Assam Gym Horror: వీడియో ఇదిగో.. జిమ్‌లో వర్కవుట్ చేస్తుండగా గుండెపోటుతో డాక్టర్ మృతి.. వ్యాయామం చేసేవాళ్లు ఈ హెచ్చరికలు తప్పక గుర్తుంచుకోండి

jagan 29 Aug 2026 1 నిమిషాల పఠనం జాతీయం

Assam Gym Horror

Assam Gym Horror: వ్యాయామం ఆరోగ్యానికి మేలు చేసేదే కానీ, అతిగా చేయడం మాత్రం ప్రమాదకరం కావచ్చు.శరీరం ఇచ్చే హెచ్చరికలను గుర్తించడం, వ్యాయామ తీవ్రతను క్రమంగా పెంచడం, తగిన విశ్రాంతి తీసుకోవడం, అవసరమైనప్పుడు వైద్యుల సలహా పొందడం ద్వారా జిమ్‌లో అనవసర ప్రమాదాలను నివారించే అవకాశం ఉంటుంది.

Assam Gym Horror: శరీరాన్ని దృఢంగా, ఆరోగ్యంగా ఉంచుకోవడానికి జిమ్‌కు వెళ్లే వారి సంఖ్య రోజురోజుకూ పెరుగుతోంది. అయితే ఇటీవల కాలంలో జిమ్‌లో వర్కౌట్ చేస్తూ కొందరు అకస్మాత్తుగా కుప్పకూలి ప్రాణాలు కోల్పోతున్న ఘటనలు ఆందోళన కలిగిస్తున్నాయి. వ్యాయామం సాధారణంగా గుండె, ఊపిరితిత్తులు, కండరాల ఆరోగ్యానికి ఎంతో మేలు చేసినప్పటికీ.. శరీర సామర్థ్యాన్ని మించి తీవ్రమైన వ్యాయామం చేయడం, సరైన విశ్రాంతి తీసుకోకపోవడం వంటి కారణాలు అరుదైన సందర్భాల్లో ప్రమాదకరంగా మారవచ్చని వైద్య నిపుణులు హెచ్చరిస్తున్నారు.

తాజాగా అసోంలోని నగావ్ మెడికల్ కాలేజ్ అండ్ హాస్పిటల్‌కు చెందిన 47 ఏళ్ల అసోసియేట్ ప్రొఫెసర్ డాక్టర్ షాహిన్ రెహమాన్ జిమ్‌లో వ్యాయామం చేస్తూ అకస్మాత్తుగా కుప్పకూలి మృతి చెందిన ఘటన కలకలం రేపింది. కమ్యూనిటీ మెడిసిన్ విభాగంలో పనిచేస్తున్న ఆయన ఆగస్టు 27 రాత్రి జిమ్‌లో వర్కౌట్ చేస్తుండగా ఒక్కసారిగా స్పృహ కోల్పోయి కిందపడిపోయారు. ఈ ఘటనకు సంబంధించిన దృశ్యాలు జిమ్‌లోని సీసీటీవీ కెమెరాల్లో నమోదయ్యాయి.

ఆయనతో ఉన్నవారు వెంటనే స్పందించి ఆసుపత్రికి తరలించినప్పటికీ.. అప్పటికే మృతి చెందినట్లు వైద్యులు ధ్రువీకరించారు. ఆకస్మికంగా చోటుచేసుకున్న ఈ ఘటన జిమ్‌లో కఠినమైన వ్యాయామాలు చేసే వారి భద్రతపై మరోసారి ప్రశ్నలు లేవనెత్తింది.

జిమ్‌లో వ్యాయామం చేస్తూ అకస్మాత్తుగా ప్రాణాలు కోల్పోయిన ఘటనలు గతంలోనూ నమోదయ్యాయి. ఉత్తరాఖండ్‌లోని చంపావత్ జిల్లాలో 38 ఏళ్ల స్పెషల్ ఆపరేషన్స్ గ్రూప్ అధికారి గిరీష్ భట్ జిమ్‌లో వ్యాయామం చేస్తుండగా తీవ్ర అస్వస్థతకు గురై మృతి చెందినట్లు సమాచారం.

అదేవిధంగా మహారాష్ట్రలోని చించ్‌వాడ్ ప్రాంతంలో 37 ఏళ్ల వ్యాపారవేత్త మిలింద్ కులకర్ణి కూడా వర్కౌట్ చేస్తుండగా కుప్పకూలి ప్రాణాలు కోల్పోయారు. ఆయన సుమారు ఆరు నెలలుగా క్రమం తప్పకుండా జిమ్‌కు వెళ్తున్నప్పటికీ.. వ్యాయామం మధ్యలో నీళ్లు తాగిన అనంతరం కళ్లు తిరిగి పడిపోయినట్లు సమాచారం. ఈ ఘటనలు వయసుతో సంబంధం లేకుండా జిమ్‌లో వ్యాయామం చేసే ప్రతి ఒక్కరూ కొన్ని జాగ్రత్తలు పాటించాల్సిన అవసరాన్ని సూచిస్తున్నాయి.

వ్యాయామం ఎప్పుడు ప్రమాదకరంగా మారుతుంది?

వైద్య నిపుణుల ప్రకారం సాధారణ స్థాయిలో చేసే వ్యాయామం ఆరోగ్యానికి ఎంతో ప్రయోజనకరం. అయితే శరీర సామర్థ్యాన్ని మించి ఒక్కసారిగా తీవ్రమైన వర్కౌట్లు చేయడం, సరైన శిక్షణ లేకుండా భారీ బరువులు ఎత్తడం, తగినంత విశ్రాంతి తీసుకోకపోవడం వంటి అంశాలు శరీరంపై అదనపు ఒత్తిడిని కలిగించవచ్చు.

🚨 ASSAM: DOCTOR DIES AFTER COLLAPSING DURING GYM SESSION

A doctor died after suddenly collapsing while exercising at a gym in Nagaon, Assam on Thursday evening, August 27.

The man was identified as Dr. Shaheen Rahman an Associate Professor in the Department of Community… pic.twitter.com/14HiO8W9Du
— contentkikamii (@contentkikamii) August 28, 2026

ముఖ్యంగా తమకు గుండెకు సంబంధించిన సమస్యలు ఉన్న విషయం తెలియని వ్యక్తుల్లో తీవ్రమైన శారీరక శ్రమ అరుదైన సందర్భాల్లో గుండె సంబంధిత అత్యవసర పరిస్థితులకు దారితీయవచ్చని నిపుణులు చెబుతున్నారు. అందుకే జిమ్‌లో చేరిన వెంటనే భారీ వర్కౌట్లు ప్రారంభించకుండా.. శరీర సామర్థ్యానికి అనుగుణంగా వ్యాయామ తీవ్రతను క్రమంగా పెంచడం మంచిదని సూచిస్తున్నారు.

ముందుగా ఆరోగ్య పరీక్షలు అవసరం

గతంలో వ్యాయామం చేయని వారు లేదా చాలా కాలం తర్వాత తిరిగి జిమ్‌లో వర్కౌట్లు ప్రారంభించేవారు తమ ఆరోగ్య పరిస్థితిని ముందుగా అంచనా వేసుకోవడం మంచిదని వైద్యులు సూచిస్తున్నారు. ముఖ్యంగా గుండెకు సంబంధించిన ప్రమాద కారకాలు ఉన్నవారు వైద్యుల సలహా తీసుకుని వ్యాయామ ప్రణాళికను రూపొందించుకోవాలి.

జిమ్‌లో ట్రైనర్ పర్యవేక్షణలో సరైన పద్ధతిలో వ్యాయామం చేయడం కూడా కీలకం. వార్మప్, కూల్‌డౌన్‌కు తగిన సమయం కేటాయించడంతో పాటు.. శరీరానికి అవసరమైన విశ్రాంతి, నీరు, పోషకాహారం అందేలా చూసుకోవాలి.

ఈ లక్షణాలను అస్సలు నిర్లక్ష్యం చేయొద్దు

వ్యాయామం చేస్తున్న సమయంలో మైకం, కళ్లు తిరగడం, శ్వాస తీసుకోవడంలో ఇబ్బంది, ఛాతీలో నొప్పి లేదా అసౌకర్యం, అసాధారణమైన గుండె దడ, తీవ్రమైన బలహీనత వంటి లక్షణాలు కనిపిస్తే వెంటనే వ్యాయామాన్ని ఆపాలి. లక్షణాలు కొనసాగితే ఆలస్యం చేయకుండా వైద్య సహాయం పొందాలి.

అలాగే ఇతరులు చేసే భారీ వర్కౌట్లను చూసి తాము కూడా అదే స్థాయిలో వ్యాయామం చేయాలనే ఆలోచనకు దూరంగా ఉండాలని నిపుణులు సూచిస్తున్నారు. ప్రతి వ్యక్తి శారీరక సామర్థ్యం, వయసు, ఆరోగ్య పరిస్థితి భిన్నంగా ఉంటాయి.