Telangana DA Hike: తెలంగాణ ప్రభుత్వ ఉద్యోగులకు గుడ్ న్యూస్.. DA పెంపుతో పాటు బకాయిల చెల్లింపులపై ఉత్తర్వులు జారీ..
CM Revanth Reddy’s Key Message at Tungabhadra Brings New Hope for Farmers of Three States
Telangana DA Hike: తెలంగాణ రాష్ట్ర ప్రభుత్వ ఉద్యోగులు, పింఛనుదారులకు ప్రభుత్వం శుభవార్త అందించింది. పెండింగ్‌లో ఉన్న కరవు భత్యాన్ని (డీఏ) పెంచుతూ ఆర్థిక శాఖ అధికారిక ఉత్తర్వులు జారీ చేసింది. రివైజ్డ్ పే స్కేల్-2020 ప్రకారం పనిచేస్తున్న ఉద్యోగులకు ప్రస్తుతం ఉన్న 37.31 శాతం డీఏను 40.04 శాతానికి పెంచారు. ఈ నిర్ణయం వల్ల ఉద్యోగుల బేసిక్ జీతంపై సుమారు 6.43 శాతం మేర వేతనం పెరగనుంది. ఈ డీఏ పెంపును 2024 జూలై 1వ తేదీ నుంచి అమల్లోకి తెస్తున్నట్లు ప్రభుత్వం తమ ఉత్తర్వుల్లో స్పష్టం చేసింది.
పెరిగిన డీఏ ప్రయోజనాన్ని 2026 అక్టోబర్ నెల జీతంతో (నవంబర్ 1న చెల్లించే వేతనం) కలిపి నగదు రూపంలో అందించనున్నారు. ఇక 2024 జూలై 1 నుంచి 2026 సెప్టెంబర్ 30 వరకు ఉన్న కాలానికి సంబంధించిన 27 నెలల డీఏ బకాయిలను (Arrears) ఉద్యోగుల జనరల్ ప్రావిడెంట్ ఫండ్ (GPF) ఖాతాల్లో జమ చేయాలని నిర్ణయించారు. ఈ నిర్ణయంతో ఉద్యోగులకు అక్టోబర్ నెల జీతం నుంచి చేతికి వచ్చే మొత్తం పెరగడమే కాకుండా, జీపీఎఫ్ ఖాతాల్లో బకాయిలు జమ కావడం వల్ల దీర్ఘకాలికంగా ఆర్థిక ఊరట లభించనుంది.
వివిధ పే స్కేళ్ల కింద పనిచేస్తున్న సిబ్బందికి కూడా ప్రభుత్వం డీఏను దామాషా ప్రకారం పెంచింది. 2015 పే స్కేల్ ఉద్యోగులకు డీఏను 78.06 శాతం నుంచి 81.728 శాతానికి, యుజిసి/ఎఐసిటిఇ (UGC/AICTE) పే స్కేల్-2016 పరిధిలోకి వచ్చే వారికి 50 శాతం నుంచి 53 శాతానికి, అలాగే యుజిసి/ఎఐసిటిఇ పే స్కేల్-2006 ఉద్యోగులకు 239 శాతం నుంచి 246 శాతానికి పెంచారు. వీటితో పాటు పార్ట్‌టైమ్ అసిస్టెంట్లు, గ్రామ రెవెన్యూ అసిస్టెంట్లకు (GRA) నెలకు అదనంగా రూ.100 చొప్పున గౌరవ వేతనం పెంచుతూ నిబంధనలు ఖరారు చేశారు. ప్రభుత్వ నిర్ణయం పట్ల ఉద్యోగ సంఘాలు హర్షం వ్యక్తం చేశాయి.
సంబంధిత వార్తలు
