Dasara Price Shock: దసరా వేళ నిత్యావసర సరుకుల ధరల మంట.. ఎల్‌నినో ప్రభావంతో అల్లాడిపోతున్న సామాన్యులు

Dasara Price Shock: ప్రజలు అత్యంత వైభవంగా, ఆనందోత్సాహాలతో జరుపుకునే బతుకమ్మ, దసరా పండుగల వేళ వంటింటి నిత్యావసరాల ధరలు చుక్కలు తాకుతుండడంతో పేద, మధ్యతరగతి ప్రజలు తీవ్ర ఆందోళన చెందుతున్నారు. కేవలం నెల రోజుల వ్యవధిలోనే సరుకుల ధరలు అమాంతం పెరిగిపోవడంతో ప్రతి నెలా గృహ బడ్జెట్ తలకిందులవుతోంది. ఎల్‌నినో (El Niño) ప్రభావంతో వర్షాలు సరిగా కురవకపోవడం, పంటల దిగుబడి గణనీయంగా తగ్గిపోవడంతో పాటు డిమాండ్‌కు తగినట్లుగా సరుకులు మార్కెట్‌కు రాకపోవడం ఈ సంక్షోభానికి ప్రధాన కారణమని వ్యాపారులు పేర్కొంటున్నారు. కూరగాయల నుంచి మొదలుకొని బియ్యం, నూనెలు, పప్పుధాన్యాల ధరలు విపరీతంగా పెరగడంతో పండుగలను ఎలా నిర్వహించుకోవాలో అర్థం కాక సామాన్య జనం విలవిలలాడుతున్నారు.

రాష్ట్రవ్యాప్తంగా ఎల్‌నినో ప్రభావం తీవ్రంగా ఉండటంతో పంటలు చేతికొచ్చే కీలక సమయంలో వర్షాలు ముఖం చాటేశాయి. దీనివల్ల అన్ని రకాల వ్యవసాయ ఉత్పత్తుల ధరలపై తీవ్ర ప్రభావం పడుతోంది. ముఖ్యంగా నెల రోజుల వ్యవధిలోనే సన్నబియ్యం ధరలు క్వింటాల్‌కు రూ.1,500లకు పైగా పెరిగిపోవడం సామాన్యులకు పెద్ద షాక్ ఇస్తోంది. గతంలో క్వింటాల్ హెచ్‌ఎంటీ బియ్యం ధర రూ.6,000 నుంచి రూ.6,300 ఉండగా, ప్రస్తుతం అది రూ.7,600 నుంచి రూ.7,800కు చేరింది.

అలాగే జైశ్రీరామ్ బియ్యం ధర రూ.6,800-7,000 నుంచి ఏకంగా రూ.8,400-8,600కు ఎగబాకింది. సాంబమసూరి బియ్యం ధర కూడా రూ.5,000 నుంచి రూ.7,000కు పెరిగింది. రేషన్ బియ్యాన్ని చాలా మంది వినియోగించకపోవడం, నాణ్యమైన సన్నబియ్యానికి డిమాండ్ పెరగడాన్ని ఆసరాగా చేసుకున్న వ్యాపారులు నిల్వలను కృత్రిమంగా దాచిపెట్టి అధిక ధరలకు విక్రయిస్తున్నారనే ఆరోపణలు వస్తున్నాయి. భవిష్యత్‌లో ధరలు మరింత పెరిగే అవకాశం ఉన్నందున ప్రభుత్వం, ధరల నియంత్రణ కమిటీలు తక్షణమే స్పందించి మార్కెట్‌ను పర్యవేక్షించాలని ప్రజలు కోరుతున్నారు.

బియ్యంతో పాటు కూరగాయలు, పప్పుధాన్యాల ధరల పెరుగుదల మధ్యతరగతి కుటుంబాల నడ్డి విరుస్తోంది. మార్కెట్‌లో ఏ రకమైన కూరగాయ కొనాలన్నా కిలో రూ.80కి పైగా పలుకుతుండటంతో, వారానికి సరిపడా కూరగాయలు తేవడానికి రూ.500లకు పైగా ఖర్చు చేయాల్సి వస్తోందని వాపోతున్నారు. ప్రస్తుతం చిక్కుడుకాయ కిలో రూ.160, మెంతికూర రూ.200, పచ్చిమిర్చి రూ.120, సిమ్లా మిర్చి రూ.100, ఉల్లిపాయలు రూ.80, వెల్లుల్లి రూ.200, బెండకాయ రూ.80, టమాట రూ.50 వరకు విక్రయిస్తున్నారు.

అల్లం, వెల్లుల్లి, ఉల్లి ధరలు ఒక్కసారిగా చుక్కలనంటడంతో వంటింట్లో వంటకాలు చేయడం భారంగా మారింది. ఇక పప్పుధాన్యాల విషయానికి వస్తే, కందిపప్పు రూ.160, పెసరపప్పు రూ.100-120, శనగపప్పు రూ.80-100, అలాగే చక్కెర ధర రూ.55-60కి చేరడంతో సామాన్యులు ఊపిరి పీల్చుకోలేని పరిస్థితి ఏర్పడింది. మునుముందు దీపావళి పండుగలు కూడా రానున్న నేపథ్యంలో నిత్యావసరాల ధరలను నియంత్రించి, పేదలకు ఉపశమనం కలిగించేలా ప్రభుత్వం తక్షణ చర్యలు తీసుకోవాలని ప్రజలు తీవ్రంగా డిమాండ్ చేస్తున్నారు.