US Space Weapons: అంతరిక్షంలో ఆయుధాలు.. అమెరికాపై మండిపడిన చైనా.. మరో కొత్త వార్‌పై అంతర్జాతీయంగా ఆందోళన..

jagan 15 Sep 2026 1 నిమిషాల పఠనం ప్రపంచం

US-Venezuela oil deal: వెనుజులా ఆయిల్ వ్యాపారంలోకి అమెరికా...మీకు మూరెడు...మాకు బారెడు : చమురు వ్యాపారంలో పెంటగాన్‌కు 35% వాటా..?

US Space Weapons: అంతరిక్ష రంగంలో ఆయుధాలు దాచిపెట్టామంటూ అమెరికా సంచలన ప్రకటన చేసింది. భూమి కక్ష్యలో ఒక అంతరిక్ష ఆయుధాన్ని మోహరించినట్లు తొలిసారి అధికారికంగా ధృవీకరించింది. శత్రు దేశాల నుంచి ఎదురయ్యే ముప్పులను ఎదుర్కొనేందుకు, అమెరికా బలగాలు, అంతరిక్ష ఆస్తులను రక్షించడానికి కక్ష్యలో ఆయుధ సామర్థ్యం అవసరమని అమెరికా వైమానిక దళ కార్యదర్శి ట్రాయ్ మీంక్ వెల్లడించారు. అయితే ఈ ఆయుధం ఏ రకానికి చెందింది, దాని సామర్థ్యాలు ఏమిటి, ఎప్పుడు కక్ష్యలోకి ప్రవేశపెట్టారు అనే కీలక వివరాలను మాత్రం ఆయన వెల్లడించలేదు.

సోమవారం జరిగిన ఎయిర్, స్పేస్ అండ్ సైబర్ కాన్ఫరెన్స్‌లో మాట్లాడిన మీంక్.. ప్రపంచవ్యాప్తంగా మారుతున్న ముప్పులకు అనుగుణంగా అమెరికా సిద్ధమవుతోందని చెప్పారు. భవిష్యత్ యుద్ధాల్లో అంతరిక్షం కీలకమైన రంగంగా మారే అవకాశం ఉన్న నేపథ్యంలో అమెరికా తన రక్షణ సామర్థ్యాలను విస్తరిస్తోందని ఆయన వ్యాఖ్యలు సూచిస్తున్నాయి. అమెరికా ఉపగ్రహ వ్యవస్థలను లక్ష్యంగా చేసుకునే సామర్థ్యాలను రష్యా, చైనా అభివృద్ధి చేస్తున్నాయని అమెరికా సైనిక అధికారులు గతంలో పలుమార్లు హెచ్చరించారు.

అయితే అమెరికా తాజా ప్రకటనపై చైనా తీవ్రంగా స్పందించింది. అంతరిక్షంలో ఆయుధ పోటీకి దారితీసే చర్యలను అమెరికా నిలిపివేయాలని చైనా కోరింది. అమెరికా తన సైనిక సామర్థ్యాలను విస్తరించడం, అంతరిక్షంలో యుద్ధానికి సిద్ధమవడం మానుకోవాలని చైనా విదేశాంగ మంత్రిత్వ శాఖ ప్రతినిధి పేర్కొన్నట్లు అంతర్జాతీయ వార్తా సంస్థలు వెల్లడించాయి. దీంతో అమెరికా ప్రకటన అంతరిక్ష ఆధిపత్యంపై మరోసారి అంతర్జాతీయ చర్చకు దారితీసింది.

అమెరికా స్పేస్ ఫోర్స్ కూడా అంతరిక్ష నియంత్రణలో భాగంగా అవసరమైతే శత్రు సామర్థ్యాలను అంతరాయం కలిగించడం, బలహీనపరచడం లేదా ధ్వంసం చేయడం వంటి చర్యలకు అవసరమైన సామర్థ్యాలను అభివృద్ధి చేస్తున్నట్లు వివరించింది. ఈ సామర్థ్యాలను దాడి, రక్షణ రెండు రకాల ప్రయోజనాలకు ఉపయోగించవచ్చని తెలిపింది.

అయితే ప్రస్తుతం అమెరికా మోహరించిన ఆయుధం స్వరూపంపై స్పష్టత లేకపోవడంతో నిపుణులు వివిధ అంచనాలు వేస్తున్నారు. రాయల్ యునైటెడ్ సర్వీసెస్ ఇన్‌స్టిట్యూట్‌కు చెందిన అంతరిక్ష భద్రతా నిపుణుడు డాక్టర్ బ్లెడిన్ బోవెన్ మాట్లాడుతూ, ఇది ఎలక్ట్రానిక్ వార్‌ఫేర్ లేదా రేడియో జామింగ్ ప్లాట్‌ఫామ్ అయి ఉండవచ్చని అభిప్రాయపడ్డారు. ఇలాంటి వ్యవస్థలు శత్రు ఉపగ్రహాల కమ్యూనికేషన్లకు అంతరాయం కలిగించగలవు. మరో అవకాశం కైనటిక్ కిల్ వెహికల్‌ది కావచ్చని ఆయన పేర్కొన్నారు. అంటే ఉపగ్రహాన్ని నేరుగా ఢీకొట్టి ధ్వంసం చేసే సామర్థ్యం. అయితే అలాంటి విధ్వంసక ఆయుధాలను కక్ష్యలో ఉపయోగించడం వల్ల భారీగా అంతరిక్ష శిథిలాలు ఏర్పడి ఇతర ఉపగ్రహాలకు కూడా ప్రమాదం కలిగే అవకాశం ఉంది.

ఇదిలా ఉండగా, అమెరికా ప్రతిపాదించిన ‘గోల్డెన్ డోమ్’ రక్షణ వ్యవస్థలోనూ అంతరిక్ష ఆధారిత సామర్థ్యాలు కీలకంగా ఉండనున్నాయి. క్షిపణులు, వైమానిక ముప్పుల నుంచి అమెరికాను రక్షించేందుకు అంతరిక్ష ఆధారిత వ్యవస్థలు, ఇంటర్‌సెప్టర్ క్షిపణులను ఉపయోగించాలని ట్రంప్ ప్రభుత్వం భావిస్తోంది. గతంలో అధ్యక్షుడు డొనాల్డ్ ట్రంప్ కూడా స్పేస్ ఫోర్స్ కేవలం అమెరికా అంతరిక్ష ఆస్తులను రక్షించే సంస్థ మాత్రమే కాకుండా, అవసరమైతే దాడి చేసే సామర్థ్యాన్ని కలిగిన బలగంగా ఉండాలని పేర్కొన్నారు.

2019లో ఏర్పాటైన యూఎస్ స్పేస్ ఫోర్స్ అమెరికా అంతరిక్ష ఆస్తులను రక్షించడం ప్రధాన లక్ష్యంగా పనిచేస్తోంది. కమ్యూనికేషన్, నిఘా, దిశానిర్దేశం వంటి కీలక రంగాలకు ఉపయోగించే వందలాది ఉపగ్రహాలు అమెరికా సైనిక సామర్థ్యంలో కీలక పాత్ర పోషిస్తున్నాయి. 1967 అంతరిక్ష ఒప్పందం కక్ష్యలో సామూహిక విధ్వంసక ఆయుధాలను నిషేధించినప్పటికీ, ఉపగ్రహాలను లక్ష్యంగా చేసుకునే ఇతర సైనిక సామర్థ్యాలపై స్పష్టమైన నిషేధం లేదు.

రష్యా, చైనా కూడా ఉపగ్రహ వ్యతిరేక సామర్థ్యాలను అభివృద్ధి చేస్తున్న నేపథ్యంలో అమెరికా తాజా ప్రకటన అంతరిక్షంలో కొత్త ఆయుధ పోటీకి సంకేతంగా మారుతుందా అనే చర్చ మొదలైంది. భవిష్యత్ సంఘర్షణల్లో అంతరిక్ష ఆధిపత్యం కీలకంగా మారే అవకాశాలు ఉన్నందున అమెరికా, రష్యా, చైనా మధ్య పోటీ మరింత తీవ్రం కావచ్చని నిపుణులు భావిస్తున్నారు.