Tomorrow Weather Update: రేపటి వాతావరణం.. దేశంలో ఒకేసారి ఐదు తుఫాను వలయాలు.. జూలై 27 వరకు అత్యంత భారీ వర్షాలు

Tomorrow Weather Update: భారతదేశవ్యాప్తంగా జూలై 21 నుండి జూలై 27 వరకు తీవ్ర ప్రతికూల వాతావరణ పరిస్థితులు నెలకొనే అవకాశం ఉందని ఐఎండీ హెచ్చరికలు జారీ చేసింది. రేపటి వాతావరణం విషయానికి వస్తే.. పలు రాష్ట్రాల్లో అత్యంత భారీ వర్షాలతో పాటు తుఫాను లాంటి పరిస్థితులు ఏర్పడతాయని భారత వాతావరణ శాఖ తెలిపింది. వాతావరణంలోని వివిధ పొరల్లో ఒకే సమయంలో ఐదు రకాల సైక్లోనిక్ సర్క్యులేషన్లు (ఆవర్తనాలు) చురుకుగా మారడమే ఈ అకస్మాత్తు పరిణామాలకు ప్రధాన కారణమని వాతావరణ శాఖ అధికారులు స్పష్టం చేశారు.

హర్యానా ప్రాంతంలో దిగువ ట్రోపోస్ఫియర్ స్థాయిలో.. ఈశాన్య మధ్యప్రదేశ్‌లో మధ్య ట్రోపోస్ఫియర్ స్థాయిలో, అలాగే నైరుతి రాజస్థాన్ పరిసరాల్లో, పశ్చిమ-మధ్య బంగాళాఖాతం-ఉత్తర కోస్తాంధ్ర తీరం ఆనుకుని, ఉత్తర ఛత్తీస్‌గఢ్‌లో ఈ ఆవర్తనాలు ఏకకాలంలో కేంద్రీకృతమై ఉనికిలో ఉన్నాయని ఐఎండీ తెలిపింది. వీటి ప్రభావంతో దేశంలోని అన్ని ప్రాంతాల్లోనూ వాతావరణంలో తీవ్ర మార్పులు చోటుచేసుకుంటున్నాయని అందుకే వర్షాలు తప్పవని సూచించింది. .

ఉత్తర భారతదేశంలో జమ్మూ కాశ్మీర్, లడఖ్‌లలో జూలై 21-24 మధ్య ఉరుములు, మెరుపులతో కూడిన వర్షాలు కురుస్తాయి. అలాగే హిమాచల్ ప్రదేశ్, ఉత్తరాఖండ్‌లలో జూలై 27 వరకు వారం రోజులు నిరంతరాయంగా భారీ వర్షాలు కురిసే ప్రమాదం ఉంది. పంజాబ్, హర్యానా, చండీగఢ్, ఢిల్లీ-NCR ప్రాంతాలలో జూలై 23 వరకు గంటకు 50 కిలోమీటర్ల వేగంతో బలమైన ఈదురుగాలులు వీస్తూ భారీ వర్షాలు కురవనున్నాయి. ఉత్తర ప్రదేశ్, తూర్పు రాజస్థాన్‌లలో మోస్తరు నుండి భారీ వర్షాలు నమోదవుతాయి.

మధ్య భారతదేశంలో పశ్చిమ మధ్యప్రదేశ్, ఛత్తీస్‌గఢ్, విదర్భ ప్రాంతాల్లో జూలై 27 వరకు పిడుగులు, మెరుపులతో కూడిన అత్యంత భారీ వర్షాలు పడే సూచనలు ఉన్నాయి. తూర్పు, ఈశాన్యంలో బీహార్, పశ్చిమ బెంగాల్, సిక్కిం రాష్ట్రాల్లో ఉరుములతో కూడిన వర్షాలు పడుతుండగా, ఈశాన్య రాష్ట్రాలైన అరుణాచల్ ప్రదేశ్, అస్సాం, మేఘాలయ, నాగాలాండ్, మణిపూర్, మిజోరం, త్రిపురలలో వారం మొత్తం విస్తారంగా వర్షాలు కురుస్తాయి. పశ్చిమ భారతదేశంలోని గుజరాత్, కొంకణ్, గోవా, సౌరాష్ట్ర, కచ్ ప్రాంతాలలో జూలై 21 నుండి 27 వరకు నిరంతర భారీ వర్ష హెచ్చరికలు అమల్లో ఉన్నాయి.

దక్షిణ భారతదేశంలోని ఆంధ్రప్రదేశ్, తెలంగాణ, తమిళనాడు, కర్ణాటక, కేరళ రాష్ట్రాల్లోనూ ఈ ప్రభావం స్పష్టంగా కనిపిస్తోంది. ముఖ్యంగా కోస్తాంధ్ర, యానాం, రాయలసీమ, తెలంగాణలోని హైదరాబాద్, విజయవాడలతో పాటు కర్ణాటక అంతర్గత ప్రాంతాలలో జూలై 27 వరకు బలమైన ఈదురుగాలులు, తీవ్రమైన పిడుగులతో కూడిన భారీ వర్షాలు కురిసే అవకాశం ఉంది. ఈ తీవ్ర మార్పుల దృష్ట్యా లోతట్టు ప్రాంత ప్రజలు, రైతులు అత్యంత అప్రమత్తంగా ఉండాలని అధికారులు హెచ్చరించారు.