Danam Nagender: దానం నాగేందర్పై హైకోర్టు అనర్హత వేటు: ‘సత్యమేవ జయతే’ అంటూ కేటీఆర్ స్పందన, మిగిలినవారికి ఇదే గతి అని హెచ్చరిక
Danam Nagender: ఖైరతాబాద్ ఎమ్మెల్యే దానం నాగేందర్పై తెలంగాణ హైకోర్టు అనర్హత వేటు వేయడంపై భారత్ రాష్ట్ర సమితి (బీఆర్ఎస్) వర్కింగ్ ప్రెసిడెంట్ కేటీఆర్ స్పందించారు. సోషల్ మీడియా వేదికగా “సత్యమేవ జయతే” అని వ్యాఖ్యానించిన కేటీఆర్, కాంగ్రెస్ పార్టీలో చేరిన దానం నాగేందర్ను హైకోర్టు అనర్హుడిగా ప్రకటించడాన్ని స్వాగతించారు. పార్టీ మారిన మిగిలిన ఫిరాయింపు ఎమ్మెల్యేలకు కూడా త్వరలోనే ఇదే గతి పడుతుందని ఆయన హెచ్చరించారు.
2023 తెలంగాణ అసెంబ్లీ ఎన్నికల్లో ఖైరతాబాద్ నియోజకవర్గం నుంచి బీఆర్ఎస్ అభ్యర్థిగా దానం నాగేందర్ విజయం సాధించారు. అయితే, ఆ తర్వాత మారిన రాజకీయ పరిణామాల్లో ఆయన కాంగ్రెస్ పార్టీ తీర్థం పుచ్చుకున్నారు. అంతేకాకుండా, 2024 లోక్సభ ఎన్నికల్లో కాంగ్రెస్ బి-ఫామ్పై సికింద్రాబాద్ పార్లమెంట్ స్థానం నుంచి పోటీ చేశారు. బీఆర్ఎస్పై గెలిచి కాంగ్రెస్ తరఫున పోటీ చేయడంపై బీఆర్ఎస్, బీజేపీ నాయకులు తీవ్ర అభ్యంతరం వ్యక్తం చేశారు.
దానం నాగేందర్పై నమోదు చేసిన అనర్హత పిటిషన్లను శాసనసభ స్పీకర్ క్లీన్ చీట్ ఇస్తూ కొట్టివేసినప్పటికీ, బీఆర్ఎస్ ఎమ్మెల్యే పాడి కౌశిక్ రెడ్డి, బీజేపీ ఎమ్మెల్యే అల్లేటి మహేశ్వర్ రెడ్డిలు ఈ వ్యవహారాన్ని హైకోర్టులో సవాలు చేశారు. సుదీర్ఘ విచారణ అనంతరం స్పీకర్ నిర్ణయాన్ని తప్పుపట్టిన ఉన్నత న్యాయస్థానం.. రాజ్యాంగంలోని 10వ షెడ్యూల్ (పార్టీ ఫిరాయింపుల నిరోధక చట్టం) ప్రకారం దానం నాగేందర్పై అనర్హత వేటు వేసింది. లోక్సభ ఎన్నికలకు నామినేషన్ వేసిన ఏప్రిల్ 2024 నాటి నుంచే ఈ అనర్హత అమలులోకి వస్తుందని కోర్టు స్పష్టం చేసింది.
ఈ తీర్పుపై బీఆర్ఎస్ ఎమ్మెల్యే పాడి కౌశిక్ రెడ్డి స్పందిస్తూ.. ఇది బీఆర్ఎస్ పార్టీ సాధించిన గొప్ప విజయమని అభివర్ణించారు. ప్రజాస్వామ్యాన్ని, రాజ్యాంగాన్ని కాపాడటానికి తమ పోరాటం ఫలించిందని తెలిపారు. బీఆర్ఎస్ నుంచి గెలిచి కాంగ్రెస్లోకి మారిన మిగిలిన ఫిరాయింపు ఎమ్మెల్యేలందరిపై అనర్హత వేటు పడేవరకు తమ న్యాయపోరాటం ఆగదని కౌశిక్ రెడ్డి స్పష్టం చేశారు.
సంబంధిత వార్తలు
