జూన్‌ నెలలో 42 శాతం తక్కువ వర్షపాతం లోటు.. అడుగంటుతున్న ప్రధాన జలాశయాలు..

భారతదేశ వ్యాప్తంగా జూన్‌ నెలలో వర్షపాతం తీవ్రంగా క్షీణించింది. ఈ ఏడాది జూన్ నెలలో సాధారణం కంటే 42 శాతం తక్కువ వర్షపాతం నమోదైంది. గత దశాబ్దన్నర కాలంలో వేసవి రుతు పవనాలకు ఇది అత్యంత బలహీనమైన ఆరంభంగా వాతావరణ నిపుణులు పేర్కొంటున్నారు. దీని ఫలితంగా దేశంలోని మొత్తం 76 శాతం ప్రాంతాల్లో వర్షపాతం ‘లోటు’ లేదా ‘తీవ్ర లోటు’గా రికార్డయ్యింది. రానున్న జూలై నెల కూడా సాధారణం కంటే పొడిగా ఉంటుందని నిపుణులు అంచనా వేస్తున్నారు. పసిఫిక్ మహాసముద్రంలో పెరుగుతున్న సముద్ర ఉపరితల ఉష్ణోగ్రతల (ఎల్‌ నినో పరిస్థితి) కారణంగా రుతుపవన వర్షపాతం మళ్లీ కొద్దిగా పుంజుకున్నప్పటికీ, జూలై నెలలో చాలావరకు వర్షపాతం సాధారణం కంటే తక్కువగానే ఉంటుందని వాతావరణ శాస్త్రవేత్తలు అంచనా వేస్తున్నారు.

ఈ వర్షభావ పరిస్థితుల కారణంగా దేశంలోని సాగునీరు, తాగునీటి వ్యవస్థలపై తీవ్ర ప్రభావం పడుతోంది. నీటి సరఫరాను పర్యవేక్షించే దేశంలోని 166 ప్రధాన జలాశయాలలో జూన్‌ 25 నాటికి మొత్తం నిల్వ సామర్థ్యంలో కేవలం 26 శాతం మాత్రమే నీరు అందుబాటులో ఉంది. ముఖ్యంగా ప్రముఖ ప్రాజెక్టులైన ఇందిరా సాగర్‌లో నీటి మట్టం 14 శాతానికి, నాగార్జున సాగర్‌లో 5 శాతానికి , తెహ్రీ జలాశయంలో ఏకంగా 2 శాతానికి పడిపోవడం పరిస్థితి తీవ్రతకు అద్దం పడుతోంది.

ఇదే సమయంలో, గ్లోబల్ వార్మింగ్ కారణంగా ప్రపంచవ్యాప్తంగా వాతావరణ మార్పులు ఆందోళన కలిగిస్తున్నాయి. భారత రుతుపవనాలు బలహీనపడిన తరుణంలోనే, అటు ఐరోపా ఖండం తన చరిత్రలోనే అత్యంత తీవ్రమైన వడగాడ్పులను ఎదుర్కొంటోంది. ఫ్రాన్స్‌, జర్మనీ, ఇటలీ, స్పెయిన్‌తో పాటు ఇంగ్లండ్‌లోని కొన్ని ప్రాంతాలలో ఉష్ణోగ్రతలు కాలానుగుణ సగటు కంటే 5 నుంచి 12 డిగ్రీల సెల్సియస్‌ అధికంగా నమోదవుతున్నాయి.

ఉత్తర ఆఫ్రికా నుండి వేడి గాలిని రప్పించే స్థిరమైన అధిక పీడన వ్యవస్థ కారణంగా ఈ వడగాడ్పులు తీవ్రమయ్యాయని, ఇవి మానవ ప్రేరిత వాతావరణ మార్పుల వల్లే మరింత ముదిరాయని ‘వరల్డ్‌ వెదర్‌ అట్రిబ్యూషన్‌’ అనే బహుళ దేశాల పరిశోధక బృందం స్పష్టం చేసింది. ఐరోపా వేసవి వాతావరణంపై ఎల్‌ నినో ప్రభావం పరిమితంగానే ఉన్నప్పటికీ, ఈ ఏడాది భారత రుతుపవనాలపై మాత్రం ఇది తీవ్ర ప్రభావం చూపే అవకాశం ఉందని శాస్త్రవేత్తలు హెచ్చరిస్తున్నారు.