అరుణాచల్ ప్రదేశ్‌లో భారీ వర్షాల బీభత్సం.. ఇళ్లు ధ్వంసం.. ముగ్గురు గల్లంతు.. సహాయక చర్యలు ముమ్మరం..

అరుణాచల్ ప్రదేశ్‌లోని కేయి పన్యార్ జిల్లాలో బుధవారం ఎడతెరిపి లేకుండా కురుస్తున్న భారీ వర్షాలు విపత్తును సృష్టించాయి. అకస్మాత్తుగా ముంచెత్తిన వరదలు, కొండచరియలు విరిగిపడిన ఘటనల వల్ల జిల్లాలోని లోతట్టు ప్రాంతాలు జలమయమవగా, ముగ్గురు వ్యక్తులు గల్లంతయ్యారని అధికారులు వెల్లడించారు. ప్రధాన రహదారులు దెబ్బతినడంతో రవాణా వ్యవస్థ స్తంభించిపోయి పలువురు ప్రయాణికులు సుదూర ప్రాంతాల్లో చిక్కుకుపోయారు.

రాష్ట్ర విపత్తు నిర్వహణ కార్యదర్శి డాని సులు తెలిపిన వివరాల ప్రకారం.. యజలి సర్కిల్ పరిధిలోని పూసా సమీపంలో ఉన్న నీప్కో (NEPCO) ప్రాజెక్ట్ కాలనీలో నిర్మాణంలో ఉన్న ఒక భారీ ప్రహరీ గోడ వరద ఉధృతికి కూలిపోవడంతో ఈ ఆకస్మిక వరదలు సంభవించాయి. దీనివల్ల కాలనీతో పాటు దాని చుట్టుపక్కల ఉన్న లోతట్టు నివాస ప్రాంతాల్లోకి ఒక్కసారిగా వరద నీరు ముంచెత్తింది. ఈ ప్రమాదంలో కనీసం 18 నివాస గృహాలు తీవ్రంగా దెబ్బతినగా, ముగ్గురు వ్యక్తులు నీటి ప్రవాహంలో కొట్టుకుపోయి గల్లంతయ్యారు.

ఈ విపత్కర పరిస్థితిని సమీక్షించడానికి, సహాయక చర్యలను వేగవంతం చేయడానికి అదనపు డిప్యూటీ కమిషనర్, డిప్యూటీ సూపరింటెండెంట్ ఆఫ్ పోలీస్ ,సర్కిల్ అధికారి నేతృత్వంలోని ఉన్నతాధికారుల బృందాన్ని పరిపాలన యంత్రాంగం తక్షణమే ప్రభావిత ప్రాంతానికి పంపించింది. క్షేత్రస్థాయిలో సహాయక చర్యల కోసం రాష్ట్ర విపత్తు ప్రతిస్పందన దళం (SDRF) రంగంలోకి దిగింది. దీనితో పాటు జాతీయ విపత్తు ప్రతిస్పందన దళం (NDRF)ను కూడా అప్రమత్తం చేసి, రెస్క్యూ ఆపరేషన్‌లో పాలుపంచుకోవడానికి ఆ ప్రాంతానికి తరలించారు. అత్యవసర పరిస్థితులను ఎదుర్కోవడానికి యజాలి అధికార పరిధిలో అందుబాటులో ఉన్న రిజర్వ్ సిబ్బందిని, ప్రభుత్వ వాహనాలన్నింటినీ సమీకరించడమే కాకుండా, స్థానికంగా ఉన్న మాజీ సైనికుల సేవలను కూడా వినియోగించుకుంటున్నారు.

మరోవైపు నార్త్ ఈస్టర్న్ ఎలక్ట్రిక్ పవర్ కార్పొరేషన్ (NEEPCO) ముందుజాగ్రత్త చర్యగా రంగనాడి డ్యామ్ గేట్లను ఎత్తి నీటిని దిగువకు విడుదల చేయడం ప్రారంభించింది. వరద ఉధృతి కారణంగా ఈ ప్రాజెక్టులో విద్యుత్ ఉత్పత్తిని తాత్కాలికంగా నిలిపివేసినట్లు అధికారులు ప్రకటించారు. భారీ వర్షాల ధాటికి జిల్లాలోని రహదారి అనుసంధానం పూర్తిగా దెబ్బతింది. పోటిన్, హోజ్ సమీపంలో కొండచరియలు విరిగిపడటంతో జాతీయ రహదారిలోని మూడు ప్రధాన భాగాలు మూసుకుపోయాయి. రహదారిపై భారీగా శిథిలాలు పేరుకుపోవడంతో వందలాది మంది ప్రయాణికులు వాహనాల్లోనే చిక్కుకుపోయారు.

రహదారి పునరుద్ధరణ పనుల కోసం అవసరమైన భారీ యంత్రసామగ్రిని సిద్ధం చేశారు. వీలైనంత త్వరగా మట్టిని, కొండరాళ్లను తొలగించి వాహనాల రాకపోకలను పునరుద్ధరించాలని రహదారి కాంట్రాక్టర్‌ను అధికారులు ఆదేశించారు. ప్రభావిత ప్రాంతాల్లో గాలింపు చర్యలు, ఆస్తి నష్టం అంచనా వేసే పనులు ముమ్మరంగా సాగుతున్నాయని, నష్టం ఏ స్థాయిలో ఉందనేది పూర్తి వివరాలు తెలియాల్సి ఉందని డాని సులు పేర్కొన్నారు. అరుణాచల్ ప్రదేశ్‌లో గత కొన్ని రోజులుగా కురుస్తున్న ఈ అకాల వర్షాల వల్ల ఇప్పటికే పలు జిల్లాల్లో ఆకస్మిక వరదలు, మౌలిక సదుపాయాల ధ్వంసం వంటి ఘటనలు చోటుచేసుకున్నాయి. ఈ నేపథ్యంలో ప్రమాదకర ప్రాంతాల్లో, నదీ తీరాల్లో నివసిస్తున్న ప్రజలు అత్యంత అప్రమత్తంగా ఉండాలని, అత్యవసరమైతే తప్ప అనవసర ప్రయాణాలు పెట్టుకోవద్దని విపత్తు నిర్వహణ అధికారులు గట్టిగా సూచించారు.