Telangana PRC: పీఆర్సీ రిపోర్ట్ రెడీ…? డిసెంబర్ లోగా ఉద్యోగులకు గుడ్ న్యూస్…? డీఏల విలీనం.. ఐఆర్తో కలిపి పీఆర్సీ? (Exclusive)
Telangana PRC: పీఆర్సీ కోసం తెలంగాణ ప్రభుత్వ ఉద్యోగులు, టీచర్ల ఎదురు చూపులు...ఉద్యోగ, ఉపాధ్యాయ సంఘాల డిమాండ్లు నెరవేరుతాయా.. లేదా..?
Telangana PRC: పెండింగ్లో ఉన్న పీఆర్సీ నివేదిక, ఫిట్మెంట్, డీఏలు, రిటైర్మెంట్ బెనిఫిట్స్ చెల్లింపుల అంశాలు కీలకంగా మారాయి. ఉద్యోగ సంఘాలు తమ డిమాండ్లపై ప్రభుత్వం స్పష్టమైన నిర్ణయం తీసుకోవాలని కోరుతున్న నేపథ్యంలో.. సర్కార్ కూడా ఆర్థిక పరిస్థితి, రాబోయే ఎన్నికలను దృష్టిలో పెట్టుకుని అడుగులు వేస్తున్నట్లు సమాచారం అందుతోంది.
Telangana PRC: తెలంగాణలో ప్రభుత్వ ఉద్యోగులు, ఉపాధ్యాయులు, పెన్షనర్లు ఎదుర్కొంటున్న సమస్యల పరిష్కారంపై రాష్ట్ర ప్రభుత్వం దృష్టి సారించినట్లు తెలుస్తోంది. ముఖ్యంగా పెండింగ్లో ఉన్న పీఆర్సీ నివేదిక, ఫిట్మెంట్, డీఏలు, రిటైర్మెంట్ బెనిఫిట్స్ చెల్లింపుల అంశాలు కీలకంగా మారాయి. ఉద్యోగ సంఘాలు తమ డిమాండ్లపై ప్రభుత్వం స్పష్టమైన నిర్ణయం తీసుకోవాలని కోరుతున్న నేపథ్యంలో.. సర్కార్ కూడా ఆర్థిక పరిస్థితి, రాబోయే ఎన్నికలను దృష్టిలో పెట్టుకుని అడుగులు వేస్తున్నట్లు సమాచారం అందుతోంది.
పీఆర్సీ నివేదికపై ఉత్కంఠ
2023 అక్టోబర్ 2న రిటైర్డ్ ఐఏఎస్ అధికారి ఎన్. శివశంకర్ చైర్మన్గా ఏర్పాటు చేసిన పీఆర్సీ కమిటీ ఉద్యోగులు, ఉపాధ్యాయులు, పెన్షనర్ల నుంచి అభిప్రాయాలు సేకరించి నివేదిక సిద్ధం చేసినట్లు తెలుస్తోంది. అయితే నివేదికపై ప్రభుత్వం ఎలాంటి నిర్ణయం తీసుకోకపోవడంతో ఉద్యోగ వర్గాల్లో అసంతృప్తి కొనసాగుతోంది.
పెండింగ్ డిమాండ్లపై సెప్టెంబర్ 10లోపు ప్రభుత్వం స్పందించకపోతే భారీ స్థాయిలో ‘చలో హైదరాబాద్’ కార్యక్రమం చేపడతామని ఉద్యోగ సంఘాలు హెచ్చరించిన నేపథ్యంలో పీఆర్సీ అంశం మరోసారి తెరపైకి వచ్చింది. సుమారు 10 లక్షల మంది ఉద్యోగులు, పెన్షనర్లు, ఇతర వర్గాలను సమీకరించే ప్రయత్నం జరుగుతుందన్న హెచ్చరికలతో ప్రభుత్వం కూడా పరిస్థితిని సీరియస్గా పరిశీలిస్తున్నట్లు సమాచారం.
ఫిట్మెంట్పై ఆర్థిక భారం
ఉద్యోగులకు ప్రధానంగా ఆసక్తి కలిగిస్తున్న అంశం ఫిట్మెంట్. గతంలో 2015లో ఉద్యోగులకు 43 శాతం ఫిట్మెంట్ ప్రకటించారు. పీఆర్సీ కమిటీ 7.5 శాతం సిఫారసు చేసినప్పటికీ అప్పటి బీఆర్ఎస్ ప్రభుత్వం 30 శాతం ఫిట్మెంట్ ఇచ్చింది.
అదే తరహాలో ప్రస్తుత ప్రభుత్వం నుంచి కూడా భారీ ఫిట్మెంట్ను ఉద్యోగ సంఘాలు ఆశిస్తున్నాయి. అయితే రాష్ట్ర ఆర్థిక పరిస్థితిని పరిగణనలోకి తీసుకుంటే ప్రభుత్వం కోరుకున్న స్థాయిలో ఫిట్మెంట్ ఇవ్వడం సాధ్యమవుతుందా అన్నది ప్రశ్నగా మారింది. ఆర్థిక భారం, ఉద్యోగుల డిమాండ్లు.. ఈ రెండింటి మధ్య సమతుల్యత సాధించడం ప్రభుత్వానికి సవాలుగా మారనుంది.
డీఏల విలీనం.. ఐఆర్తో కలిపి పీఆర్సీ?
ప్రస్తుతం ఉద్యోగులకు 5 శాతం మధ్యంతర భృతి (ఐఆర్) అమల్లో ఉంది. మరోవైపు ఆరు డీఏలు పెండింగ్లో ఉన్నట్లు ఉద్యోగ సంఘాలు చెబుతున్నాయి. ఈ డీఏలను ఫిట్మెంట్లో విలీనం చేసి పీఆర్సీని ప్రకటించే అంశాన్ని ప్రభుత్వం పరిశీలిస్తున్నట్లు సమాచారం.
అయితే డీఏలను ఫిట్మెంట్లో ఎలా పరిగణనలోకి తీసుకుంటారు? ఉద్యోగుల వేతనాలపై దాని ప్రభావం ఎంత ఉంటుంది? అనే అంశాలపై తుది నిర్ణయం తీసుకోవాల్సి ఉంది.
మూడో పీఆర్సీకి కసరత్తు ?
ఉద్యోగ వర్గాల్లో నిరాశను తగ్గించేందుకు మరో కీలక నిర్ణయం తీసుకునే అవకాశం ఉన్నట్లు తెలుస్తోంది. త్వరలోనే మూడో పీఆర్సీని ఏర్పాటు చేసి, 2028 అసెంబ్లీ ఎన్నికలకు ముందే దాని నివేదికను అందుకునేలా గడువు విధించాలన్న ఆలోచన ప్రభుత్వ వర్గాల్లో ఉన్నట్లు సమాచారం. అయితే దీనిపై అధికారిక ప్రకటన రావాల్సి ఉంది. పీఆర్సీ ఏర్పాటు, నివేదిక సమర్పణ, దాని అమలు వంటి అంశాలపై ప్రభుత్వం తీసుకునే నిర్ణయం ఉద్యోగుల్లో ఆసక్తిని రేకెత్తిస్తోంది.
చిన్న ఉద్యోగుల బకాయిలే అసలు సమస్య
పీఆర్సీతో పాటు ఉద్యోగులు, ముఖ్యంగా దిగువ స్థాయి సిబ్బంది ఎదురుచూస్తున్న మరో అంశం పెండింగ్ బెనిఫిట్స్. కానిస్టేబుళ్లకు సరెండర్ సెలవుల కింద ఒక్కొక్కరికి సుమారు రూ.1.5 లక్షల నుంచి రూ.2 లక్షల వరకు రావాల్సి ఉండి చెల్లింపులు పెండింగ్లో ఉన్నట్లు తెలుస్తోంది.
పెద్ద అధికారుల వేతనాలు లేదా ఇతర చెల్లింపుల్లో కొంత ఆలస్యం జరిగినా అంతగా ప్రభావం ఉండకపోవచ్చని, కానీ తక్కువ జీతాలతో కుటుంబాలను నెట్టుకొస్తున్న కానిస్టేబుళ్లు, హోంగార్డులు, అవుట్సోర్సింగ్ సిబ్బందికి బకాయిలు తీవ్ర ఇబ్బందిగా మారుతున్నాయని ఉద్యోగ సంఘాలు ఆవేదన వ్యక్తం చేస్తున్నాయి.
పెన్షనర్ల బెనిఫిట్స్పై ప్రత్యేక దృష్టి
విశ్రాంత ఉద్యోగుల రిటైర్మెంట్ బెనిఫిట్స్ను కూడా దశలవారీగా క్లియర్ చేయాలని ప్రభుత్వం భావిస్తున్నట్లు సమాచారం. వచ్చే నెల నుంచి ప్రతి నెలా రూ.1,500 కోట్లకు పైగా విడుదల చేసి పెండింగ్ బెనిఫిట్స్ను తగ్గించే లక్ష్యంతో ముందుకు వెళ్లే అవకాశం ఉన్నట్లు తెలుస్తోంది.
ఎన్నికల నేపథ్యంలో ఉద్యోగులే కీలకం
మరోవైపు రాబోయే ఎన్నికలు కూడా ప్రభుత్వం తీసుకునే నిర్ణయాలపై ప్రభావం చూపే అవకాశముంది. డిసెంబర్లో గ్రేటర్ హైదరాబాద్, సైబరాబాద్, మల్కాజిగిరి కార్పొరేషన్ ఎన్నికలు జరగనున్నట్లు రాజకీయ వర్గాల్లో చర్చ జరుగుతోంది. వచ్చే ఏడాది మార్చిలో హైదరాబాద్-రంగారెడ్డి-మహబూబ్నగర్, ఖమ్మం-వరంగల్-నల్గొండ గ్రాడ్యుయేట్ ఎమ్మెల్సీ స్థానాలకు ఎన్నికలు జరగనున్నాయి.
ఈ ఎన్నికల్లో ప్రభుత్వ ఉద్యోగులు, ఉపాధ్యాయులు, పట్టభద్రుల ఓట్లు కీలకంగా మారే అవకాశం ఉంది. పీఆర్సీ, డీఏలు, పెండింగ్ బకాయిలపై స్పష్టత లేకుండానే ఎన్నికలకు వెళితే ఉద్యోగ వర్గాల్లో వ్యతిరేకత ఎదురయ్యే అవకాశం ఉందన్న అంచనాలు ప్రభుత్వ వర్గాల్లో ఉన్నట్లు తెలుస్తోంది.
ఎన్నికల ముందే నిర్ణయాలా?
ఈ నేపథ్యంలో పీఆర్సీపై ముందడుగు వేయడం, పెండింగ్ బకాయిల చెల్లింపులు ప్రారంభించడం, డీఏలు-ఐఆర్ అంశంపై స్పష్టత ఇవ్వడం వంటి చర్యల ద్వారా ఉద్యోగ వర్గాల్లో సానుకూల వాతావరణం తీసుకురావాలని ప్రభుత్వం భావిస్తున్నట్లు సమాచారం.
అయితే ఫిట్మెంట్ ఎంత శాతం ఉంటుంది? పెండింగ్ డీఏలకు ఎలాంటి పరిష్కారం చూపిస్తారు? పీఆర్సీ నివేదికను ఎప్పుడు ప్రకటిస్తారు? పెండింగ్ బెనిఫిట్స్ ఎప్పటిలోగా పూర్తిగా చెల్లిస్తారు? అన్నది ఇప్పుడు ఉద్యోగులు, పెన్షనర్లలో ప్రధాన చర్చగా మారింది.
మొత్తంగా.. ఆర్థిక పరిమితులు ఒకవైపు, ఉద్యోగుల డిమాండ్లు మరోవైపు, కీలక ఎన్నికలు ఇంకోవైపు ఉండటంతో తెలంగాణ ప్రభుత్వానికి పీఆర్సీ వ్యవహారం కీలక పరీక్షగా మారింది. ఎన్నికలకు ముందే ఉద్యోగ వర్గాలను సంతృప్తిపరిచే స్థాయిలో ప్రభుత్వం ఎలాంటి నిర్ణయం తీసుకుంటుందన్నదే ఇప్పుడు ఆసక్తికరంగా మారింది.
సంబంధిత వార్తలు
