న తీవ్ర అనారోగ్య సమస్యలను మరింత విషమించేలా చేయడం వల్ల మరణానికి అసలు కారణాన్ని గుర్తించడం వైద్యరంగంలో కష్టమవుతుందని విశ్లేషిస్తున్నారు. ఈ కోణంలో చూస్తే వాస్తవ ప్రాణనష్టం ప్రభుత్వ లెక్కల కంటే ఇంకా ఎక్కువే ఉండొచ్చని అంచనా వేస్తున్నారు.