Vande Mataram Telugu lyrics: వందేమాతరం తెలుగు లిరిక్స్… అసలు దాని పూర్తి కథేంటి.. ప్రతి పదం వెనుక ఉన్న అర్థం ఏంటి..

jagan 21 Aug 2026 1 నిమిషాల పఠనం లైఫ్ స్టైల్

Vande Mataram Telugu lyrics

Vande Mataram Telugu lyrics: భారత స్వాతంత్ర్యోద్యమంలో కోట్లాది మందికి స్ఫూర్తినిచ్చిన గేయం వందేమాతరం. దేశభక్తి భావనను రగిలించిన ఈ గీతం కేవలం ఒక పాట మాత్రమే కాదు.. భారతమాతను స్తుతిస్తూ.. ఆమెకు వందనం చేస్తూ రచించిన కవితా రూపం. స్వాతంత్ర్య పోరాట కాలంలో బ్రిటిష్ పాలనకు వ్యతిరేకంగా ప్రజలను ఏకం చేయడంలో ఈ గేయం కీలక పాత్ర పోషించింది.

వందేమాతరంను బెంగాలీ రచయిత బంకిమ్ చంద్ర చట్టోపాధ్యాయ రచించారు. ఆయన రచించిన ఆనందమఠం నవలలో ఈ గేయం భాగంగా వచ్చింది. 1870లలో ఈ గేయం రచించబడినట్లు సాధారణంగా భావిస్తారు. 1882లో ఆనందమఠం ప్రచురితమైనప్పుడు ఇది విస్తృతంగా ప్రజల్లోకి వెళ్లింది.

వందే అంటే వందనం చేయడం, నమస్కరించడం. మాతరం అంటే తల్లికి. అంటే తల్లికి వందనం లేదా అమ్మకు నమస్కారం అనే భావం వస్తుంది. ఇక్కడ తల్లిగా భారతదేశాన్ని, భారతమాతను ప్రతీకాత్మకంగా కీర్తించారు.

గేయంలోని పంక్తుల భావం:

వందేమాతరం.. వందేమాతరం..
సుజలాం, సుఫలాం, మలయజ శీతలాం,
శస్యశ్యామలాం మాతరం.

అంటే.. తల్లీ.. నీకు వందనం. సమృద్ధిగా నీటితో నిండిన, సస్యశ్యామలమైన, సమృద్ధిగా పంటలు పండించే, మలయ పర్వతాల నుంచి వచ్చే చల్లని గాలులతో ఆహ్లాదకరంగా ఉండే తల్లీ.. నీకు వందనం అనే భావం.

తదుపరి పంక్తుల్లో దేశం యొక్క ప్రకృతి సౌందర్యాన్ని మరింతగా వర్ణిస్తారు. చంద్రకాంతితో మెరిసే రాత్రులు, పచ్చని పంట పొలాలు, మధురమైన భాష, సంతోషంగా జీవించే ప్రజలు వంటి అంశాలను కవి భారతమాత సౌందర్యానికి ప్రతీకలుగా చూపించారు.

గేయంలోని తరువాతి భాగాల్లో భారతమాతను దుర్గాదేవి, లక్ష్మీదేవి, సరస్వతీదేవి వంటి శక్తి, సంపద, జ్ఞానానికి ప్రతీకలైన దేవతా రూపాలతో పోలుస్తారు. అందుకే వందేమాతరంలో దేశభక్తితో పాటు భారతీయ ఆధ్యాత్మిక, సాంస్కృతిక ప్రతీకలు కూడా కనిపిస్తాయి.

వందేమాతరం పూర్తి లిరిక్స్..

వందే మాతరం
సుజలాం సుఫలాం
మలయజ శీతలాం
శస్య శ్యామలాం మాతరం
వందే మాతరం

శుభ్ర జ్యోత్స్నా పులకిత యామినీం
ఫుల్ల కుసుమిత ద్రుమదళ శోభినీం
సుహాసినీం సుమధుర భాషిణీం
సుఖదాం వరదాం మాతరం
వందే మాతరం

తెలుగు భావం

నీరు, పంటలతో సమృద్ధిగా ఉన్న తల్లీ..
మలయ పర్వతాల నుంచి వచ్చే చల్లని గాలులతో ఆహ్లాదకరంగా ఉండే తల్లీ..
పచ్చని పంట పొలాలతో శోభిల్లే భారతమాతా.. నీకు వందనం.

వెన్నెల కాంతులతో ప్రకాశించే రాత్రులతో,
వికసించిన పూలతో నిండిన చెట్లతో అందంగా కనిపించే తల్లీ..
చిరునవ్వుతో, మధురమైన మాటలతో అలరించే తల్లీ..
సుఖాన్ని, వరాలను ప్రసాదించే భారతమాతా.. నీకు వందనం.

స్వాతంత్ర్య ఉద్యమంలో కీలక పాత్ర

1905లో బెంగాల్ విభజనకు వ్యతిరేకంగా జరిగిన ఉద్యమ సమయంలో వందేమాతరం నినాదం, గేయం ప్రజల్లో విపరీతమైన ఉత్సాహాన్ని నింపాయి. స్వాతంత్ర్య సమరయోధులు బ్రిటిష్ పాలనకు వ్యతిరేకంగా నిర్వహించిన సమావేశాలు, ప్రదర్శనల్లో దీనిని ఆలపించేవారు.

బ్రిటిష్ ప్రభుత్వం కూడా ఈ గేయం ప్రభావాన్ని గుర్తించి.. కొన్ని ప్రాంతాల్లో వందేమాతరం నినాదాలు, గేయాలపై ఆంక్షలు విధించింది. అయినప్పటికీ స్వాతంత్ర్య సమరంలో ఇది ప్రజల నోట మారుమోగుతూనే ఉంది.

జాతీయ గీతం కాదు.. జాతీయ గేయం

స్వాతంత్ర్యం వచ్చిన తర్వాత జనగణమనను భారత జాతీయ గీతంగా స్వీకరించారు. అదే సమయంలో వందేమాతరంకు జాతీయ గేయం హోదా లభించింది. రాజ్యాంగ సభలో 1950 జనవరి 24న జనగణమనను జాతీయ గీతంగా స్వీకరించడంతో పాటు వందేమాతరంకు కూడా సమాన గౌరవం ఉంటుందని స్పష్టం చేశారు. వందేమాతరం మొత్తం గేయం చాలా పొడవుగా ఉంటుంది. సాధారణంగా అధికారిక కార్యక్రమాల్లో పాడే భాగం ప్రధానంగా మొదటి రెండు చరణాలు. వాటిలో భారతదేశ ప్రకృతి, సౌందర్యం, మాతృభూమి పట్ల భక్తి ప్రధానంగా వ్యక్తమవుతాయి.

వందే మాతరం కొత్తగా యాడ్ అయిన పూర్తి లిరిక్స్ ఇవే..

వందేమాతరం
సుజలాం సుఫలాం మలయజ శీతలాం
సస్య శ్యామలాం మాతరం ॥వందే॥

శుభ్రజ్యోత్స్నా పులకితయామినీం
పుల్లకుసుమిత ద్రుమదల శోభినీం
సుహాసినీం సుమధుర భాషిణీం
సుఖదాం వరదాం మాతరం ॥ వందే ॥

కోటికోటి కంఠ కలకల నినాద-కరాలే
కోటి కోటి భుజైర్ధృత-ఖర-కరవాలే
అబలా కేయనో మా ఏతో బలే
బహుబల ధారిణీం నమామి తారిణీం
రిపుదల-వారిణీం మాతరామ్ ॥ వందే ॥

తుమి విద్యా తుమి ధర్మ తుమి హృది తుమి మర్మ
త్వం హి ప్రాణాః శరీరే
బాహుతే తుమి మా శక్తి
హృదయే తుమి మా భక్తి
తో మారయి ప్రతిమా గడి మందిరే మందిరే ॥ వందే ॥

త్వం హి దుర్గా దశ-ప్రహరణ-ధారిణీ
కమలా కమలదళ-విహారిణీ
వాణీ విద్యాదాయినీ
నమామి త్వాం
నమామి కమలాం అమలాం అతులాం
సుజలాం సుఫలాం మాతరమ్ ॥ వందే ॥

శ్యామలాం సరలాం సుస్మితాం భూషితాం
ధరణీం భరణీం మాతరమ్ ॥

మొత్తంగా చూస్తే.. వందేమాతరం ఒక గేయం కంటే ఎక్కువ. భారతదేశాన్ని తల్లిగా భావించి ఆమెకు వందనం చేసే భావనకు ఇది ప్రతీక. స్వాతంత్ర్యోద్యమంలో ప్రజల్లో ధైర్యం, ఐక్యత, దేశభక్తిని పెంచిన ఈ గేయం.. నేటికీ భారత చరిత్రలో ప్రత్యేక స్థానాన్ని కలిగి ఉంది.

గమనిక: అధికారికంగా జాతీయ గేయంగా గుర్తింపు పొందిన ‘వందేమాతరం’లో సాధారణంగా మొదటి రెండు చరణాలనే అధికారిక కార్యక్రమాల్లో ఆలపిస్తారు. మొత్తం గేయంలో తర్వాతి భాగాల్లో భారతమాతను శక్తి, జ్ఞానం, సంపదకు ప్రతీకలైన దేవీ స్వరూపాలతో వర్ణిస్తారు.