Indian Railways: తెలంగాణకు కేంద్ర కేబినెట్ భారీ నజరానా: రూ. 2,419 కోట్లతో ఘట్‌కేసర్-కాజీపేట మధ్య నాలుగో రైలు మార్గం..

Indian Railways: తెలంగాణ రాష్ట్రంలో ప్రయాణికులు, సరకు రవాణా రద్దీని తగ్గించేందుకు ఘట్‌కేసర్ నుండి కాజీపేట వరకు 110 కిలోమీటర్ల మేర 4వ ట్రాక్ నిర్మాణానికి పచ్చజెండా ఊపారు.

Indian Railways: భారత రైల్వే మౌలిక సదుపాయాల బలోపేతానికి కేంద్ర ప్రభుత్వం కీలక నిర్ణయం తీసుకుంది. ప్రధానమంత్రి నరేంద్ర మోదీ ఆధ్వర్యంలో సమకూడిన కేంద్ర మంత్రిమండలి సమావేశం దేశవ్యాప్తంగా 8 ప్రధాన మల్టీట్రాకింగ్ నిర్మాణాలకు ఆమోదముద్ర వేసింది. మొత్తం రూ. 20,804 కోట్ల వ్యయంతో చేపట్టనున్న ఈ ప్రతిపాదనలను 2029-30 నాటికి పూర్తి చేయాలని నిర్దేశించారు. ఈ బృహత్తర ప్రాజెక్టుల్లో భాగముగా తెలంగాణ రాష్ట్రంలో ప్రయాణికులు, సరకు రవాణా రద్దీని తగ్గించేందుకు ఘట్‌కేసర్ నుండి కాజీపేట వరకు 110 కిలోమీటర్ల మేర 4వ ట్రాక్ నిర్మాణానికి పచ్చజెండా ఊపారు.

హైదరాబాద్ – వరంగల్ మార్గంలో రద్దీకి చెక్!
రాజధాని హైదరాబాద్‌ను ఉత్తర తెలంగాణలోని కీలక ప్రాంతాలైన యాదాద్రి భువనగిరి, వరంగల్, కాజీపేటలతో అనుసంధానించే ఈ మార్గం ప్రస్తుతం రైళ్ల సాంద్రతతో తీవ్ర ఒత్తిడిని ఎదుర్కొంటోంది. రూ. 2,419 కోట్ల అంచనాతో చేపట్టే ఈ 4వ ట్రాక్ అందుబాటులోకి వస్తే:

వేగవంతమైన ప్రయాణం: ప్యాసింజర్, ఎక్స్‌ప్రెస్ రైళ్ల నిర్వహణ మరింత సజావుగా సాగి, కాలయాపన తగ్గుతుంది.
భక్తి, పర్యాటక రంగాలకు ప్రోత్సాహం: యాదగిరిగుట్ట శ్రీ లక్ష్మీనరసింహస్వామి క్షేత్రం, భువనగిరి ఖిల్లా వంటి ప్రాముఖ్యత కలిగిన ప్రదేశాలకు వెళ్లే భక్తులకు, పర్యాటకులకు రాకపోకలు సులువవుతాయి.
వ్యాపార విస్తరణ: సిమెంట్, ఇనుము, బొగ్గు, పెట్రోలియం, ధాన్యాలు ఎరువుల రవాణాకు ప్రత్యేక కారిడార్ మార్గం లభించి పారిశ్రామిక వికాసానికి దోహదపడుతుంది.

దక్షిణాదికి బిగ్ బూస్ట్: ఐదు ప్రాజెక్టులకు రూ. 10,021 కోట్లు
తెలంగాణతో పాటు ఆంధ్రప్రదేశ్, తమిళనాడు, కర్ణాటక రాష్ట్రాల్లోని 17 జిల్లాల వ్యాప్తంగా 5 మల్టీట్రాకింగ్ ప్రతిపాదనలకు రూ. 10,021 కోట్లు కేటాయించారు.

దక్షిణాది కవర్ అయ్యే కీలక రైల్వే లైన్లు:

1. ఘట్‌కేసర్ – కాజీపేట: 110 కి.మీ. (4వ ట్రాక్)
2. అరక్కోణం – రేణిగుంట: 77 కి.మీ. (3వ, 4వ లైన్లు)
3. వైట్‌ఫీల్డ్ – బంగారపేట: 47 కి.మీ. (3వ, 4వ లైన్లు)
4. హోసూరు – ఓమలూరు: 147 కి.మీ. (రెండు దారుల ట్రాక్)
5. సేలం – కరూర్ – దిండిగల్: 159 కి.మీ. (డబ్లింగ్ పనులు)

పర్యావరణం లాజిస్టిక్స్‌కు మైలేజ్:
గ్రామీణ అనుసంధానం: దక్షిణాదిలోని సుమారు 2,121 పల్లెలకు రైలు సదుపాయం మెరుగుపడి దాదాపు 52 లక్షల మందికి ప్రయోజనం చేకూరుతుంది.
అదనపు సామర్థ్యం: ఏటా 47 మిలియన్ టన్నుల సరకును అదనంగా చేరవేసే వెసులుబాటు కలుగుతుంది.
ఇంధన ఆదా – పచ్చదనం: రోడ్డు రవాణా తగ్గడం ద్వారా 8 కోట్ల లీటర్ల ఇంధనం ఆదా అవ్వడమే కాకుండా, 42 కోట్ల కిలోల కార్బన్ విడుదల తగ్గుతుంది. ఇది దాదాపు 2 కోట్ల వృక్షాలను పెంచడంతో సమానమని కేంద్రం తెలిపింది.

మిగతా రూ. 10,783 కోట్లను పశ్చిమ బెంగాల్, జార్ఖండ్, ఒడిశా, మధ్యప్రదేశ్, ఛత్తీస్‌గఢ్ రాష్ట్రాల్లోని 3 మార్గాలకు ఉపయోగించనున్నారు. ఈ వ్యూహాత్మక అడుగులతో భాగ్యనగరం – వరంగల్ పారిశ్రామిక కారిడార్ ప్రగతిపథంలో మరింత ముందుకు సాగనుంది.